ສະຫຼຸບເຫດການໂຈມຕີທີ່ສະໜາມບິນ ຄາບູ ເຮັດໃຫ້ເຮົາຮູ້ຫຍັງແດ່?
ໃນວັນທີ 26 ສິງຫາ 2021 ຜ່ານມາ, ໄດ້ເກີດເຫດລະເບີດແຕກຂຶ້ນ 2 ຄັ້ງ ຢູ່ Abbey Gate ສະໜາມບິນສາກົນ Hamid Karzai ໃນນະຄອນຫຼວງ ຄາບູ ແລະໂຮງແຮມ ທີ່ຢູ່ໃນບໍລິເວນໃກ້ຄຽງໂດຍ Abbey Gate ເປັນປະຕູຫຼັກຂອງສະໜາມບິນ ທີ່ມີກອງກຳລັງສະຫະລັດ ແລະ ອັງກິດ ປະຈຳການຢູ່ ຊຶ່ງທັງສອງຈຸດເປັນເຂດທີ່ມີປະຊາຊົນຈຳນວນຫຼາຍເຕົ້າໂຮມກັນລໍຖ້າການອົບພະຍົບໄປຢູ່ຕ່າງປະເທດ ເພື່ອລີ້ໄພ ພາຍຫຼັງທີ່ກຸ່ມຕາລີບັນຍຶດອຳນາດ ແລະ ກຽມສ້າງຕັ້ງລັດຖະບານໃໝ່ເພື່ອປົກຄອງອັຟການິສຖານ.
ມີຄົນເສຍຊີວິດຫຼາຍກວ່າ 90 ຄົນ ແລະ ບາດເຈັບຫຼາຍກວ່າ 150 ຄົນ ຊຶ່ງລວມທັງຊາວອັຟການິສຖານ ແລະ ກອງກຳລັງຕ່າງປະເທດ ໂຄສົກ ຂອງກອງບັນຊາການສູນກາງກອງທັບສະຫະລັດອາເມຣິກາ ກ່າວວ່າ: ມີເຈົ້າໜ້າທີ່ກອງທັບເສຍຊີວິດ 13 ຄົນ ໃນນີ້ມີທະຫານບົກ 10 ຄົນ ແລະ ມີຜູ້ໄດ້ຮັບບາດເຈັບອີກ 18 ຄົນ.
ກຸ່ມຕາລີບັນກ່າວວ່າ ຊາວອັຟການິສຖານທີ່ຕາຍໃນການໂຈມຕີຄັ້ງນີ້ລວມມີສະມາຊິກກຸ່ມຕາລີບານຢ່າງໜ້ອຍ 28 ຄົນ. ເຈົ້າໜ້າທີ່ເຊື່ອວ່າຜູ້ໂຈມຕີແມ່ນ ISIS-K, ຫຼື ISIS-Khorasan ຊຶ່ງເປັນສາຂາຍ່ອຍຂອງການເຄື່ອນໄຫວຂອງລັດອິສລາມ (IS) ທີ່ເຄື່ອນໄຫວຢູ່ໃນອັຟການິສຖານ ແລະ ປາກິສຖານ ໂດຍກຸ່ມດັ່ງກ່າວນີ້ຖືວ່າ: ກຸ່ມຕາລີບັນ ແລະ ອາເມຣິກາ ເປັນສັດຕູທັງສອງ.
ການໂຈມຕີດັ່ງກ່າວມີຂຶ້ນບໍ່ເທົ່າໃດຊົ່ວໂມງຫຼັງຈາກລັດຖະບານສະຫະລັດ, ອັງກິດ ແລະ ອອສເຕຣເລຍ ໄດ້ອອກປະກາດເຕືອນຄວາມສ່ຽງດ້ານການກໍ່ການຮ້າຍ ແລະ ແນະນຳ ໃຫ້ພົນລະເມືອງຂອງຕົນຫຼີກລ່ຽງການເດີນທາງ ຫຼື ການເຕົ້າໂຮມກັນຢູ່ສະໜາມບິນໃນນະຄອນຫຼວງ ຄາບູລ.
