ມາຣ໌ກ ຊັກເຄີເບິກ ເປີດຕົວແວ່ນຕາອັດສະລິຍະ `Ray-Ban Stories` ຖ່າຍຮູບ-ຟັງເພງ-ຮັບໂທລະສັບ ລາຄາເລີ່ມຕົ້ນ 299 ໂດລາ
Facebook ເຄືອຂ່າຍສັງຄົມອອນລາຍຊັ້ນນຳຈາກອາເມລິກາ ເປີດຕົວ “ແວ່ນຕາອັດສະລິຍະ” ລຸ້ນທຳອິດຂອງບໍລິສັດໃນວັນທີ 9 ກັນຍານີ້ ຖືເປັນອີກໜຶ່ງຄວາມກ້າວໜ້າຄັ້ງສຳຄັນຂອງ Facebook ທີ່ມີເປົ້າໝາຍໃນການພັດທະນາແວ່ນຕາເຕັກໂນໂລຊີ Augmented Reality (AR) ສຳລັບອະນາຄົດ.
ລາຍງານລະບຸວ່າ: ແວ່ນຕາອັດສະລິຍະລຸ້ນທຳອິດຂອງ Facebook ຫລື Ray-Ban Stories ນີ້ ເປັນການຮ່ວມມືກັບ EssilorLuxottica ບໍລິສັດຜູ້ຜະລິດແວ່ນຕາຍີ່ຫໍ້ຊັ້ນນຳຄື Ray-Ban ໂດຍແວ່ນຕາອັດສະລິຍະນີ້ຈະຊ່ວຍໃຫ້ຜູ້ໃຊ້ສາມາດຟັງເພງ, ຮັບໂທລະສັບ ຫລື ຖ່າຍຮູບ ແລະ ວິດີໂອສັ້ນໆ ລວມທັງໂພສລົງໃນເຄືອຂ່າຍສື່ສັງຄົມອອນລາຍຂອງ Facebook ໄດ້ທັນທີ ລາຄາເລີ່ມຕົ້ນອັນລະ 299 ໂດລາສະຫະລັດ.
ແວ່ນຕາຂອງ Facebook ມາໃນຮູບແບບແວ່ນຕາລຸ້ນຍອດນິຍົມຂອງ Ray-Ban ຈຳນວນ 3 ລຸ້ນ ໄດ້ແກ່ລຸ້ນ Wayfarer, Round ແລະ Meteor ທີ່ເປີດໃຫ້ລູກຄ້າສາມາດປັບແຕ່ງແວ່ນຕາໄດ້ດ້ວຍການເລືອກສີ ແລະ ເລນປະເພດຕ່າງໆ.
Ray-Ban Stories ເລີ່ມວາງຈຳໜ່າຍຢູ່ຮ້ານ Ray-Ban ແລະ ຢູ່ Ray-Ban.com ໃນອາເມລິກາ, ອັງກິດ, ອິຕາລີ, ອົດສະຕຣາລີ, ໄອແລນ ແລະ ການາດາ. ອຸປະກອນດັ່ງກ່າວຈະເປີດຕົວຜ່ານຮ້ານຄ້າຍ່ອຍອື່ນໆ ເຊິ່ງລວມທັງ Amazon, Best Buy, Sunglass Hut ແລະ LensCrafters ນຳອີກ.
ປີຜ່ານມາ, ເຖິງວ່າ Facebook ຈະມີລາຍໄດ້ສ່ວນຫລາຍມາຈາກຍອດໂຄສະນາໃນແພລຟອມ ຄືປະມານ 86.000 ລ້ານໂດລາ ໃນປີ 2020, ແຕ່ລາຍໄດ້ເກືອບທັງໝົດຂອງ Facebook ເອົາໄປທຸ້ມລົງທຶນໃນການຄິດຄົ້ນພັດທະນາເຕັກໂນໂລຊີຄືຄວາມຈິງ ຫລື Virtual Reality (VR) ແລະ ເຕັກໂນໂລຊີຄືຄວາມຈິງ (AR) ຄືການພັດທະນາອຸປະກອນແວ່ນຕາຄວາມຕົວຈິງ Oculus VR ແລະ ການຄິດຄົ້ນເຕັກໂນໂລຊີສາຍແຂນ ເພື່ອຮອງຮັບການເຮັດວຽກຂອງແວ່ນຕາ AR ອີກທາງໜຶ່ງນຳອີກ.
