ຫລາຍບໍລິສັດຂອງຈີນໄດ້ເລີ່ມຢຸດຕິການປູກກ້ວຍຢູ່ເມືອງຕົ້ນເຜິ້ງແລ້ວ ພາຍຫລັງມີຄຳສັ່ງຂອງລັດຖະບານລາວ

     ພາຍຫລັງເຫັນວ່າການເຂົ້າມາລົງທຶນປູກກ້ວຍຂອງບັນດາບໍລິສັດຕ່າງໆຈາກ ສປ ຈີນ ໄດ້ສົ່ງຜົນກະທົບບໍ່ດີຕໍ່ສະພາບແວດລ້ອມ ແລະ ສັງຄົມຈາກສານເຄມີທີ່ນຳໃຊ້ເຂົ້າໃນການປູກກ້ວຍດັ່ງກ່າວ ເຊິ່ງສ່ວນຫລາຍແມ່ນຢູ່ບັນດາແຂວງພາກເໜືອ ນັບແຕ່ປີ 2010 ເປັນຕົ້ນມາ, ພຽງສະເພາະເມືອງຕົ້ນເຜິ້ງ ແຂວງບໍ່ແກ້ວ ກໍມີຫລາຍເຖິງ 21 ບໍລິສັດ ທີ່ມີເນື້ອທີ່ສຳປະທານປູກກ້ວຍທັງໝົດຫລາຍກວ່າ 6.670 ເຮັກຕາ ໂດຍສ່ວນຫລາຍຜູ້ລົງທຶນບໍ່ປະຕິບັດຕາມລະບຽບກົດໝາຍຂອງລາວ ໃນການຈຳກັດການນຳໃຊ້ສານເຄມີເຂົ້າໃນການຜະລິດ ໂດຍສະເພາະແມ່ນຢາຂ້າຫຍ້າ, ຂ້າແມງໄມ້ ແລະ ປຸ໋ຍເຄມີຕ່າງໆ ອັນໄດ້ສ້າງຜົນກະທົບໜັກໜ່ວງຕໍ່ສະພາບແວດລ້ອມ ເຮັດໃຫ້ແມ່ນ້ຳເປັນພິດ ແລະ ມີຜົນກະທົບຕໍ່ສຸຂະພາບຂອງປະຊາຊົນຜູ້ຢູ່ໃກ້ສວນກ້ວຍ ຫລື ຜູ້ອອກແຮງງານໃນສວນກ້ວຍດັ່ງກ່າວ. ພ້ອມນັ້ນ ຜູ້ລົງທຶນຍັງບໍ່ໄດ້ເອົາໃຈໃສ່ຕໍ່ການຮັກສາຄວາມສະອາດ ຄືຖິ້ມເສດຂີ້ເຫຍື້ອຢ່າງຊະຊາຍ ແລະ ປ່ອຍນ້ຳເປື້ອນອອກສູ່ຖະໜົນຫົນທາງ ແລະ ຫ້ວຍຮ່ອງຄອງບຶງຕ່າງໆ ເຊິ່ງຜ່ານມາອຳນາດການປົກຄອງທ້ອງຖິ່ນ ແລະ ເບື້ອງຂະແໜງກ່ຽວຂ້ອງກໍໄດ້ກ່າວເຕືອນບັນດາບໍລິສັດຜູ້ລົງທຶນມາແລ້ວຫລາຍຄັ້ງແຕ່ບໍ່ມີຜົນ. ດັ່ງນັ້ນ ລັດຖະບານຈຶ່ງເຫັນສົມຄວນສັ່ງໂຈະບັນດາໂຄງການລົງທຶນເປັນພິດດັ່ງກ່າວ ແລະ ມາຮອດປັດຈຸບັນ ຢູ່ຫລາຍແຂວງກໍໄດ້ຈຳກັດລົງແລ້ວ, ສະເພາະຢູ່ເມືອງຕົ້ນເຜິ້ງກໍຫລຸດລົງແລ້ວປະມານ 16% ຂອງກິດຈະການລົງທຶນດັ່ງກ່າວ ແລະ ສ່ວນໜຶ່ງກໍໄດ້ຫັນປ່ຽນເນື້ອທີ່ໄປປູກພືດຊະນິດອື່ນທົດແທນເຊັ່ນ: ໝາກອຶ, ໝາກຖົ່ວ ແລະ ພືດອາຍຸສັ້ນອື່ນໆ. ແຕ່ເຖິງຢ່າງໃດ, ຂະແໜງກ່ຽວຂ້ອງ ແລະ ທ້ອງຖິ່ນກໍຈະຕ້ອງມີມາດຕະການເຂັ້ມງວດໃນການສະກັດກັ້ນການນຳໃຊ້ສານເຄມີເກີນກຳນົດເຂົ້າໃນການປູກພືດດັ່ງກ່າວແມ່ນຈະເປັນການດີທີ່ສຸດຕໍ່ສິ່ງແວດລ້ອມ ແລະ ສຸຂະພາບຂອງປະຊາຊົນ.