ລັດຖະບານ ເຫັນດີທົດລອງຈັດຕັ້ງປະຕິບັດການຫັນໄປສູ່ການກຸ້ມຕົນເອງດ້ານງົບປະມານ ຂອງ 5 ຫົວໜ່ວຍງົບປະມານ
ໃນກອງປະຊຸມລັດຖະບານ ສະໄໝສາມັນ ປະຈຳເດືອນສິງຫາ ປີ 2021 ທີ່ຈັດຂຶ້ນໃນວັນທີ 23-24 ສິງຫາ 2021 ຜ່ານມາ, ລັດຖະບານ ໄດ້ເຫັນດີຮັບຮອງເອົາບົດລາຍງານ ແລະ ການທົດລອງຈັດຕັ້ງປະຕິບັດ ການຫັນໄປສູ່ການກຸ້ມຕົນເອງດ້ານງົບປະມານ ຂອງ 5 ຫົວໜ່ວຍງົບປະມານ ໃນໄລຍະ 3 ປີ ເຊິ່ງປະກອບດ້ວຍ: ໂຮງໝໍມິດຕະພາບ 150 ຕຽງ ລວມທັງຕຶກທີ່ໄດ້ກໍ່ສ້າງໃໝ່, ໂຮງໝໍມະໂຫສົດ ລວມທັງຕຶກໃໝ່ທີ່ກຳລັງກໍ່ສ້າງ, ໂຮງໝໍເຊດຖາທິລາດ, ມະຫາວິທະຍາໄລແຫ່ງຊາດ ແລະ ວິທະຍາໄລ ເຕັກນິກປາກປ່າສັກ.
ສໍາລັບຕຶກສ້າງໃໝ່ຂອງໂຮງໝໍ 150 ຕຽງ ໂດຍນໍາໃຊ້ເງິນກູ້ຢືມຈາກຕ່າງປະເທດນັ້ນ, ພາກລັດເປັນຜູ້ດຳເນີນບໍລິການເອງ ການຮ່ວມມືກັບພາກເອກະຊົນ ແມ່ນໃຫ້ສືບຕໍ່ສົ່ງເສີມຕາມນະໂຍບາຍທີ່ລັດເຄີຍປະຕິບັດ ໃນພາກປະຕິບັດຕົວຈິງຜ່ານມາ.
ການຫັນໄປສູ່ກຸ້ມຕົນເອງດ້ານງົບປະມານ ຂອງຫົວໜ່ວຍງົບປະມານ ໂດຍມອບໃຫ້ກະຊວງການເງິນ ເປັນໃຈກາງສົມທົບກັບບັນດາຂະແໜງການກ່ຽວຂ້ອງ ສືບຕໍ່ຊຸກຍູ້, ຕິດຕາມ, ກວດກາການຈັດຕັ້ງປະຕິບັດ ໃຫ້ມີປະສິດທິຜົນ, ມີຄວາມຍືນຍົງ ເພື່ອເປັນຕົວແບບທີ່ດີ.
ນອກຈາກນັ້ນ, ສະເໜີໃຫ້ປັບປຸງຄືນນິຕິກຳທີ່ຈໍາເປັນເພື່ອຄຸ້ມຄອງ ແລະ ສົ່ງເສີມການຫັນໄປສູ່ການກຸ້ມຕົນເອງດ້ານງົບປະມານ ຂອງບັນດາຫົວໜ່ວຍວິຊາການອື່ນໆ ທັງຢູ່ຂັ້ນສູນກາງ ແລະ ທ້ອງຖິ່ນບ່ອນທີ່ມີເງື່ອນໄຂ. ພ້ອມນີ້ ກໍໄດ້ມອບໃຫ້ກະຊວງພາຍໃນ ສຶກສາຄົ້ນຄວ້າໂຄງປະກອບການຈັດຕັ້ງ ແລະ ບຸກຄະລາກອນ ໃນວຽກງານດັ່ງກ່າວຕື່ມອີກ.