ກ່ອນທີ່ຕາລີບັນຈະເຂົ້າຍຶດເອົານະຄອນຫຼວງ ຄາບູລ ເຈົ້າໜ້າທີ່ສະຫະລັດອາເມຣິກາ ໄດ້ສະແດງຄວາມເປັນຫ່ວງກ່ຽວກັບບົດບາດຂອງ ISIS-K ໃນລະຫວ່າງການຫັນປ່ຽນອຳ ນາດໃນອັຟການິສຖານ, ເມື່ອວັນທີ 17 ສິງຫາ ຜ່ານມາ ກະຊວງປ້ອງກັນປະເທດສະຫະລັດ ກ່າວວ່າ: ISIS-K ສວຍໃຊ້ຄວາມບໍ່ສະຫງົບທາງການເມືອງ ແລະ ຄວາມຮຸນແຮງທີ່ເພີ່ມຂຶ້ນ ກໍ່ເຫດໂຈມຕີເປົ້າໝາຍພື້ນຖານໂຄງສ້າງແຕ່ເດືອນເມສາ ຫາ ເດືອນມິຖຸນາ ເພື່ອສ້າງຄວາມຢ້ານກົວ ແລະ ເນັ້ນໃຫ້ເຫັນຄວາມຈິງທີ່ວ່າລັດຖະບານອັຟການິສຖານບໍ່ສາມາດໃຫ້ຄວາມປອດໄພທີ່ດີໄດ້.
ຫຼັງຈາກການວາງລະເບີດໃນວັນທີ 26 ສິງຫາ 2021 ຜ່ານມາ, ສະຫະລັດໄດ້ເຕືອນກ່ຽວກັບການໂຈມຕີຕື່ມອີກ ໂດຍຜູ້ບັນຊາການກອງທັບສະຫະລັດອາເມຣິກາ ລະບຸວ່າໄດ້ມີການເຝົ້າລະວັງການໂຈມຕີດ້ວຍຈະຫຼວດ ຫຼື ລະເບີດລົດຢູ່ທີ່ສະໜາມບິນ.
ປະທານາທິບໍດີສະຫະລັດອາເມຣິກາ ທ່ານ ໂຈ ໄບເດັນ ປະກາດວ່າຈະຕອບໂຕ້ຜູ້ກໍ່ການຮ້າຍທີ່ ເຮັດໃຫ້ທະຫານອາເມຣິກາ ເສຍຊີວິດ ໂດຍລະບຸວ່າຈະບໍ່ໃຫ້ອະໄພ ແລະຈະຕາມລ່າເພື່ອໃຫ້ຊົດໃຊ້ກັບສິ່ງທີ່ພວກເຂົາໄດ້ກໍຂຶ້ນ.
ການໂຈມຕີດັ່ງກ່າວມີຂຶ້ນໃນຂະນະທີ່ນາໆຊາດກຳລັງເລັ່ງການອົບພະຍົບພົນລະເມືອງອອກຈາກອັຟການິສຖານພາຍໃນກຳນົດໃນວັນທີ 31 ສິງຫາ ນີ້, ເພາະເສັ້ນຕາຍທີ່ໄດ້ກຳນົດໄວ້ໂດຍສະຫະລັດ, ໃນຂະນະທີ່ສະຫະລັດກຳລັງຖືກຄວາມກົດດັນຈາກຫຼາຍປະເທດຢາກໃຫ້ຂະຫຍາຍເວລາກຳນົດການຖອນທະຫານອອກ ຊຶ່ງເປັນສິ່ງທີ່ກຸ່ມຕາລີບານຄັດຄ້ານ.
ແນວໃດກໍ່ຕາມໂຄສົກຂອງທຳນຽບຂາວ Jane Saki ໄດ້ຢືນຢັນໃນມື້ວານນີ້ (26 ສິງຫາ) ວ່າ: ທ່ານ ໂຈ ໄບເດັນ ຍັງບໍ່ທັນພິຈາລະນາວ່າຮັກສາກອງທະຫານຢູ່ໃນອັຟການິສຖານຫຼັງຈາກເສັ້ນຕາຍວັນທີ 31 ສິງຫາ, ເຖິງວ່າຈະເກີດມີການໂຈມຕີສະໜາມບິນ ຄາບູ ກໍ່ຕາມ ເພາະວ່າປະທານາທິບໍດີຍັງເຊື່ອວ່າທະຫານສະຫະລັດ ທັງຄວນອອກຈາກອັຟການິສຖານ ພາຍໃນທ້າຍເດືອນນີ້ ເພາະວ່າຜູ້ບັນຊາການທະຫານໄດ້ແນະນຳ ວ່າຈະເປັນການດີທີ່ສຸດ ສຳລັບສະຫະລັດ ທັງໄລຍະສັ້ນ ແລະ ໄລຍະຍາວ.
