ຕາລີບັນຕັ້ງລັດຖະບານຮັກສາການອັບການິດສະຖານຊຸດໃໝ່ ມີຜູ້ນຳກຸ່ມຕິດອາວຸດທີ່ FBI ຕ້ອງການຕົວ ແລະ ອະດີດນັກໂທດກວນຕານາໂມເປັນລັດຖະມົນຕີ-ເຈົ້າໜ້າທີ່ລະດັບສູງ
ວັນທີ 7 ກັນຍາ 2021, ກຸ່ມຕາລີບັນໄດ້ປະກາດຈັດຕັ້ງລັດຖະບານຮັກສາການຊຸດໃໝ່ຂອງອັບການິດສະຖານ ແລະ ເປີດລາຍຊື່ຄະນະລັດຖະບານ ເຊິ່ງເປັນຜູ້ຊາຍທັງໝົດ ປະກອບມີສະມາຊິກລະດັບສູງຂອງຕາລີບັນທີ່ຖືກຂວ້ຳບາດຈາກສະຫະປະຊາຊາດ ແລະ ຜູ້ນຳກອງກຳລັງຕິດອາວຸດທີ່ສຳນັກງານສອບສວນກາງອາເມລິກາ ຫລື FBI ຕັ້ງຄ່າຫົວໄວ້ສູງເຖິງ 10 ລ້ານໂດລາ.
ໂດຍທ່ານ ຊາບິຮຸລເລາະ ມູຈາຮິດ ຫົວໜ້າໂຄສົກກຸ່ມຕາລີບັນ ເປີດເຜີຍວ່າ: ຕຳແໜ່ງຮັກສາການນາຍົກລັດຖະມົນຕີຕົກເປັນຂອງທ່ານ ມຸລເລາະ ໂມຮຳໝັດ ຮາຊານ ອັກຮຸນ ໜຶ່ງໃນສະມາຊິກລຸ້ນບຸກເບິກທີ່ຖືກຂວ້ຳບາດຈາກສະຫະປະຊາຊາດ (UN) ແລະ ເປັນຜູ້ຊ່ວຍຄົນສະໜິດຂອງທ່ານ ໂມຮຳໝັດ ໂອມາ ຜູ້ສ້າງຕັ້ງກຸ່ມຕາລີບັນທີ່ເສຍຊີວິດໄປແລ້ວ.
ຂະນະທີ່ທ່ານ ອັບດຸລ ການີ ບາຣາດາ ໜຶ່ງໃນຜູ້ຮ່ວມສ້າງຕັ້ງຕາລີບັນ ແລະ ຜູ້ນຳການເຈລະຈາສັນຕິພາບກັບອາເມລິກາ ໄດ້ຮັບຕຳແໜ່ງຮັກສາການຮອງນາຍົກລັດຖະມົນຕີ, ສ່ວນທ່ານ ໂມຮຳເໝັດ ຢາຄູບ ລູກຊາຍຂອງທ່ານ ໂອມາ ຮັບຕຳແໜ່ງຮັກສາການລັດຖະມົນຕີປ້ອງກັນປະເທດ.
ທັງນີ້, ຕາລີບັນຍັງໄດ້ເລືອກສະມາຊິກສາຍແຂງຫລາຍຄົນເຂົ້າຮັບຕຳແໜ່ງລັດຖະມົນຕີ ແລະ ເຈົ້າໜ້າທີ່ລະດັບສູງ ໂດຍທ່ານ ຊິຣາຢຸດດິນ ຮັກການີ ຜູ້ນຳເຄື່ອຂ່າຍກຸ່ມຕິດອາວຸດຮັກການີ ແລະ ໜຶ່ງໃນຮອງຜູ້ນຳຂອງຕາລີບັນທີ່ຖືກ FBI ຂຶ້ນບັນຊີບຸກຄົນທີ່ອາເມລິກາຕ້ອງການຕົວຫລາຍທີ່ສຸດ ແລະ ຖືກຕັ້ງຄ່າຫົວ 10 ລ້ານໂດລາ ໄດ້ຮັບຕຳແໜ່ງຮັກສາການລັດຖະມົນຕີປ້ອງກັນຄວາມສະຫງົບ ໂດຍທ່ານເປັນຜູ້ຕ້ອງສົງໄສກ່ຽວຂ້ອງກັບເຫດໂຈມຕີໂຮງແຮມໃນນະຄອນຫລວງຄາບູລເມື່ອປີ 2008 ທີ່ເຮັດໃຫ້ມີຜູ້ເສຍຊີວິດ 6 ຄົນ ລວມພົນລະເຮືອນອາເມລິກາ.
