ເດືອນ ສິງຫາ 2021 ສປປ ລາວ ຂາດດຸນການຄ້າ 24 ລ້ານໂດລາສະຫະລັດ
ກະຊວງອຸດສາຫະກຳ ແລະ ການຄ້າ ໄດ້ລາຍງານມູນຄ່າການນຳເຂົ້າ ແລະ ສົ່ງອອກ ຂອງ ສປປ ລາວ ປະຈຳເດືອນສິງຫາ 2021 ເຊິ່ງມີມູນຄ່າການນໍາເຂົ້າ ແລະ ສົ່ງອອກ ບັນລຸໄດ້ປະມານ 880 ລ້ານໂດລາສະຫະລັດ. ໃນນັ້ນ, ມູນຄ່າການສົ່ງອອກ ມີປະມານ 428 ລ້ານໂດລາສະຫະລັດ, ມູນຄ່າການນໍາເຂົ້າ ມີປະມານ 452 ລ້ານໂດລາສະຫະລັດ ແລະ ຂາດດຸນການຄ້າປະມານ 24 ລ້ານໂດລາສະຫາລັດ.
ສິນຄ້າສົ່ງອອກຫລັກປະກອບມີ ແຮ່ທອງ, ທອງແດງ ແລະ ເຄື່ອງທີ່ເຮັດດ້ວຍທອງແດງ, ກ້ວຍ, ຄຳປະສົມ (ຄຳແທ່ງ), ເຄື່ອງນຸ່ງຫົ່ມ, ກາເຟ (ບໍ່ທັນໄດ້ປຸງແຕ່ງ), ນ້ຳຕານ, ຢາງພາລາ, ໝາກໄມ້ (ໝາກໂມ, ໝາກນອດ, ໝາກຂາມ) ແລະ ຢາສູບ.
ສ່ວນໝວດສິນຄ້ານໍາເຂົ້າຫລັກປະກອບມີພາຫະນະທາງບົກ (ນອກຈາກລົດຈັກ, ລົດໄຖ), ເຄື່ອງໄຟຟ້າ ແລະ ອຸປະກອນໄຟຟ້າ, ນ້ຳມັນກາຊວນ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ເຫລັກ ແລະ ເຄື່ອງທີ່ເຮັດດ້ວຍເຫລັກ, ເຫລັກກ້າ, ນ້ຳມັນແອັດຊັງ, ແອັດຊັງພິເສດ, ເຄື່ອງໃຊ້ທີ່ເຮັດດ້ວຍພລາສະຕິກ, ແກ້ວປະເສີດ ຫລື ເຄິ່ງປະເສີດ, ຜະລິດຕະພັນທາງເຄມີ ແລະ ສິ່ງເສດເຫລືອ ຈາກອຸດສາຫະກຳຜະລິດອາຫານ.
ສຳລັບບັນດາປະເທດທີ່ ສປປ ລາວ ສົ່ງອອກຫລັກ ແມ່ນ ສປ ຈີນ ມີມູນຄ່າປະມານ 184 ລ້ານໂດລາສະຫະລັດ, ຫວຽດນາມ 90 ລ້ານໂດລາສະຫະລັດ, ໄທ 49 ລ້ານໂດລາສະຫະລັດ, ເຢຍລະມັນ 7 ລ້ານໂດລາສະຫະລັດ ແລະ ສ ອາເມລິກາ 7 ລ້ານໂດລາສະຫະລັດ.
ສ່ວນປະເທດທີ່ນໍາເຂົ້າຫລັກ ແມ່ນປະເທດໄທ ມີມູນຄ່າປະມານ 249 ລ້ານໂດລາສະຫະລັດ, ສປ ຈີນ 100 ລ້ານໂດລາສະຫະລັດ, ຫວຽດນາມ 46 ລ້ານໂດລາສະຫະລັດ, ຢີ່ປຸ່ນ 5 ລ້ານໂດລາສະຫະລັດ ແລະ ສ ອາເມລິກາ 22 ລ້ານໂດລາສະຫະລັດ.
ມູນຄ່າການນໍາເຂົ້າ ແລະ ສົ່ງອອກ ຂອງ ສປປ ລາວ ປະຈໍາເດືອນສິງຫາ 2021 ແມ່ນຍັງບໍ່ກວມເອົາມູນຄ່າການສົ່ງອອກໄຟຟ້າ.