ເອກອັກຄະລັດຖະທູດອົງການ NATO ຄົນໜຶ່ງ ໄດ້ໃຫ້ສຳພາດກັບ ສຳນັກຂ່າວຣອຍເຕີວ່າ: ກອງກໍາລັງຕ່າງປະເທດທັງໝົດຢູ່ໃນອັຟການິສຖານ ປັດຈຸບັນນີ້ມີເປົ້າໝາຍທີ່ຈະອົບພະຍົບພົນລະເມືອງຂອງຕົນອອກຈາກອັຟການິສຖານພາຍໃນວັນທີ 30 ສິງຫາ, ລວມທັງພະນັກງານສະຖານທູດດ້ວຍ.
ອີງຕາມຂໍ້ມູນໃນນະຄອນຫລວງ ຄາບູລ ໄດ້ເປີດເຜີຍວ່າ: ປັດຈຸບັນນີ້ຄາດວ່າຍັງມີພົນລະເມືອງອາເມຣິກັນປະມານ 1,500 ຄົນ ຢູ່ໃນອັຟການິສຖານ, ສ່ວນອັງກິດຍັງມີປະມານ 400 ຄົນ ແລະ ເຢຍລະມັນ ຍັງມີປະມານ 200 ຄົນ.
ຄວາມສູນເສຍທີ່ເກີດຂຶ້ນເຮັດໃຫ້ສະຫະລັດ ຖືກວິຈານວ່າຕັດສິນໃຈຜິດພາດທີ່ເພິ່ງພາອາໄສກຸ່ມຕາລີບັນໃນການຮັກສາຄວາມປອດໄພບໍລິເວນສະໜາມບິນ ຄາບູລ ຫຼາຍເກີນໄປ ຢ່າງໃດກໍຕາມ ທ່ານ ໂຈ ໄບເດັນ ໄດ້ໂຕ້ແຍ້ງວ່ານີ້ບໍ່ແມ່ນເລື່ອງຄວາມໃວ້ບາງໃຈ ແຕ່ເປັນເລື່ອງຂອງຜົນປະໂຫຍດຮ່ວມກັນ ພ້ອມຢືນຢັນວ່າຈົນເຖິງຂະນະນີ້ຍັງບໍ່ໄດ້ຮັບຫຼັກຖານວ່າມີການສົມຮູ້ຮ່ວມຄິດ ລະຫວ່າງ ກຸ່ມຕາລີບັນ ກັບ ISIS ໃນການໂຈມຕີຄັ້ງນີ້.
ຕໍ່ ຄຳຖາມທີ່ວ່າ: ເປັນຫຍັງສະຫະລັດ ຄວນໃຫ້ຄວາມສົນໃຈກັບສິ່ງທີ່ຕາລີບັນຕ້ອງການ ໃນເມື່ອຍັງບໍ່ມີການຍອມຮັບ ຫຼື ຮັບຮອງລັດຖະບານໃໝ່ຢ່າງຖືກຕ້ອງຕາມກົດໝາຍ, ທ່ານ Anthony Blinken ລັດຖະມົນຕີ ກະຊວງການຕ່າງປະເທດສະຫະລັດ ໄດ້ຕອບວ່າດຽວນີ້ກຸ່ມຕາລີບັນຄວບຄຸມ ພື້ນທີ່ສ່ວຍຫລາຍຂອງປະເທດເກືອບທັງໝົດແລ້ວ ລວມທັງນະຄອນຫລວງ ຄາບູລ ບໍ່ວ່າພວກເຮົາຈະມັກພວກເຂົາ ຫຼື ບໍ່ ມັນເປັນສິ່ງສໍາຄັນທີ່ສະຫະລັດ ຈະເຮັດວຽກກັບຮ່ວມເຂົາພວກເພື່ອອຳນວຍຄວາມສະດວກໃນການອົບພະຍົບປະຊາຊົນອອກຈາກທີ່ນັ້ນ ນອກນີ້ລາວຍັງໄດ້ເປີດເຜີຍອີກວ່າ: ສະຫະລັດ ຍັງມີການເຈລະຈາກັບພວກຕາລີບັນກ່ຽວກັບສິ່ງທີ່ຈະເກີດຂຶ້ນຫຼັງຈາກສະຫະລັດ ຖອນທະຫານອອກທັງໝົດ ດ້ວຍຄວາມຫວັງທີ່ຈະແກ້ໄຂບັນຫາຄວາມຂັດແຍ້ງໃນອັຟການິສຖານໄດ້ໂດຍສັນຕິວິທີ.
