ສປປ ລາວ ຍັງມີສິ່ງທ້າທາຍຕໍ່ການລະບາດພະຍາດໂຄວິດ-19

ທ່ານ ດຣ ນາງ ບົວຜັນ ຄຳພາພົງຜ່ານ ຮອງຫົວໜ້າສູນວິເຄາະ ແລະ ລະບາດວິທະຍາ ກະຊວງສາທາລະນະສຸກ ໄດ້ລາຍງານໃຫ້ຮູ້ ເມື່ອບໍ່ດົນມານີ້ວ່າ: ປັດຈຸບັນ ສປປ ລາວກຳລັງຮັບມືກັບແຮງງານລາວທີ່ກັບຄືນມາຈາກປະເທດໃກ້ຄຽງທີ່ມີການລະບາດພະຍາດໂຄວິດ-19 ຢ່າງໜັກໜ່ວງ, ເຊິ່ງມີອັດຕາການກວດພົບເຊື້ອສູງເຖິງ 30-50% ແລະ ໃນຈຳນວນຜູ້ຕິດເຊື້ອນີ້ສ່ວນຫລາຍແມ່ນສາຍພັນເດລຕາ ເຊິ່ງເປັນສາຍພັນທີ່ແພ່ລາມໄດ້ໄວກວ່າສາຍພັນອື່ນ. ນອກນີ້ການກວດພົບການຕິດເຊື້ອໃນກຸ່ມແຮງງານນັ້ນແມ່ນພົບມື້ທີ 12 ຂອງການກັກຕົວ ແລະ ບາງກໍລະນີ ທີ່ສຳເລັດການກັກຕົວ 14 ວັນແລ້ວ, ເຊິ່ງມີຄວາມເປັນໄປໄດ້ສູງທີ່ຈະມີການຕິດເຊື້ອພາຍໃນສູນ, ນັບແຕ່ເດືອນເມສາເປັນຕົ້ນມາ ມີພະນັກງານດ່ານໜ້າ ຕິດເຊື້ອແລ້ວ 108 ຄົນ ໃນນີ້ລວມມີ ພະນັກງານທີ່ປະຈຳຢູ່ດ່ານ, ສູນຈຳກັດບໍລິເວນ, ສູນປິ່ນປົວ ແລະ ພະນັກງານກ່ຽວຂ້ອງ ທີ່ປະຕິບັດວຽກງານກ່ຽວກັບການໂຕ້ຕອບ ກັບພະຍາດໂຄວິດ-19, ມີການລາຍງານກໍລະນີຕິດເຊື້ອພາຍໃນ ຫລື ການຕິດເຊື້ອໃນຊຸມຊົນ ໃນບາງແຂວງມີກໍລະນີຜູ້ຕິດເຊື້ອໃນບ່ອນແອອັດ ເຊັ່ນ: ຄຸມຂັງ, ໂຮງງານ ແລະ ບາງຫ້ອງການ  ແລະ ບ່ອນອື່ນໆ.

ທັງໝົດນີ້ກໍເປັນສິ່ງທ້າທາຍໃນການຕອບໂຕ້, ສະກັດກັ້ນ ແລະ ແກ້ໄຂການແພ່ລະບາດພະຍາດໂຄວິດ-19 ຢູ່ ສປປ ລາວ. ພ້ອມດຽວກັນນີ້, ໃນທິດທາງຕໍ່ໜ້າເຮົາຕ້ອງເອົາໃຈໃສ່ການຈຳກັດບໍລິເວນ ແລະ ການຂົນສົ່ງທີ່ປອດໄພ ເພື່ອຫລຸດຜ່ອນຄວາມສ່ຽງ ໃນການແຜ່ເຊື້ອໃນສູນ ແລະ ໄລຍະການຂົນສົ່ງ ຢ່າງເຂັ້ມງວດ, ສືບຕໍ່ປະຕິບັດມາດຕະການປ້ອງກັນ ຕາມທີ່ຄະນະສະເພາະກິດວາງອອກ ແລະ ມີການປະເມີນສະພາບການເປັນໄລຍະ, ເນັ້ນການຄົ້ນຫາກໍລະນີທີ່ໄວ ແລະ ການຕິດຕາມກໍລະນີສຳຜັດໃກ້ຊິດທີ່ເຄັ່ງຄັດ, ການມີສະຕິສູງ ແລະ ການຮ່ວມມືຂອງສັງຄົມຖືເປັນປັດໃຈສຳຄັນໃນການປ້ອງກັນ. ເນັ້ນຄວາມເປັນເຈົ້າການຂອງທົ່ວສັງຄົມ ລວມທັງອົງການປົກຄອງແຕ່ລະຂັ້ນ ນັບຈາກສູນກາງຈົນເຖິງຂັ້ນທ້ອງຖິ່ນ.