ຈູດຂີ້ເຫຍື້ອໃນຕົວເມືອງບັນຫາອັນຕະລາຍ
ການຫ້າມຈູດຂີ້ເຫຍື້ອໃນຕົວເມືອງໃນໄລຍະຜ່ານມາ ເຖິງວ່າຈະມີລະບຽບການສັ່ງຫ້າມຂອງອຳນາດການປົກຄອງ ແລະ ຂະແໜງການກ່ຽວຂ້ອງຕ່າງໆມາຫລາຍແລ້ວ, ແຕ່ປາກົດການຫຍໍ້ທໍ້ດັ່ງກ່າວຍັງປາກົດມີໃຫ້ເຫັນນັບທັງຢູ່ຄຸ້ມບ້ານຊານເມືອງ ແລະ ສຳນັກງານອົງການ, ໂຮງຮຽນ, ໂຮງໝໍ ກໍຄືວັດວາອາຮາມຕ່າງໆ ເຊິ່ງການປະພຶດ ດັ່ງກ່າວນອກຈາກຈະມີຄວາມສ່ຽງກໍ່ໃຫ້ເກີດອັກຄີໄພແລ້ວ, ຄວັນຂີ້ເຫຍື້ອດັ່ງກ່າວຍັງສົ່ງຜົນກະທົບຕໍ່ສິ່ງແວດລ້ອມ ແລະ ສຸຂະພາບຂອງປະຊາຊົນຜູ້ຢູ່ໃກ້ຄຽງນຳອີກ ເຊິ່ງບັນຫານີ້ແມ່ນເກີດມາຈາກຄວາມຂີ້ຄ້ານມັກງ່າຍຂອງຄົນຈຳນວນໜຶ່ງ ແລະ ບັນຫາໜຶ່ງອີກກໍມາຈາກລົດເກັບມ້ຽນຂີ້ເຫຍື້ອໃນຕົວເມືອງທີ່ໄດ້ມີສັນຍາສະເພາະກັບແຕ່ລະຄອບຄົວດ້ວຍລະບຸເປັນເຂັ້ງຂີ້ເຫຍື້ອ, ຖ້າກາຍຈຳນວນທີ່ໄດ້ຕົກລົງກັນແລ້ວແມ່ນເພິ່ນຈະບໍ່ເກັບເອົາຂີ້ເຫຍື້ອ ດັ່ງກ່າວ, ເມື່ອເປັນແນວນັ້ນ ຜູ້ເປັນເຈົ້າຂອງກໍຕ້ອງຫາວິທີກຳຈັດດ້ວຍການຈູດເຜົາ ຫລື ບໍ່ກໍຕ້ອງມີວິທີລັກລອບຖິ້ມຂີ້ເຫຍື້ອໃນຈຸດດິນເປົ່າຫວ່າງຫ່າງໄກສາຍຕາມວນຊົນ ແລະ ອື່ນໆ.
ຕໍ່ສະພາບດັ່ງກ່າວ ຈຶ່ງເຮັດໃຫ້ຂໍ້ຫ້າມຈູດຂີ້ເຫຍື້ອໃນຕົວເມືອງຍັງບໍ່ເປັນຜົນດີເທົ່າທີ່ຄວນ ແລະ ເພື່ອຢາກແກ້ໄຂບັນຫານີ້ ເບື້ອງອຳນາດການປົກຄອງບ້ານກໍຈະຕ້ອງໄດ້ເຮັດວຽກງານສຶກສາອົບຮົມ ເພື່ອປູກຈິດສຳນຶກໃຫ້ເຂົາເຈົ້າໃນການກຳຈັດຂີ້ເຫຍື້ອທີ່ປອດໄພ, ພ້ອມນັ້ນ ຜູ້ເຮັດໜ້າທີ່ຮັກສາຄວາມສະອາດຮັບເໝົາເກັບມ້ຽນຂີ້ເຫຍື້ອໃນຕົວເມືອງກໍຕ້ອງມີນະໂຍບາຍໃດໜຶ່ງເພື່ອຊ່ວຍກັນແກ້ໄຂ, ຖ້າບ່ອນໃດບ້ານໃດຫາກມີຂີ້ເຫຍື້ອອັ່ງອໍຫລາຍ. ທັງໝົດນີ້ກໍເພື່ອຄວາມສະອາດຈົບງາມຂອງຕົວເມືອງເຮັດໃຫ້ການປະຕິບັດຄຳຂວັນ ສ.ສະອາດ ປາກົດຜົນເປັນຈິງຫລາຍຂຶ້ນ.
