ອົງການກາແດງລະຫວ່າງປະເທດ ເຜີຍວ່າມີຄົນສູນຫາຍຢ່າງໜ້ອຍ 200,000 ຄົນທົ່ວໂລກ.
ເນື່ອງໃນວັນຜູ້ຫາຍສາບສູນສາກົນ (International Day of the Disappeared) ທີ່ມາບັນຈົບຄົບຮອບອີກຄັ້ງໃນວັນທີ 30 ສິງຫາ ນີ້, ຄະນະກຳມະການກາແດງສາກົນ ICRC (International Committee of the Red Cross) ໄດ້ເປີດເຜີຍຂໍ້ມູນຂອງທີມຕິດຕາມຜູ້ສູນຫາຍທົ່ວໂລກ ຂອງກຸ່ມອົງການກາແດງ ແລະ ຊີກວົງເດືອນແດງ (Red Cross and Red Crescent Restoring Family Links) ພົບວ່າ ຍັງມີຜູ້ທີ່ມີສະຖານະສູນຫາຍທີ່ທີມຍັງຊອກຫາຢູ່ຈົນຮອດ ປີ 2020 ມີຈຳນວນຫຼາຍເຖິງ 210,000 ຄົນ. ໃນປີ 2020 ປີດຽວມີບຸກຄົນທີ່ຄອບຄົວໄດ້ແຈ້ງວ່າສູນຫາຍເຖິງ 49,800 ຄົນ.
ການຊອກຫາຜູ້ສູນຫາຍໃນປີ 2020 ມີຄວາມຍາກລຳບາກຫລາຍຂຶ້ນ ເນື່ອງຈາກການແພ່ລະບາດຂອງໂຄວິດ-19 ທີ່ນຳມາສູ່ມາດຕະການຄວບຄຸມການເດີນທາງ ແລະ ສະພາບເສດຖະກິດທີ່ຕົກຕ່ຳ ໂດຍໃນປີ 2020 ທີມງານກາແດງ ແລະ ຄອບຄົວ ຂອງເຂົາເຈົ້າໄດ້ຊອກພົບຜູ້ສູນຫາຍເກືອບ 9,500 ຄົນ, ໂດຍສະເລ່ຍ 26 ຄົນຕໍ່ມື້.
ໂຣເບີດ ມາດິນີ (Robert Mardini) ຜູ້ອຳນວຍການໃຫຍ່ຂອງ ICRC ກ່າວວ່າ:“ ພວກເຮົາຕ້ອງການໃຫ້ຄອບຄົວຂອງຜູ້ສູນຫາຍຮູ້ວ່າເຂົາເຈົ້າບໍ່ໄດ້ຢູ່ໂດດດ່ຽວ ແລະ ຮັບຮູ້ວ່າຄົນຮັກຂອງເຂົາເຈົ້າບໍ່ໄດ້ຖືກລືມ, ICRC ຢືນຢັນສືບຕໍ່ສະໜັບສະໜູນລັດຖະບານຕ່າງໃນທົ່ວໂລກ ໃນຄວາມພະຍາຍາມທຸກວິທີທາງ ເພື່ອຫາຄໍາຕອບໃຫ້ຄອບຄົວເຫຼົ່ານັ້ນ ອັນເປັນການຢັ້ງຢືນສິດຂອງຄອບຄົວໃນການຮູ້ຂໍ້ມູນຂອງສະມາຊິກທີ່ສູນຫາຍ.”
ສຳລັບຄອບຄົວຂອງຜູ້ສູນຫາຍ ການບໍ່ຮູ້ຊະຕາກຳຂອງຄົນຮັກເປັນຄວາມທຸກທໍລະມານທີ່ຮ້າຍແຮງ. ສາມາດນໍາໄປສູ່ການພາວະອ່ອນລ້າທາງອາລົມ ຈາກການທີ່ຕ້ອງແບກຮັບຄວາມຫວັງ ແລະ ຄວາມສິ້ນຫວັງໄວ້ໃນເວລາດຽວກັນ ຄວາມໂສກເສົ້ານີ້ສາມາດປ້ອງກັນໄດ້ ໂດຍການສ້າງຊ່ອງທາງການສື່ສານລະຫວ່າງຄອບຄົວທີ່ພັດພາກຈາກກັນ, ການຈັດການຜູ້ເສຍຊີວິດຢ່າງຖືກຕ້ອງ ແລະ ການປັບປຸງກົດລະບຽບ, ສ້າງກົນໄກ ແລະ ໂຄງສ້າງທີ່ກ່ຽວຂ້ອງ ເຊັ່ນ: ມີສຳນັກງານເກັບກຳຂໍ້ມູນໃນສະຖານະການວິກິດ ແລະ ອື່ນໆ.
ICRC ສະແດງຄວາມລຳລຶກເຖິງບຸກຄົນຜູ້ທີ່ຍັງຫາຍສາບສູນ ທົ່ວໂລກ ແລະ ເສີມຂະຫຍາຍຈຸດຢືນເພື່ອຢືນຄຽງຄູ່ກັບລັດຖະບານຕ່າງໆ ທົ່ວໂລກ ໃນການຊອກຫາຜູ້ສູນຫາຍ ຜູ້ຊຶ່ງໄດ້ຮັບການຄຸ້ມຄອງໃນກົດໝາຍມະນຸດສະທຳລະຫວ່າງປະເທດ ແລະ ກົດໝາຍສິດທິມະນຸດລະຫວ່າງປະເທດ.