ມາຣ໌ກ ຊັກເຄີເບິກ ປະທານເຈົ້າໜ້າທີ່ບໍລິຫານ ແລະ ຜູ້ສ້າງຕັ້ງ Facebook ກ່າວຜ່ານເພລຂອງລາວໃນ Facebook ວ່າ: ແວ່ນຕາອັດສະລິຍະນີ້ຈະເປັນສ່ວນສຳຄັນຂອງການສ້າງແພກຟອມຄອມພິວເຕີໃນອະນາຄົດ. ຂະນະທີ່ກ່ອນໜ້ານີ້ໃນປີກາຍ, ຫົວໜ້າທີມນັກວິທະຍາສາດ Facebook ໄດ້ອອກມາປະເມີນວ່າ: ພາຍໃນ 5-10 ປີຕໍ່ໜ້າ Facebook ອາດຈະສາມາດພັດທະນາແວ່ນຕາອັດສະລິຍະ AR ອອກມາວາງຈຳໜາຍໃນທາງການຄ້າໄດ້.
ຂະນະດຽວກັນ, ຊັກເຄີເບິກ ຍັງໃຊ້ໂອກາດນີ້ຢືນຢັນຄວາມປອດໄພ ແລະ ຄວາມເປັນສ່ວນຕົວຂອງຂໍ້ມູນຜູ້ໃຊ້ແວ່ນຕາໃນລະດັບສູງສຸດ ໂດຍລະບຸວ່າ: Facebook ຈະບໍ່ລຸກລ້ຳເຂົ້າເຖິງຂໍ້ມູນຂອງຜູ້ໃຊ້ແວ່ນຕາຖ້າບໍ່ໄດ້ຮັບອະນຸຍາດ ແລະ ຮູບພາບ ຫລື ວິດີໂອທີ່ຖ່າຍຜ່ານແວ່ນຕາອັດສະລິຍະນີ້ຈະຈັດເກັບໄວ້ໃນແອັບພລິເຄຊັນ Facebook View ເຊິ່ງຈະບໍ່ມີໂຄສະນາມາລົບກວນ.
ສ່ວນການຖ່າຍຮູບ ແລະ ວິດີໂອຜ່ານແວ່ນຕາ Ray-Ban Stories ຈະໃຊ້ລະບົບຜູ້ຊ່ວຍຄືຕົວຈິງມາຮັບຄຳສັ່ງຖ່າຍຮູບດ້ວຍສຽງຂອງຜູ້ໃຊ້ ແລະ ມີແສງໄຟ LED ສະແດງເທິງແວ່ນຕາ ເພື່ອໃຫ້ຄົນອື່ນໆເຫັນວ່າຜູ້ໃຊ້ແວ່ນຕາກຳລັງບັນທຶກພາບ ຫລື ວິດີໂອຢູ່.
ຂະນະດຽວກັນ Facebook ຍັງໄດ້ເຮັດຄູ່ມືແນະນຳໃຫ້ຜູ້ໃຊ້ແວ່ນຕາມີສຳນຶກຮັບຜິດຊອບໃນການໃຊ້ອຸປະກອນນີ້ເຊັ່ນ: ຕ້ອງປິດກ້ອງບັນທຶກພາບໃນຫ້ອງນ້ຳສາທາລະນະ ແລະ ບໍ່ໃຊ້ແວ່ນຕານີ້ໃນເລື່ອງຜິດກົດໝາຍເຊັ່ນ: ການຄຸກຄາມຜູ້ອື່ນ ຫລື ບັນທຶກພາບທີ່ມີຂໍ້ມູນເປັນຄວາມລັບຈຳພວກລະຫັດຕ່າງໆ.
ທັງນີ້ Facebook ບໍ່ແມ່ນບໍລິສັດເຕັກໂນໂລຊີຊັ້ນນຳລາຍທຳອິດທີ່ຫັນມາພັດທະນາ VR ແລະ AR ຢ່າງຈິງຈັງ ໂດຍ Amazon, Google, Microsoft, Apple ແລະ Snap ຕ່າງກໍລະດົມກຳລັງທັງບຸກຄະລາກອນ ແລະ ການເງິນໃນການພັດທະນາແວ່ນຕາອັດສະລິຍະ.
ແຕ່ແວ່ນຕາອັດສະລິຍະດັ່ງກ່າວເຊັ່ນ: Google Glass ພັດບໍ່ຄ່ອຍປະສົບຜົນສຳເລັດໃນດ້ານຍອດຂາຍ ເນື່ອງຈາກລາຄາຂ້ອນຂ້າງແພງ ແລະ ການອອກແບບ. ຂະນະທີ່ແວ່ນຕາອັດສະລິຍະຂອງ Snap ເຊິ່ງເປີດຕົວໃນປີຜ່ານມາ ບໍ່ໄດ້ມີໄວ້ຈັດຈຳໜ່າຍທົ່ວໄປ ແລະ ເປີດໃຫ້ໃຊ້ງານສະເພາະຜູ້ສາງ AR ເທົ່ານັ້ນ.
ອ້າງອີງ:
https://www.channelnewsasia.com/…/facebook-unveils-its…
https://www.cnbc.com/…/facebook-ray-ban-stories-smart…
https://www.usatoday.com/…/facebook-smart…/5771651001/
