ທ່ານ ໂຈ ໄບເດນ ໂທລະສັບຫາລືກັບ ທ່ານ ສີຈິ້ນຜິງ ຫວັງຟື້ນຟູການພົວພັນ ອາເມລິກາ-ຈີນ

ປະທານາທິບໍດີ ໂຈ ໄບເດນ ແຫ່ງອາເມລິກາ ສົນທະນາທາງໂທລະສັບກັບປະທານປະເທດ ສີຈິ້ນຜິງ ຂອງຈີນ ໃນຄືນວັນທີ 9 ກັນຍາ ຕາມເວລາອາເມລິກາ ຫລື ກົງກັບຕອນເຊົ້າວັນທີ 10 ກັນຍາ ໃນປະເທດຈີນ ທ່າມກາງການພົວພັນເຄັ່ງຕຶງລະຫວ່າງ 2 ປະເທດໃນຫລາຍເດືອນຜ່ານມາ ໂດຍສະເພາະບັນຫາໄຊເບີສະເປຊ ເຊິ່ງອາເມລິກາກ່າວຫາວ່າຈີນຫລາຍບັນຫາ ລວມທັງການແຮັກລະບົບອີເມລຂອງ Microsoft ແລະ ການໂຈມຕີດ້ວຍແຣນຊຳແວອື່ນໆ ເຊິ່ງການເຈລະຈາທາງໂທລະສັບລະຫວ່າງທ່ານ ໄບເດນ ແລະ ທ່ານ ສີຈິ້ນຜິງ ໃນຄັ້ງນີ້ຖືເປັນຄັ້ງທຳອິດໃນຮອບ 7 ເດືອນ ແລະ ເປັນຄັ້ງທີ 2 ນັບແຕ່ທ່ານ ໄບເດນ ເຂົ້າມາຮັບຕຳແໜ່ງຜູ້ນຳອາເມລິກາ.

ທຳນຽບຂາວເປີດເຜີຍພາຍຫລັງການສົນທະນາດັ່ງກ່າວວ່າ: ທ່ານ ໄບເດນ ແລະ ທ່ານ ສີຈິ້ນຜິງ ຫາລືກ່ຽວກັບຄວາມຮັບຜິດຊອບຂອງທັງ 2 ປະເທດ ເພື່ອສ້າງຄວາມໝັ້ນໃຈວ່າການແຂ່ງຂັນຈະບໍ່ນຳໄປສູ່ຄວາມຂັດແຍ່ງ.

“ຜູ້ນຳທັງສອງຫາລືທາງຍຸດທະສາດກວ້າງໆໃນບັນຫາທີ່ສົນໃຈຮ່ວມກັນ ແລະ ບັນຫາທີ່ທັງ 2 ຝ່າຍມີມຸມມອງທີ່ຕ່າງກັນ” ຖະແຫລງການຂອງທຳນຽບຂາວລະບຸ. “ຜູ້ນຳທັງສອງເຫັນພ້ອມຈະມີສ່ວນຮ່ວມໃນບັນຫາເຫລົ່ານັ້ນຢ່າງເປີດເຜີຍ ແລະ ກົງໄປກົງມາ”.

ຂະນະທີ່ເຈົ້າໜ້າທີ່ອາວຸໂສທ່ານໜຶ່ງໃນຄະນະບໍລິຫານຂອງທ່ານ ໄບເດນ ບອກກັບນັກຂ່າວກ່ອນ ແລະ ຫລັງການສົນທະນາດັ່ງກ່າວວ່າ: ທ່ານ ໄບເດນ ເວົ້າເຖິງບັນຫາທາງໄຊເບີໃນລະຫວ່າງການສົນທະນາປະມານ 90 ນາທີ ແລະ ພະຍາຍາມຈະເວົ້າເຖິງຍຸດທະສາດຢ່າງກວ້າງໆກ່ຽວກັບວິທີແກ້ໄຂຄວາມພົວພັນລະຫວ່າງ ອາເມລິກາ ກັບ ຈີນ ເພື່ອຫລີກລ່ຽງຄວາມຂັດແຍ່ງ ໂດຍເຈົ້າໜ້າທີ່ຍັງໄດ້ເປີດເຜີຍເຖິງບັນຍາກາດຂອງການສົນທະນາວ່າ: ມີຄວາມເຄົາລົບຢຳເກງ ແຕ່ໃນຂະນະດຽວກັນກໍເປັນກັນເອງ ແລະ ກົງໄປກົງມາ.

