ນະຄອນຫລວງວຽງຈັນ ເປີດສັກວັກຊີນ ຊີໂນຟາມ ເຂັມ 1 ແລະ ເຂັມ 2 ຮອບໃໝ່ເລີ່ມແຕ່ວັນທີ 30 ສິງຫາ ຫາ 30 ກັນຍາ 2021

ທ່ານ ດຣ ຖາວອນ ສີມມະວົງ ຜູ້ຮັບຜິດຊອບວຽກງານການໃຫ້ວັກຊີນປ້ອງກັນໂຄວິດ-19 ພະແນກສາທາລະນະສຸກນະຄອນຫລວງວຽງຈັນ ໃຫ້ຂໍ້ມູນຕໍ່ໜັງສືພິມ ລາວພັດທະນາ ໃນວັນທີ 1 ກັນຍາ 2021 ນີ້ວ່າ: ນະຄອນຫລວງວຽງຈັນໄດ້ເລີ່ມເປີດການສັກວັກຊີນ ຊີໂນຟາມ ເຂັມ 1 ແລະ ເຂັມ 2 ຮອບໃໝ່ແລ້ວ ໂດຍເລີ່ມແຕ່ວັນທີ 30 ສິງຫາ ຫາ 30 ກັນຍາ 2021 ແລະ ກຳນົດສະຖານທີ່ຈຸດໂຮງໝໍເມືອງ 9 ຕົວເມືອງ ໃນນະຄອນຫລວງ ແລະ ສະມາຄົມມູນນິທິຈີນ ດົງປ່າແຫລບ (ວັດຈີນດົງປ່າແຫລບ) ຕາມວັນເວລາໂມງລັດຖະການ 8:00-16:00 ໂມງ ຂອງວັນຈັນ-ສຸກ, ເຊິ່ງກຸ່ມເປົ້າໝາຍແມ່ນກຸ່ມອາຍຸ 18 ປີ ຂຶ້ນໄປ. ກໍລະນີຜູ້ທີ່ມີອາຍຸຕຳກວ່າ 18 ປີ ມີຈຸດປະສົ່ງໄປຮຽນຕໍ່ຕ່າງປະເທດ ຫລື ເສັງເຂົ້າ ມຊ ແມ່ນມາພົວພັນສັກເປັນກໍລະນີນະໂຍບາຍພິເສດໄດ້.

ພ້ອມນີ້, ກໍໄດ້ເລັ່ງການສັກວັກຊີນໃຫ້ກຸ່ມເປົ້າໝາຍ ໂດຍສະເພາະ ກຸ່ມສ່ຽງເຊັ່ນ: ແພດ, ຜູ້ສູງອາຍຸ ແລະ ຜູ້ທີ່ມີພະຍາດປະຈຳໂຕ ລວມທັງບຸກຄົນທົ່ວໄປໃນສັງຄົມແມ່ນວິທີທາງອອກເພື່ອຫລຸດຜ່ອນອັດຕາການຕິດເຊື້ອ ກໍຄື ການເສຍຊີວິດໃຫ້ໜ້ອຍລົງ ແລະ ກັບຄືນຟື້ນຟູສະພາບເສດຖະກິດ ແລະ ຊີວິດການເປັນຢູ່ຂອງປະຊາຊົນບັນດາເຜົ່າ ໃຫ້ດີຂື້ນໂດຍໄວ;  ແຕ່ຍັງມີຫລາຍຄົນຍັງເຂົ້າໃຈຜິດວ່າ ຖ້າສັກວັກຊິນແລ້ວ ແມ່ນບໍ່ຈໍາເປັນຕ້ອງປະຕິບັດມາດຕະການຫຍັງເລີຍ. ຈຸດນີ້ຢາກໃຫ້ພວກເຮົາມາທໍາຄວາມເຂົ້າໃຈນໍາກັນວ່າ ການສັກວັກຊີນ ແມ່ນ ການເຮັດໃຫ້ຮ່າງກາຍສ້າງພູມຄຸ້ມກັນ ເພື່ອປ້ອງກັນພະຍາດ ພ້ອມຫລຸດຜ່ອນຄວາມຮ້າຍແຮງ ເມື່ອຕິດພະຍາດ ແຕ່ວ່າຍັງສາມາດຕິດ ແລະ ແພ່ເຊື້ອ ພະຍາດໂຄວິດ-19 ນີ້ໄດ້  ໂດຍສະເພາະ ແມ່ນສາຍພັນເດລຕາ ທີ່ກໍາລັງເກີດຂື້ນໃນຫລາຍປະເທດ ລວມທັງ ສປປ ລາວ ຂອງພວກເຮົາ.

ປັດຈຸບັນ ສາມາດສັກເຂັມທີ 1 ໄດ້ 2.443.845 ໂດສ ກວມເອົາ 33.3% ແລະ ເຂັມທີ2 ໄດ້ 1.794.698 ໂດສ ກວມເອົາ 24.46%.