ຕິດເຊື້ອໂຄວິດໃນຊຸມຊົນສົນລະວົນໄປທົ່ວປະເທດ

ໂດຍ: ທິດກໍ່າ
ມາຮອດໄລຍະນີ້ ຖືວ່າການແຜ່ລະບາດຂອງເຊື້ອພະຍາດໂຄວິດ-19 ຍັງຂ້ອນຂ້າງໜັກໜ່ວງໃນທົ່ວປະເທດ. ການແຜ່ລະບາດຄັ້ງນີ້ຖືເປັນຄັ້ງທີສາມ ແລະ ຄັ້ງນີ້ ລັດຖະບານເຮົາໄດ້ກຳນົດ ແລະ ຖືເປັນຄັ້ງຮ້າຍແຮງກວ່າຄັ້ງທີ່ຜ່ານໆມາ ນັບແຕ່ມີການແຜ່ລະບາດຂອງເຊື້ອພະຍາດໂຄວິດ-19 ນັບແຕ່ກາງປີ 2019 ເປັນຕົ້ນມາ. ອັນສາເຫດກໍຍ້ອນວ່າມີຕົວເລກຄົນຕິດເຊື້ອສູງເກືອບ 1.000 ຄົນໃນມື້ດຽວ.
ເມື່ອຕັ້ງໂຈດກັນວ່າ, ດ້ວຍສາເຫດໃດ ປະເທດເຮົາຈຶ່ງມີການລະບາດຢ່າງຮ້າຍແຮງເຖິງຂັ້ນນີ້. ຈາກສາເຫດຫລັກໆກໍແມ່ນເກີດມາຈາກແຮງງານລາວທີ່ນຳເອົາເຊື້ອພະຍາດຈາກປະເທດໄທເຂົ້າມາລາວຢ່າງຫລວງຫລາຍພາຍມາກ. ເມື່ອເຮົາມາປຽບທຽບໃສ່ຕົວເລກຄົນຕິດເຊື້ອໂຄວິດ-19 ກ່ອນບໍ່ທັນມີແຮງງານລາວກັບຄືນຖິ່ນໃນແຕ່ລະວັນມີຄົນຕິດເຊື້ອບໍ່ເກີນສອງຕົວເລກໃນທົ່ວປະເທດ. ໝາຍວ່າບໍ່ເກີນຫົວສິບ, ແຕ່ພາຍຫລັງມີແຮງງານລາວກັບຄືນຖິ່ນ ປະເທດເຮົາກໍມີຄົນຕິດເຊື້ອໂຄວິດ-19 ເພີ່ມຂຶ້ນໃນແຕ່ລະວັນ ຈາກຫົວສິບຂຶ້ນມາເປັນຫລັກຮ້ອຍ ຫລືວ່າ ສາມຕົວເລກ.

ຈາກສະພາບທີ່ມັນເກີດຂຶ້ນນີ້, ຫລາຍທ່ານຫລາຍຄົນອາດເຂົ້າໃຈນຳກັນແລ້ວວ່າ ທຸກສິ່ງທຸກຢ່າງມັນແມ່ນຍ້ອນພະຍາດໂຄວິດ-19 ເປັນເຫດ. ເພາະສະນັ້ນ ພວກເຂົາຈຶ່ງພາກັນຫລຸຫລັ່ງທັງເທຄືນມາຫາບ້ານເກີດໃນໄລຍະສັ້ນໆພາບດຽວເປັນຮ້ອຍເປັນພັນເປັນໝື່ນເປັນແສນຄົນໃນທົ່ວປະເທດ.

ດັ່ງທີ່ຮູ້ກັນດີແລ້ວວ່າ, ຢູ່ປະເທດໄທໄດ້ເກີດວິກິດການລະບາດຂອງເຊື້ອພະຍາດໂຄວິດ-19 ຢ່າງຮ້າຍແຮງ ເຊິ່ງແຕ່ລະວັນມີເຖິງຫລັກໝື່ນ, ຊ້ຳບໍ່ໜຳ ບັນດາແຮງງານລາວທີ່ໄດ້ເຂົ້າໄປເຮັດວຽກຢູ່ໄທບໍ່ສາມາດເຂົ້າເຖິງວັກຊີນໄດ້ຢ່າງທົ່ວເຖິງ. ປະເທດຂອງພວກເພິ່ນກໍມີການລັອກດາວ, ອັດປະຕູຕີໄລເກືອບທຸກຄົນຖືກເລີກຈ້າງ ຈຶ່ງພາກັນຕົກງານ ທັງຢ້ານໂຄວິດ-19 ມາສັງເວີຍເອົາຊີວິດກໍເລີຍພາກັນຫຸບຫອບໜີຈາກຄວາມຕາຍ.

