ນັກວິທະຍາສາດອາຟຣິກາໃຕ້ລະບຸ ເຊື້ອໄວຣັສກາຍພັນສາຍພັນໃໝ່ C.1.2. ອາດແຜ່ກະຈາຍເຊື້ອໄດ້ດີຍິ່ງຂຶ້ນ

ວັນທີ 30 ສິງຫາ 2021, ສຳນັກຂ່າວຕ່າງປະເທດລາຍງານວ່າ: ນັກວິທະຍາສາດອາຟຣິກາໃຕ້ລະບຸ ເຊື້ອໄວຣັສໂຄໂຣນາກາຍພັນສາຍພັນໃໝ່ ຄື C.1.2. ທີ່ກວດພົບເປັນຄັ້ງທຳອິດໃນເດືອນພຶດສະພາຜ່ານມາ ຢູ່ແຂວງພູມາລັງກາ ແລະ ແຂວງເຄົາເຕັງ ເຊິ່ງເປັນທີ່ຕັ້ງຂອງເມືອງໂຈຮັນເນສເບິກ ແລະ ນະຄອນຫລວງພຣິທໍເຣຍ ເມືອງຫລວງຂອງປະເທດ ຄາດວ່າເຊື້ອໄວຣັສກາຍພັນນີ້ອາດສາມາດແຜ່ກະຈາຍເຊື້ອໄດ້ດີຍິ່ງຂຶ້ນ ແລະ ຮັບມືກັບແອນຕິບໍດີໄດ້ດີຍິ່ງຂຶ້ນ.

ເບື້ອງຕົ້ນພົບການແຜ່ລະບາດຂອງເຊື້ອ C.1.2. ແລ້ວໃນ 6 ຈາກ 9 ແຂວງຂອງອາຟຣິກາໃຕ້ ລວມທັງສາທາລະນະລັດປະຊາທິປະໄຕຄອງໂກ, ມໍຣິເຊຍ, ໂປຣຕຸເກສ, ຈີນ, ອັງກິດ, ນິວຊີແລນ ແລະ ສະວິດເຊີແລນ ໂດຍເຊື້ອສາຍພັນດັ່ງກ່າວນີ້ກາຍພັນຈາກເຊື້ອ C.1. ທີ່ພົບໃນການລະບາດຮອບທຳອິດຢູ່ອາຟຣິກາໃຕ້ໃນກາງປີ 2020 ມີສ່ວນທີ່ກາຍພັນ 44-59 ຈຸດຈາກເຊື້ອໄວຣັສໂຄໂຣນາສາຍພັນດັ້ງເດີມທີ່ເຄີຍກວດພົບໃນເມືອງອູ່ຮັ່ນ ມົນທົນຫູເປ່ຍຂອງຈີນ.

ໂດຍປັດຈຸບັນ ນັກວິທະຍາສາດກຸ່ມດັ່ງກ່າວກຳລັງພະຍາຍາມສຶກສາວ່າ: ໄວຣັສກາຍພັນສາຍພັນໃໝ່ C.1.2. ນີ້ສົ່ງຜົນຕໍ່ການສະຫລາຍໄວຣັສຂອງພູມຕ້ານທານ (Antibody Neutralization) ທັງໃນຜູ້ທີ່ໄດ້ຮັບການສັກວັກຊີນ ແລະ ຍັງບໍ່ເຄີຍໄດ້ຮັບການສັກວັກຊີນ. ຂະນະທີ່ທ່ານ ຕູລິໂອ ເດ ໂອລິເວຍຣາ ຜູ້ອຳນວຍການສະຖາບັນວິໄຈ Krisp ລະບຸວ່າ: ການກວດພົບເຊື້ອໄວຣັສດັ່ງກ່າວຍັງຢູ່ໃນປະລິມານທີ່ໜ້ອຍ, ແຕ່ພວກເຮົາຍັງເຝົ້າຕິດຕາມເຊື້ອໄວຣັສນີ້ຕໍ່ໄປ.

ເຊື້ອໄວຣັສເບຕາ (B.1.351) ທີ່ກວດພົບຄັ້ງທຳອິດໃນອາຟຣິກາໃຕ້ ແລະ ໄດ້ຮັບການຈັດໃຫ້ຢູ່ໃນກຸ່ມການກາຍພັນທີ່ໜ້າກັງວົນ (Variants of Concern: VOC) ມີທ່າອ່ຽງການແຜ່ລະບາດຫລຸດລົງຫລາຍ ຫລັງຈາກເຊື້ອເດວຕາ (B.1.617.2) ທີ່ກວດພົບຄັ້ງທຳອິດໃນອິນເດຍຈະເລື່ອນຂຶ້ນມາເປັນເຊື້ອສາຍພັນຫລັກທີ່ແຜ່ລະບາດໃນປັດຈຸບັນ ແລະ ສ້າງຄວາມທ້າທາຍຫລາຍໃຫ້ຜູ້ຜະລິດ ແລະ ພັດທະນາວັກຊີນ ລວມທັງລັດຖະບານ ແລະ ໜ່ວຍງານທີ່ກ່ຽວຂ້ອງໃນການຮັບມືເຊື້ອກາຍພັນຊະນິດນີ້.

ອ້າງອີງ:

• https://www.bloomberg.com/news/articles/2021-08-30/new-covid-variant-found-in-south-africa-has-concerning-mutations?sref=CVqPBMVg
• https://www.gisaid.org/hcov19-variants//
• https://www.reuters.com/world/africa/south-africa-detects-new-coronavirus-variant-still-studying-its-mutations-2021-08-30/
• https://www.ndtv.com/india-news/new-covid-variant-c-1-2-may-be-more-infectious-evade-vaccine-protection-study-2523744
• https://www.biospace.com/article/although-delta-is-at-the-top-of-the-list-c-1-2-is-a-new-covid-19-variant-of-concern/