ສປປ ລາວ ມີລາຍງານການລະບາດຢູ່ໃນຊຸມຊົນ ສູງເຖິງ 8 ແຂວງ
ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ຕາງໜ້າຄະນນະສະເພາະກິດ ລາຍງານໃນວັນທີ 30 ສິງຫາ 2021 ນີ້ວ່າ: ປັດຈຸບັນສະພາບການລະບາດຢູ່ໃນ ສປປ ລາວເຮົາ ໄດ້ພົບການຕິດເຊື້ອໂຄວິດ-19 ໃໝ່ຢູ່ໃນ 9 ແຂວງ, ໃນນັ້ນ ມີ 8 ແຂວງ ທີ່ມີລາຍງານການລະບາດຢູ່ໃນຊຸມຊົນ ຄື: ສະຫວັນນະເຂດ, ຈຳປາສັກ, ສາລະວັນ, ຄຳມ່ວນ, ຫລວງພະບາງ, ບໍ່ແກ້ວ, ຫລວງນ້ຳທາ, ນະຄອນຫລວງ. ແຂວງທີ່ມີຈຳນວນຜູ້ຕິດເຊື້ອຫລາຍກວ່າໝູ່ ມີຢູ່ 5 ແຂວງ ເຊິ່ງສາເຫດຫລັກ ກໍມາຈາກການນຳເຂົ້າເປັນສ່ວນໃຫຍ່ ແຕ່ການຕິດເຊື້ອໃນຊຸມຊົນໃໝ່ ແມ່ນເກີດຈາກການບໍ່ປະຕິບັດມາດຕະການທີ່ຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 1036/ຫສນຍ, ລົງວັນທີ 19 ສິງຫາ 2021 ຢ່າງເຂັ້ມງວດ ເຊັ່ນ: ການອະນຸຍາດໃຫ້ອອກຈາກບ້ານທີ່ຖືກກຳນົດເປັນບ້ານແດງ, ຍັງມີການຊຸມແຊວກັນເປັນກຸ່ມ, ມີການດຶ່ມສິ່ງມຶນເມົາ, ບໍ່ຮັກສາໄລຍະຫ່າງ ໃນຮ້ານອາຫານ ລວມທັງ ການຈັດງານປະເພນີ ເຫັນວ່າ ປະຊາຊົນຈຳນວນໜຶ່ງ ເມື່ອໄປຮ່ວມງານ ບໍ່ໃສ່ຜ້າປິດປາກ-ດັງ, ການປະຕິບັດມາດຕະການທີ່ທາງຄະນະສະເພາະກິດໄດ້ວາງອອກ ບາງບໍລິສັດ, ໂຮງງານ, ຫ້າງຮ້ານ ຍັງບໍ່ເຮັດບໍ່ໄດ້ດີເທົ່າທີ່ຄວນ ເຊິ່ງທັງໝົດນີ້ ສ້າງໃຫ້ເກີດມີຄວາມສ່ຽງສູງ ໃຫ້ແກ່ການລະບາດອອກສູ່ຊຸມຊົນ ເຊິ່ງປະເທດຂອງພວກເຮົາກຳລັງພະເຊີນຢູ່ໃນປັດຈຸບັນນີ້.
ພ້ອມດຽວກັນນີ້, ມີລາຍງານການຕິດເຊື້ອພາຍໃນບໍລິສັດ, ໂຮງຈັກ, ໂຮງງານ ເຊິ່ງສ້າງຄວາມກັງວົນ ໃຫ້ແກ່ພະນັກງານ. ດັ່ງນັ້ນ, ສະເໜີ ໃຫ້ຜູ້ທີ່ຮັບຜິດຊອບໃນບໍລິສັດ, ໂຮງຈັກ, ໂຮງງານ ໃຫ້ມີມາດຕະການໃນການປ້ອງກັນການຕິດເຊື້ອ ພາຍໃນຢ່າງເຄັ່ງຄັດ ແລະ ໃຫ້ມີການກວດອຸນຫະພູມເຂົ້າ-ອອກ ຢ່າງເປັນປົກກະຕິ, ມີຈຸດລ້າງມື ຫລື ເຈວຂ້າເຊື້ອຢ່າງພຽງພໍ ແລະ ມີການຮັກສາໄລຍະຫ່າງໃນສະຖານທີ່ເຮັດວຽກ, ຫ້າມບໍ່ໃຫ້ຜູ້ທີ່ມີປະຫວັດການເຄື່ອນໄຫວ ມາແຕ່ເຂດແດງ ຫລື ຮູ້ສຶກບໍ່ສະບາຍມາເຮັດວຽກ ໂດຍທີ່ບໍ່ມີການກວດກາທາງດ້ານສຸຂະພາບຢ່າງລະອຽດ.
