ສິງກະໂປ ຈະແຈກເຄື່ອງກວດຫາເຊື້ອໂຄວິດ-19 ແບບໄວໃຫ້ຟຣີທຸກໆຄົວເຮືອນ

ຕາມແຫລ່ງຂ່າວສິງກະໂປ ລາຍງານໃຫ້ຮູ້ໃນວັນທີ 27 ສິງຫາ 2021 ວ່າ: ສິງກະໂປຈະສົ່ງເຄື່ອງກວດໂຄວິດ-19 ແບບໄວ (antigen rapid test ຫລື ART) ຈຳນວນ 6 ອັນ ໃຫ້ທຸກໆຄົວເຮືອນໂດຍບໍ່ເສຍຄ່າໃຊ້ຈ່າຍ ຜ່ານທາງໄປສະນີເລີ່ມແຕ່ວັນທີ 28 ສິງຫາ-27 ກັນຍາ 2021.

ກະຊວງສາທາລະນະສຸກ ສິງກະໂປ ລະບຸວ່າ: ປະຊາຊົນຈະມີບົດບາດສຳຄັນຫລາຍຂຶ້ນໃນການຮັບມືກັບການລະບາດຂອງພະຍາດໂຄວິດ-19 ໃນຂະນະທີ່ສິງກະໂປຄ່ອຍໆປ່ຽນຜ່ານໄປສູ່ປະເທດທີ່ຜ່ອນຜັນມາດຕະການຄວບຄຸມໂຣກລະບາດ, ປັດໄຈສຳຄັນກໍຄື ຄວາມຮັບຜິດຊອບສ່ວນບຸກຄົນຕໍ່ການກວດຫາເຊື້ອໂຄວິດ-19 ດ້ວຍຕົນເອງ ແລະ ເຝົ້າລະວັງຕິດຕາມສຸຂະພາບອາການຂອງຕົນ. ພ້ອມນີ້ຍັງໄດ້ລະບຸຕື່ມວ່າ: ລັດຖະບານບໍ່ພຽງແຕ່ຈະແຈກເຄື່ອງກວດຫາເຊື້ອໂຄວິດດັ່ງກ່າວໃຫ້ແກ່ທຸກຄົວເຮືອນໃນທົ່ວປະເທດ ແຕ່ຈະແຈກໃຫ້ນັກຮຽນ ແລະ ພະນັກງງານຂອງໂຮງຮຽນ ອະນຸບານ, ສູນພັດທະນາເດັກປະຖົມ, ໂຮງຮຽນປະຖົມສຶກສາ ແລະ ໂຮງຮຽນການສຶກສາພິເສດ ໂດຍທີ່ນັກຮຽນ ແລະ ພະນັກງານຂອງໂຮງຮຽນຈະໄດ້ຮັບຄົນລະ 3 ອັນ.

ກະຊວງສາທາລະນະສຸກ ສິງກະໂປ ໃຫ້ຮູ້ຕື່ມວ່າ: ລັດຖະບານຈະຕ້ອງປ່ຽນໄປເນັ້ນການກວດຫາເຊື້ອໂຄວິດ-19 ດ້ວຍຕົນເອງ ເຊິ່ງເປັນວິທີທີ່ມີປະສິດທິພາບໃນການຄວບຄຸມການລະບາດໃນຊຸມຊົນ ຫລັງມີອັດຕາການສັກວັກຊີນປ້ອງກັນໂຄວິດ-19 ຢູ່ໃນລະດັບສູງ. ທັງນີ້ເຄື່ອງກວດໂຄວິດແບບໄວດ້ວຍຕົນເອງຖືເປັນມາດຕະການທີ່ສະດວກ ແລະ ວ່ອງໄວ ເພື່ອສ້າງຄວາມສະບາຍໃຈໃຫ້ແກ່ຜູ້ທີ່ກັງວົນກ່ຽວກັບການຕິດເຊື້ອແບບບໍ່ສະແດງອາການ ແລະ ສ້າງຄວາມໝັ້ນໃນວ່າຊຸມຊົນທຸກແຫ່ງໃນສິງກະໂປມີຄວາມປອດໄພຫລາຍຂຶ້ນ.