ອີກປະການໜຶ່ງ, ໃນການກັບຄືນຖິ່ນຂອງແຮງງານລາວໃນຄັ້ງນີ້ກໍແມ່ນຍ້ອນນະໂຍບາຍອັນສະເໝີຕົ້ນສະເໝີປາຍຂອງພັກ ແລະ ລັດຖະບານເຮົາທີ່ເປັນຫ່ວງເປັນໄຍຕໍ່ພົນລະເມືອງຂອງຕົນທີ່ໄປໃຊ້ຊີວິດເຮັດວຽກຢູ່ຕ່າງແດນ. ດັ່ງທ່ານນາຍົກລັດຖະມົນຕີ ພັນຄຳ ວິພາວັນ ໄດ້ກ່າວໃນກອງປະຊຸມສະໄໝສາມັນຄັ້ງທີໜຶ່ງຂອງສະພາແຫ່ງຊາດ ຊຸດທີ IX ວ່າ: ລັດຖະບານມີນະໂຍບາຍປະກາດໃຫ້ແຮງງານລາວທີ່ໄປເຮັດວຽກຢູ່ປະເທດໄທກັບຄືນຖິ່ນ ເພື່ອມາຮັກສາປິ່ນປົວສຸຂະພາບ ແລະ ຮັບວັກຊີນຢູ່ບ້ານເກີດ ໂດຍບໍ່ໄດ້ເສຍຄ່າ ໃຜຈະໄປຖືກກົດໝາຍ, ຜິດກົດໝາຍກໍໃຫ້ກັບຄືນມາ ເພາະລັດຖະບານມີນະໂຍບາຍພິເສດໃນຊ່ວງເກີດວິກິດ ຍ້ອນໂຄວິດ-19.

ດ້ວຍສາເຫດນີ້ເອງ ເຂົາຈຶ່ງຫລຸຫລັ່ງທັ່ງເທມາປານປາລູກຄອກ, ບາງຄົນໄປໜຶ່ງມາສາມ ຍ້ອນມີຄອບຄົວ ຜູ້ຍິງໄດ້ຜົວ, ຜູ້ຊາຍໄດ້ເມຍ ທັງລູກທັງເຕົ້າ, ທັງເສື້ອຜ້າອາພອນ, ໂທລະທັດ ພັດລົມ ຕູ້ເຢັນ ຊິຖິ້ມກໍເສຍດາຍຫອບໜີຈາກເມືອງໄທກັບຄືນລາວເປັນພຶງເປັນແພ. ເມື່ອກັບມາຮອດລາວແລ້ວ ກໍລົ້ນເຫລືອສູນກັກກັນຈັກຍິງຈັກຊາຍ ຈັກເດັກຜູ້ໃຫຍ່ອົນລະຫົນປົນເປສັບປຸສັບປຸ້ຍ ຈົນມີບາງຄົນຈົ່ມວ່າໃຫ້ພັກໃຫ້ລັດ, ພະນັກງານຮັບໃຊ້, ແພດໝໍເບິ່ງແຍງບໍ່ທັນກໍວ່າ ເປັນແບບນີ້ຈັກວ່າໃຫ້ກູມາຫຍັງ ເບິ່ງຫຍັງກະບໍ່ມີ, ຫ້ອງນ້ຳກໍເປື້ອນ, ບ່ອນຢູ່ກໍແອອັດຈັກຍິງຈັກຊາຍຢູ່ປົນເປກັນ. ຍິ່ງໄປກວ່ານັ້ນ ບາງຄົນນຳເອົານິດໄສຂີ້້ສວກຈາກສັງຄົມເສລີມາອວດອ້າງບໍ່ຢາກຢູ່ສູນກັກກັນສວຍໂອກາດລັກໜີຈາກສູນອອກໄປນອກ ອັນເປັນສາເຫດໜຶ່ງຂອງການແຜ່ລະບາດໃນຊຸມຊົນຈົນອໍລະຫົນໄປທົ່ວປະເທດ.

ເຖິງຢ່າງໃດກໍດີ, ມາຮອດປັດຈຸບັນ ພາຍໃຕ້ການຮ່ວມມືຂອງທຸກຝ່າຍ ຕົວເລກຄົນຕິດເຊື້ອໃນແຕ່ລະວັນ ໂດຍສະເພາະໃນຊຸມຊົນມັນກໍນັບມື້ຫລຸດລົງຕາມສະພາບຄວາມເປັນຈິງ ຈຶ່ງຂໍໃຫ້ທຸກຄົນສາມັກຄີກັນ ຢ່າຈົ່ມວ່າປ້ອຍດ່າກັນມັນບໍ່ດີ. ທ່ານນາຍົກລັດຖະມົນຕີ ພັນຄຳ ວິພາວັນ ວ່າ.