ສ.ອາເມລິກາ ສືບຕໍ່ສະໜັບສະໜູນດ້ານວິຊາການ ກະຊວງການເງິນ ສປປ ລາວ

ໃນວັນທີ 30 ສິງຫາ 2021 ທີ່ຫ້ອງປະຊຸມ VIP ກະຊວງການເງິນ, ທ່ານ ບຸນໂຈມ ອຸບົນປະເສີດ ລັດຖະ ມົນຕີກະຊວງການເງິນ, ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ປອ ປີເຕີ ເຮມ໋ອນ (Dr. Peter M. Haymond) ເອກອັກຄະລັດຖະທູດ ສ.ອາເມລິກາ ປະຈໍາ ສປປ ລາວ, ພ້ອມດ້ວຍຄະນະເພື່ອເປັນການສະແດງຄວາມຍິນດີໂອກາດຮັບຕຳແໜ່ງເປັນລັດຖະມົນຕີກະຊວງການເງິນ.

ສຳລັບການຮ່ວມມືສອງຝ່າຍລະຫວ່າງສປປ ລາວ-ສ.ອາເມລິກາ, ການຊ່ວຍເຫຼືອດ້ານວິຊາການ, ການສະ ໜອງການປຶກສາທາງດ້ານນິຕິກໍາຂອງກະຊວງການເງິນ ສ.ອາເມລິກາ ໃຫ້ກັບກະຊວງການເງິນ, ການຊ່ວຍເຫຼືອດ້ານວິຊາການ ແລະ ປຶກສາທາງດ້ານນິຕິກໍາຂອງກະຊວງການເງິນ. ນອກນີ້, ລັດຖະບານ ສ.ອາເມລິກາໄດ້ມີການຮ່ວມມື ແລະ ສືບຕໍ່ໃຫ້ການຊ່ວຍເຫຼືອສະໜັບສະໜູນແກ່ກະຊວງການເງິນ.
ສຳລັບວຽກງານພາສີ ໃນໄລຍະຜ່ານມາໄດ້ໃຫ້ການຊ່ວຍເຫຼືອກົມພາສີເພື່ອນໍາໃຊ້ເຂົ້າໃນວຽກງານການສ້າງຂີດຄວາມສາມາດ ໂດຍສະເພາະວຽກງານບັງຄັບໃຊ້ກົດໝາຍເປັນຕົ້ນ: ແມ່ນການຝຶກອົບຮົມ, ຈັດຊື້ອຸປະກອນ, ພາຫະນະ ແລະ ອື່ນໆ, ເປັນການປະກອບສ່ວນເຂົ້າວຽກງານການປັບປຸງພາລະບົດບາດ ຂອງພະແນກສືບສວນ– ສອບສວນ ແລະ ປາບປາມການລັກລອບໜີພາສີ.

ຄຽງຄູ່ກັນນີ້, ຈະເພີ່ມທຶນການຊ່ວຍເຫຼືອໃຫ້ກົມພາສີເພື່ອນຳໃຊ້ເຂົ້າໃນວຽກງານການສ້າງຂີດຄວາມສາມາດຕໍ່ກັບວຽກງານການບັງຄັບໃຊ້ກົດໝາຍພາຍໃຕ້ສັນຍາການຮ່ວມມືວ່າດ້ວຍການບັງຄັບໃຊ້ກົດໝາຍລະຫວ່າງລັດຖະ ບານສປປ ລາວ-ສ.ອາເມລິກາ.

ສ່ວນວຽກງານສ່ວຍສາອາກອນ ກໍາລັງກະກຽມການເຈລະຈາສັນຍາລະຫວ່າງກໍາລັງກະກຽມການເຈລະຈາສັນຍາລະຫວ່າງລັດຖະບານ (Intergovernmental Agreement ຫຼື IGA) Model 1B ກັບ ກະຊວງການເງິນ ສ. ອາເມລິກາກັບກະຊວງການເງິນ ສປປ ລາວ, ເພື່ອຈັດຕັ້ງປະຕິບັດກົດໝາຍວ່າດ້ວຍການປະຕິບັດພັນທະຈາກບັນຊີຕ່າງປະເທດ, ໂດຍມີຈຸດປະສົງເພື່ອສະກັດກັ້ນການຫຼີກລ້ຽງການມອບອາກອນລາຍຮັບຂອງພົນລະເມືອງທີ່ມີບັນຊີເງິນຝາກ ຫຼື ລົງທຶນຢູ່ຕ່າງປະເທດ.

ວຽກງານການຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ກະຊວງການເງິນ ແມ່ນໜຶ່ງໃນຄະນະກໍາມະການແຫ່ງຊາດເພື່ອຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ເພື່ອຈັດຕັ້ງປະຕິບັດວຽກງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ, ໂດຍສະເພາະແມ່ນວຽກງານການສືບສວນ-ສອບສວນຂອງເຈົ້າໜ້າທີ່ພາສີ, ຊຶ່ງຮັບປະກັນການສືບສວນ-ສອບສວນການກະທໍາຜິດຕົ້ນເພື່ອໃຫ້ກ້າວໄປເຖິງຖານຟອກເງິນ, ຜ່ານມາສ.ອາເມລິກາ ໄດ້ໃຫ້ການສະໜັບສະໜູນໃນການສ້າງຄວາມອາດສາມາດບັນຫາດັ່ງກ່າວ.

ນອກຈາກນີ້, ສ.ອາເມລິກາ ຍັງໃຫ້ການສະໜັບສະໜູນ ສປປ ລາວ ໃນການອອກຈາກບັນຊີສີເທົາໃນປີ 2017 ພ້ອມດຽວກັນນັ້ນ, ພາຍຫຼັງອອກຈາກບັນຊີເທົາກໍ່ໄດ້ສືບຕໍ່ໃຫ້ການຊ່ວຍເຫຼືອສປປ ລາວ ເປັນຕົ້ນ: ໃນ ປີ 2018 ສະຖາບັນການສຶກສາດ້ານກົດໝາຍ ສ.ອາເມລິກາ ໄດ້ໃຫ້ການຊ່ວຍເຫຼືອທາງດ້ານງົບປະມານໃນການຈັດ ສໍາມະນາກ່ຽວກັບການສ້າງຄວາມອາດສາມາດໃຫ້ແກ່ອົງການບັງຄັບໃຊ້ກົດໝາຍຢູ່ 6 ແຂວງພາກເໜືອ ແລະ 5ແຂວງພາກໃຕ້ ແລະ ຍັງໄດ້ສືບຕໍ່ໃຫ້ການຊ່ວຍເຫຼືອຕໍ່ກັບວຽກງານ AML/CFT ໂດຍຜ່ານອົງການ UNODC ລວມມູນຄ່າ 340.000 ໂດລາສະຫະລັດ, ເພື່ອຊ່ວຍຈັດຝຶກອົບຮົມໃຫ້ແກ່ເຈົ້າໜ້າທີ່ສືບສວນ-ສອບສວນ ນໍາອີກດ້ວຍ.