ໃນຂະນະທີ່ສື່ຂອງທາງການຈີນໄດ້ລາຍງານຂ່າວກ່ຽວກັບການສົນທະນາຂອງຜູ້ນຳທັງສອງເຊັ່ນກັນ ໂດຍສຳນັກຂ່າວ Xinhua ລາຍງານວ່າ: ທ່ານ ສີຈິ້ນຜິງ ບອກກັບທ່ານ ໄບເດນ ວ່າ: ນະໂຍບາຍຂອງອາເມລິກາທີ່ມີຕໍ່ຈີນເປັນສາເຫດທີ່ເຮັດໃຫ້ການພົວພັນຂອງ 2 ປະເທດຜະເຊີນກັບອຸປະສັກຮ້າຍແຮງ.

“ຖ້າຈີນ ແລະ ອາເມລິກາ ຮ່ວມມືກັນ ທັງ 2 ປະເທດ ແລະ ທົ່ວໂລກຈະໄດ້ຮັບຜົນປະໂຫຍດ, ຖ້າຈີນ ແລະ ອາເມລິກາຜະເຊີນໜ້າກັນ ທັງ 2 ປະເທດ ແລະ ທົ່ວໂລກຈະທຸກຍາກ. ການພົວພັນ ຈີນ-ອາເມລິກາ ບໍ່ແມ່ນຄຳຖາມທາງເລືອກວ່າ: ຈຳເປັນຕ້ອງເຮັດໃຫ້ດີ ຫລື ບໍ່, ແຕ່ເປັນຄຳຖາມທີ່ວ່າ: ຈະຕ້ອງເຮັດແນວໃດໃຫ້ດີ” Xinhua ລາຍງານຄຳກ່າວຂອງທ່ານ ສີຈິ້ນຜິງ.

ຜູ້ນຳຈີນກ່າວວ່າ: ທັງ 2 ປະເທດສາມາດເຈລະຈາກັນຕໍ່ໄປ ເພື່ອສົ່ງເສີມການປະສານງານ ແລະ ການຮ່ວມມືໃນບັນຫາຕ່າງໆເຊັ່ນ:​ ການປ່ຽນແປງສະພາບອາກາດ, ໂຄວິດ ແລະ ບັນຫາລະດັບໂລກອື່ນໆ.

ການສົນທະນາທາງໂທລະສັບໃນຄັ້ງນີ້ເປັນຄັ້ງທີ 2 ນັບແຕ່ທ່ານ ໄບເດນ ເຂົ້າຮັບຕຳແໜ່ງປະທານາທິບໍດີອາເມລິກາ ໂດຍຜົນໄດ້ຮັບຂອງການສົນທະນາຄັ້ງທຳອິດເມື່ອປະມານ 7 ເດືອນກ່ອນບໍ່ໜ້າພໍໃຈປານໃດ ໂດຍຝ່າຍບໍລິຫານຂອງທ່ານ ໄບເດນ ບໍ່ພໍໃຈຕໍ່ການມີສ່ວນຮ່ວມໃນລະດັບຄະນະເຮັດວຽກຂອງຈີນ.

ເຈົ້າໜ້າທີ່ອາວຸໂສກ່າວກັບນັກຂ່າວວ່າ: ການມີສ່ວນຮ່ວມໃນລະດັບຜູ້ນຳເປັນສິ່ງທີ່ຈຳເປັນໃນການຂັບເຄື່ອນການພົວພັນໄປທາງໜ້າ ເມື່ອພິຈາລະນາຈາກອຳນາດແບບລວມສູນຂອງທ່ານ ສີຈິ້ນຜິງ ແລະ ລະບຸວ່າ: ເປົ້າໝາຍໂດຍລວມຂອງການສົນທະນາທາງໂທລະສັບໃນຄັ້ງນີ້ຄືການບັນລຸສະຖານະການທີ່ໝັ້ນຄົງລະຫວ່າງ ອາເມລິກາ ແລະ ຈີນ, ແຕ່ຂະນະດຽວກັນ ກໍຍອມຮັບວ່າເລື່ອງດັ່ງກ່າວເປັນເລື່ອງຍາກ ເນື່ອງຈາກທ່ານ ໄບເດນ ໄດ້ຕີກອບການແຂ່ງຂັນລະຫວ່າງ ອາເມລິກາກັບຈີນ ໃນໄລຍະຜ່ານມາ ເປັນການຕໍ່ສູ້ລະຫວ່າງປະຊາທິປະໄຕກັບລະບອບຜະເດັດການ.

ອ້າງອີງ:

https://edition.cnn.com/2021/09/09/politics/biden-xi-jinping-china-call/index.html