ລາວ-ໄທເປີດນໍາໃຊ້ທາງລົດໄຟເຊື່ອມຕໍ່ໄລຍະ II
ສປປ ລາວ ແລະ ຣາຊາອານາຈັກໄທໄດ້ມອບຮັບ ແລະ ເປີດການນໍາໃຊ້ໂຄງການກໍ່ສ້າງທາງລົດໄຟເຊື່ອມຕໍ່ໄລຍະ II (ຕອນທີ1) ຢ່າງເປັນທາງການໃນວັນທີ 23 ມີນານີ້, ພາຍຫລັງດໍາເນີນການກໍ່ສ້າງມາແຕ່ປີ 2013 ແລະ ໄດ້ສໍາເລັດລົງໃນທ້າຍເດືອນກັນຍາ 2015 ຜ່ານມາ, ໂດຍແມ່ນບໍລິສັດເສີມສະຫງວນກໍ່ສ້າງ ຈໍາກັດຂອງໄທເປັນຜູ້ຮັບເໝົາກໍ່ສ້າງດ້ວຍມູນຄ່າ 656 ລ້ານກວ່າບາດ. ຂະນະທີ່ (ຕອນທີ2) ຄາດວ່າຈະໄດ້ເລີ່ມກໍ່ສ້າງໃນທ້າຍປີ 2017 ນີ້ ແລະ ຊຶ່ງຈະໃຫ້ສໍາເລັດໃນໄຕມາດໜຶ່ງຂອງປີ 2020, ໂດຍການໜ້າຂະຫຍາຍທາງລົດໄຟຈາກສະຖານີທ່ານາແລ້ງ ຫາ ສະຖານນີວຽງຈັນ ທີ່ຕັ້ງຢູ່ບ້ານຄໍາສະຫວາດ ຍາວ 7,5 ກິໂລແມັດ, ລວມມູນຄ່າການກໍ່ສ້າງ 994,7 ລ້ານບາດ. ເຊິ່ງໄດ້ຮັບທຶນສະໜັບສະໜູນຈາກອົງການ NEDA ເປັນເງິນຊ່ວຍເຫລືອລ້າ 30% ແລະ ເງິນກູ້ຢືມດອກເບ້ຍຕໍ່າ 70%.
ທ່ານ ສົມປອງ ພົນເສນາ ຫົວໜ້າກົມທາງລົດໄຟ ກ່າວວ່າ: ສະຖານີດັ່ງກ່າວ, ຕັ້ງຢູ່ເຂດບ້ານດົງໂພສີ, ເມືອງຫາດຊາຍຟອງ, ບ້ານນາຄວາຍໃຕ້ ແລະ ບ້ານຄໍາສະຫວາດ ເມືອງໄຊເສດຖາ ນະ ຄອນຫລວງວຽງຈັນ. ປັດຈຸບັນໂຄງການກໍ່ສ້າງທາງລົດໄຟເຊື່ອມຕໍ່ ລາວ-ໄທໄລຍະ II (ຕອນທີ 1) ໄດ້ສໍາເລັດ 4 ໜ້າວຽກ ຄື ກໍ່ສ້າງທາງລົດໄຟລະບົບລາງຫລີກ ຢູ່ສະຖານີທ່ານາແລ້ງ ລວມທັງຂະຫຍາຍລາງລົດໄຟເຖິງລານຕູ້ສິນຄ້າ 5.800 ແມັດ; ປັບປຸງຍົກລະດັບລະບົບສັນຍາຍໂທລະຄົມມະນາຄົມຢູ່ສະຖານີທ່ານາແລ້ງ ຈາກ Analog ມາເປັນ Digital ທີ່ຄວບຄຸມດ້ວຍລະບົບ Computer; ລະບົບລານຕູ້ສິນຄ້າລວມມີເນື້ອທີ່ 38 ພັນກວ່າຕາແມັດ ລວມທັງທາງເຂົ້າສູ່ CY ມີຄວາມຍາວທັງໝົດ 2.040 ແມັດ, ສາງເກັບມ້ຽນເຄື່ອງຂະໜາດ 68ມx78ມ ມີເນື້ອທີ່ທັງໝົດ 5 ພັນກວ່າຕາແມັດ, ອາຄານຫ້ອງການບໍລິການເປັນອາຄານ 3 ຊັ້ນ, ມີເນື້ອທີ່ 1.620 ຕາແມັດ, ປະຕູໂຂງທາງເຂົ້າເພື່ອຕິດຕັ້ງລະບົບຊັ່ງນໍ້າໜັກຂະໜາດ 20ມ x 30ມ, ສິ່ງອໍານວຍຄວາມສະດວກຕ່າງໆເຊັ່ນ: ລະບົບນໍ້າປະປາ, ໄຟຟ້າ, ລະ ບົບດັບເພິງພາຍໃນອາຄານ, ບ່ອນເກັບມ້ຽນຂີ້ເຫຍື້ອ ແລະ ສໍາເລັດວຽກກໍ່ສ້າງອາຄານຫ້ອງການກົມທາງລົດໄຟອາຄານ 2 ຊັ້ນ ມີເນື້ອທີ່ທັງໝົດ 3.700 ກວ່າຕາແມັດ, ເຮືອນພັກພະນັກງານ ແລະ ອື່ນໆ.
ພິທີດັ່ງກ່າວໄດ້ຈັດຂຶ້ນທີ່ສະຖານີທ່ານາແລ້ງ, ໂດຍມີທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ນົບພະດົນ ເທບພິທັກ ເອກອັກຄະຣາຊະທູດຜູ້ມີອໍານາດເຕັມແຫ່ງຣາຊະອານາຈັກໄທປະຈໍາລາວ, ມີຮອງເຈົ້າຄອງນະຄອນຫລວງວຽງຈັນ, ປະທານອົງການ NEDA ເຂົ້າຮ່ວມນໍາດ້ວຍ.
