ປະກອບຄຳເຫັນໃສ່ຮ່າງຄຳແນະນຳວ່າດ້ວຍການຄຸ້ມຄອງຊຸກຍູ້, ອຳນວຍຄວາມສະດວກທຸລະກິດນຳເຂົ້າສິນຄ້າ

ໃນວັນທີ 3 ກັນຍາ 2021 ຜ່ານມາ, ທີ່ຫ້ອງປະຊຸມຊັ້ນ4 ກະຊວງການເງິນ, ໄດ້ມີກອງປະຊຸມປະກອບຄຳເຫັນໃສ່ຮ່າງຄຳແນະນຳວ່າດ້ວຍການຄຸ້ມຄອງ, ຊຸກຍູ້ສົ່ງເສີມ, ອໍານວຍຄວາມສະດວກດ້ານພາສີ-ອາກອນຕໍ່ຫົວໜ່ວຍທຸລະກິດນໍາເຂົ້າສິນຄ້າ, ເຄື່ອງຂອງເພື່ອຈໍາໜ່າຍພາຍໃນປະເທດ, ໂດຍການເປັນປະທານຂອງ ປອ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ມີຜູ້ອຳນວຍການບໍລິສັດຊີເອສຊີ (CSC), ບໍລິສັດໂຕໂຍຕ້າລາວ, ບໍລິສັດ ສຸວັນນີການຄ້າ, ບໍລິສັດ ສະບາຍດີວຽງຈັນ ແລະ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ອີງຕາມກົດໝາຍວ່າດ້ວຍການຄຸ້ມຄອງສ່ວຍສາອາກອນ ສະບັບເລກທີ 66/ສພຊ, ລົງວັນທີ 17 ມິຖຸນາ 2019 ມາດຕາ 32 ສະບັບປັບປຸງ, ອີງຕາມກົດໝາຍວ່າດ້ວຍພາສີ ສະບັບປັບປຸງ ເລກທີ 81/ສພຊ, ລົງວັນທີ 29 ມິຖຸນາ 2020, ເພື່ອສ້າງເງື່ອນໄຂອໍານວຍຄວາມສະດວກທາງດ້ານການຄ້າ ແລະ ການລົງທຶນ, ຊຸກຍູ້ສົ່ງເສີມຫົວຫນ່ວຍທຸລະກິດນໍາເຂົ້າສິນຄ້າ, ເຄື່ອງຂອງໃນການເຄື່ອນໄຫວທຸລະກິດໃຫ້ຖືກຕ້ອງຕາມກົດໝາຍ ແລະ ນິຕິກໍາໃຕ້ກົດໝາຍ.

ໃນນັ້ນບັນດາຫົວໜ່ວຍທຸລະກິດທີ່ມີເງື່ອນໄຂ ແລະ ມີມາດຖານຈະໄດ້ຮັບການອຳນວຍຄວາມສະດວກ ເປັນຕົ້ນ: ໄດ້ຮັບການອໍານວຍຄວາມສະດວກຈາກລັດຖະການພາສີໃນການດໍາເນີນການກວດກາຮັບຮອງເອກະສານລ່ວງໜ້າຕາມລະບຽບການທາງພາສີ; ໄດ້ຮັບການອໍານວຍຄວາມສະດວກຈາກລັດຖະການພາສີໃນການດໍາເນີນລະ ບຽບການທາງພາສີເຊັ່ນ: ການກວດກາຂໍ້ມູນ, ເອກະສານແຈ້ງພາສີ, ການກວດກາສິນຄ້າ, ເຄື່ອງຂອງຕົວຈິງຢູ່ດ່ານພາສີສາກົນບ່ອນນໍາເຂົ້າ ຕາມການບໍລິຫານຄວາມສ່ຽງ (ລະດັບຕໍ່າ) ສ່ວນການກວດກາສິນຄ້າລົງສາງປາຍທາງແມ່ນໃຫ້ປະຕິບັດຕາມການບໍລິຫານຄວາມສ່ຽງຂອງລັດຖະການສ່ວຍສາອາກອນ; ໄດ້ຮັບການອໍານວຍຄວາມສະດວກຈາກລັດຖະການພາສີ ແລະ ສ່ວຍສາອາກອນໃນການບໍລິການນອກໂມງລັດຖະການກໍລະນີນີ້ມີຄວາມຈໍາເປັນຮີບດ່ວນດ້ວຍການແຈ້ງຂໍ້ມູນການນໍາເຂົ້າລ່ວງຫນ້າ; ໄດ້ຮັບການອໍານວຍຄວາມສະດວກຈາກລັດຖະການພາສີ ແລະ ສ່ວຍສາອາກອນໃນການແຈ້ງ-ມອບອາກອນຊົມໃຊ້ ແລະ ອາກອນມູນຄ່າເພີ່ມຜ່ານລະບົບ TaxRIS ໃນເວລາມີການຈໍາໜ່າຍສິນຄ້າ, ເຄື່ອງຂອງພາຍໃນປະເທດ ຕາມກົດໝາຍ, ລະບຽບການ ແລະ ສາມາດສະເໜີເປັນຜູ້ປະກອບການມາດຕະຖານ ເອອີໂອ (Authorized Economic Operator) ຕາມລະບຽບການທີ່ວາງໄວ້.

ໂອກາດດັ່ງກ່າວ, ທ່ານ ຮອງລັດຖະມົນຕີກະຊວງການເງິນ ກໍໄດ້ປະກອບຄຳຄິດເຫັນ ແລະໃຫ້ບັນດາພາກສ່ວນທີ່ເຂົ້າຮ່ວມກອງປະຊຸມປະກອບຄຳຄິດເຫັນຢ່າງກົງໄປກົງມາ, ເພື່ອກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງຫົວໜ່ວຍທຸລະກິດນໍາເຂົ້າສິນຄ້າ, ເຄື່ອງຂອງຜ່ານດ່ານຊາຍແດນເພື່ອອໍານວຍຄວາມສະດວກດ້ານພາສີ, ການຄ້າ, ການລົງທຶນ, ແນໃສ່ສ້າງສິ່ງອໍານວຍຄວາມສະດວກ, ເພີ່ມຂີດຄວາມສາມາດໃນການແຂ່ງຂັນຂອງຫົວໜ່ວຍທຸລະກິດພາຍໃນປະເທດ ໃຫ້ຖືກຕ້ອງຕາມກົດໝາຍ ແລະ ລະບຽບການ.