ຂະນະທີ່ທ່ານ ຄາລິລ ຮັກການີ ລຸງຂອງທ່ານ ຊິຣາຢຸດດິນ ເຊິ່ງມີການພົວພັນກັບກຸ່ມກໍ່ການຮ້າຍອັລກໍອິດະ ຫລື ຖືກ FBI ຕັ້ງຄ່າຫົວ 5 ລ້ານໂດລາ ໄດ້ຮັບຕຳແໜ່ງຮັກສາການລັດຖະມົນຕີກະຊວງຜູ້ລີ້ໄພ ແລະ ການສົ່ງກັບປະເທດ.
ນອກຈາກນີ້ ຍັງມີສະມາຊິກເຄືອຂ່າຍຮັກການີອີກ 2 ຄົນ ໄດ້ຮັບຕຳແໜ່ງໃນລັດຖະບານຊຸດໃໝ່ ລວມທັງສະມາຊິກຕາລີບັນ 4 ຄົນທີ່ເຄີຍຮັບໂທດຕິດຄຸກໃນຄຸກກວນຕານາໂມ ແຕ່ໄດ້ຮັບການປ່ອຍຕົວຕາມຂໍ້ຕົກລົງແລກປ່ຽນນັກໂທດໃນປີ 2014 ເຊິ່ງໄດ້ຮັບຕຳແໜ່ງເຈົ້າໜ້າທີ່ລະດັບສູງ.
ທັງນີ້ ບໍ່ປາກົດມີລາຍຊື່ຜູ້ຍິງໄດ້ຮັບຕຳແໜງສຳຄັນໃດໆໃນລັດຖະບານຊຸດໃໝ່ ເຊິ່ງເປັນໄປຕາມທີ່ໂຄສົກຕາລີບັນລະບຸໄວ້ກ່ອນໜ້ານີ້. ຂະນະທີ່ການປະກາດຕັ້ງລັດຖະບານຮັກສາການຖືເປັນຂັ້ນຕອນສຳຄັນກ່ອນການຈັດຕັ້ງລັດຖະບານຖາວອນຂອງຕາລີບັນ ເຊິ່ງຄາດວ່າຈະຜະເຊີນຄວາມທ້າທາຍ ແລະ ຄວາມຍາກລຳບາກ ທັງການຮັກສາສະຖຽນລະພາບທາງເສດຖະກິດຂອງປະເທດ ແລະ ການເຮັດໃຫ້ນາໆຊາດໃຫ້ການຍອມຮັບ.
ທ່ານ ໄຮບາຕຸລເລາະ ອັກຮຸນຊາດາ ຜູ້ນຳສູງສຸດຂອງຕາລີບັນ ເຊິ່ງບໍ່ເຄີຍປາກົດຕົວຕໍ່ສາທາລະນະ ໄດ້ອອກຖະແຫລງການສະບັບທຳອິດເປັນພາສາອັງກິດ ຢືນຢັນວ່າ: ລັດຖະບານໃໝ່ຂອງອັບການິດສະຖານຈະຢຶດຫລັກກົດໝາຍຊາຣີອະ ຫລື ກົດໝາຍອິສລາມ ພ້ອມທັງເນັ້ນທ່າທີຂອງຕາລີບັນທີ່ຕ້ອງການສ້າງການພົວພັນທີ່ແໜ້ນແຟ້ນກັບປະເທດເພື່ອນບ້ານ ແລະ ປະເທດຕ່າງໆ, ແຕ່ຕ້ອງຢູ່ບົນພື້ນຖານຂອງການມີປະຕິສຳພັນ ແລະ ການເຄົາລົບເຊິ່ງກັນ ແລະ ກັນ ແລະ ມີຂໍ້ແມ້ວ່າກຸ່ມຕາລີບັນຈະເຄົາລົບກົດໝາຍ ແລະ ສົນທິສັນຍາລະຫວ່າງປະເທດ “ທີ່ບໍ່ຂັດຕໍ່ກົດໝາຍອິສລາມ ແລະ ຄ່ານິຍົມຂອງປະເທດ”.
“ໃນອະນາຄົດ ທຸກເລື່ອງຂອງການປົກຄອງ ແລະ ຊີວິດໃນອັບການິດສະຖານຈະຖືກຄວບຄຸມໂດຍກົດໝາຍຊາຣີອະອັນສັກສິດ” ຖະແຫລງການລະບຸ.
ອ້າງອີງ:
https://www.bbc.com/news/world-asia-58479750
https://www.reuters.com/…/taliban-fire-air-scatter…/
https://edition.cnn.com/…/taliban-government…/index.html
