ກົມຈັດຕັ້ງ ແລະ ພະນັກງານ ສະຫຼຸບການປະຕິບັດວຽກຜ່ານມາ ແລະ ວຽກຈຸດສຸມຕໍ່ໜ້າ

ໃນວັນທີ 2 ກັນຍາ 2021, ກົມຈັດຕັ້ງ ແລະ ພະນັກງານ ກະຊວງການເງິນ, ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານໃນ 7 ເດືອນປີ ແລະ ວາງທິດທາງວຽກຈຸດສຸມ 5 ເດືອນທ້າຍປີ 2021,ໂດຍການເປັນປະທານຂອງທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ມີທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ, ມີຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກພ້ອມດ້ວຍພະນັກງານວິຊາການເຂົ້າຮ່ວມ.

ອີງຕາມການລາຍງານຂອງທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານກ່ຽວກັບການປະຕິບັດວຽກງານໂດຍສັງເຂບຂອງກົມຍົກໃຫ້ເຫັນພະນັກງານທຸກຄົນຮັກສາໄດ້ມູນເຊື້ອຄວາມສາມັກຄີຮ່ວມມືກັນຢ່າງຮອບດ້ານ, ມີການແບ່ງໜ້າທີ່ຄວາມຮັບຜິດຊອບຢ່າງລະອຽດ, ເອົາໃຈໃສ່ຕໍ່ໜ້າທີ່ວຽກງານວິຊາສະເພາະໃນໄລຍະຜ່ານມາຈົນໄດ້ຮັບຜົນສຳເລັດທີ່ພົ້ນເດັ່ນຫຼາຍດ້ານເປັນຕົ້ນ: ສຳເລັດການດຳເນີນກອງປະຊຸມຄະນະບໍລິຫານງານພັກເປີດກ້ວາງຄັ້ງທີ 3 , ສະໄໝທີ III; ໄດ້ຄົ້ນຄວ້າ ແລະ ສັງລວມວຽກງານສ້າງໜ່ວຍພັກເຂັ້ມແຂງຮູ້ນຳພາຮອບດ້ານໄດ້ທັງໝົດ 12 ໜ່ວຍພັກ, ສຳເລັດການລາຍງານວຽກງານສາມສ້າງເຂົ້າສູ່ລວງເລິກ ແລະ ວຽກງານແຂ່ງຂັນ-ຍ້ອງຍໍຮັກຊາດ ແລະ ພັດທະນາ, ສຳເລັດການອະນຸມັດຂໍ້ຕົກລົງວ່າດ້ວຍລະບຽບການຄຸ້ມຄອງ ພະນັກງານ-ລັດຖະກອນ ຂະແໜງສ່ວຍສາອາກອນ; ສຳເລັດການປັບປຸງພາລະບົດບາດ 03 ກົມສາຍຕັ້ງ, ປັບປຸງພາລະບົດບາດຂອງກະຊວງການເງິນ, ການດຳເນີນການກໍານົດແຜນພະນັກງານນໍາພາ-ຄຸ້ມຄອງ ຂັ້ນກະຊວງການເງິນຄຸ້ມຄອງປີ 2021 ປັດຈຸບັນ 03 ກົມສາຍຕັ້ງສໍາເລັດ, ສຳເລັດການອອກແຈ້ງການແນະນຳເພີ່ມເຕີມກ່ຽວກັບການປະເມີນຜົນສະເພາະກ່ອນການແຕ່ງຕັ້ງດຳລົງຕຳແໜ່ງໃໝ່, ດຳເນີນປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ປີ 2020, ສຳເລັດການອະນຸມັດຕົກລົງໃຫ້ພະນັກງານ-ລັດຖະກອນຂະແໜງການເງິນພັກການຮັບອຸດໜູນບໍານານປີ 2021 ທັງໝົດ 91 ທ່ານ ຍິງ 26 ທ່ານ.

ສໍາລັບທິດທາງແຜນການວຽກຈຸດສຸມໃນ 05 ເດືອນທ້າຍປີ 2021 ຈະໄດ້ສືບຕໍ່ສ້າງແຜນກຳນົດພະນັກງານນຳພາ-ຄຸ້ມຄອງບັນດາກົມອ້ອມຂ້າງກະຊວງ ແລະ ຂະແໜງສາຍຕັ້ງຂັ້ນທ້ອງຖິ່ນໃຫ້ສຳເລັດຕາມເວລາໄດ້ກຳນົດ; ຄົ້ນຄ້ວາດຳເນີນການສ້າງລະບົບຖານຂໍ້ມູນພະນັກງານ-ລັດຖະກອນ ກະຊວງການເງິນ ແລະ ດຳເນີນການສ້າງລະບົບດັ່ງກ່າວຫັນເປັນທັນສະໄໝ; ຕິດຕາມຮ່າງດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງການເງິນທີ່ສະເໜີຂັ້ນເທິງອະນຸມັດຮັບຮອງ; ສົມທົບກັບອົງການປົກຄອງທ້ອງຖິ່ນໃນການຈັດຕັ້ງການເຜີຍແຜ່ບັນດານິຕິກຳໃຕ້ກົດໝາຍກ່ຽວກັບວຽກງານຄຸ້ມຄອງພະນັກງານ-ລັດຖະກອນຂະແໜງການເງິນ; ສືບຕໍ່ວຽກງານການຄຸ້ມຄອງວຽກງານຫັນເປັນທັນສະໄໝຂອງຂະແໜງການເງິນ ແລະ ວຽກງານອື່ນໆ.

ໃນກອງປະຊຸມທ່ານ ບຸນປອນ ວັນນະຈິດ ໄດ້ໃຫ້ກຽດໂອ້ລົມຕໍ່ກອງປະຊຸມເພື່ອເປັນທິດເຍືອງທາງໃຫ້ແກ່ການຈັດຕັ້ງປະຕິບັດວຽກງານໃນຕໍ່ໜ້າໃນການແກ້ໄຂບັນຫາໃນຂົງເຂດວຽກງານການຈັດຕັ້ງພັກ-ພະນັກງານ ໃຫ້ມີຄຸນນະພາບຫຼາຍຂຶ້ນກ້າວໄປເຖິງການປັບປຸງແບບແຜນວິທີເຮັດວຽກທີ່ມີລັກສະນະການຫັນປ່ຽນ ເລິກເຊິ່ງ ແລະ ຮອບດ້ານໂດຍເນັ້ນໃຫ້ຄົ້ນຄວ້າ ແລະ ລົງເລິກ ກໍານົດພາລະບົດບາດ, ໜ້າທີ່ຂອບເຂດສິດເພື່ອກ້າວໄປສູ່ຈິດໃຈການສ້າງການຫັນປ່ຽນໃໝ່ໃນວຽກງານຂົງເຂດພະນັກງານ ຕາມທິດກະທັດຮັດ ໜັກແໜ້ນ ເຂັ້ມແຂງ ທັນສະໄໝ ໂປ່ງໃສ ຮັບໃຊ້ປະຊາຊົນຢ່າງແທ້ຈິງ.