ກົມພາສີ ເຜີຍແຜ່-ແນະນໍາການຈັດຕັ້ງປະຕິບັດກົດໝາຍວ່າດ້ວຍພາສີ ເລກທີ 81 ໃຫ້ເຈົ້າໜ້າທີ່ພາສີທົ່ວປະເທດ

ວັນທີ 26 ສິງຫາ 2021 ນີ້, ກົມພາສີ ກະຊວງການເງິນ, ໄດ້ຈັດກອງປະຊຸມເຜີຍແຜ່ຄໍາແນະນໍາກ່ຽວກັບການຈັດຕັ້ງປະຕິບັດກົດໝາຍວ່າດ້ວຍພາສີ ສະບັບປຸງເລກທີ 81/ສພຊ, ຜ່ານລະບົບກອງປະຊຸມທາງໄກ, ໂດຍການເປັນປະທານຂອງທ່ານ ຄໍາມິດ ໄຊອາສາ ຮອງຫົວໜ້າກົມພາສີ ກະຊວງການເງິນ, ມີບັນດາຫົວໜ້າພະແນກ-ຮອງຫົວໜ້າພະແນກ, ກອງຄຸ້ມຄອງພາສີ, ກອງກວດກາພາສີປະຈຳແຂວງ, ດ່ານພາສີຊາຍແດນ ແລະ ເຈົ້າໜ້າທີ່ພາສີໃນຂອບເຂດທົ່ວປະເທດເຂົ້າຮ່ວມ.

ໃນກອງປະຊຸມ,ທ່ານ ຄໍາມິດ ໄຊອາສາ ໄດ້ເຜີຍແຜ່ກ່ຽວກັບຄໍາແນະນໍາການຈັດຕັ້ງປະຕິບັດກົດໝາຍວ່າດ້ວຍພາສີ ສະບັບເລກທີ 3269/ກງ, ລົງວັນທີ 26 ກໍລະກົດ 2021 ຍົກໃຫ້ເຫັນພາບລວມດ້ານເນື້ອໃນຂອງຄຳແນະນຳ ສະບັບນີ້, ຊຶ່ງແບ່ງອອກເປັນ 8 ເນື້ອໃນໃຫຍ່ຄື: ພາກການແຈ້ງພາສີ. ໃນນີ້, ມີການແຈ້ງພາສີໂດຍສັງເຂບ ແລະ ການແຈ້ງພາສີເປັນລາຍລະອຽດ, ມູນຄ່າແຈ້ງ, ການຈັດລະຫັດ, ການກວດກາແຫຼ່ງກຳເນີດ, ການບໍລິຫານຄວາມສ່ຽງ, ການ ຄໍ້າປະກັນ ແລະ ການຄວບຄຸມທາງພາສີ, ພາກການຜ່ານແດນ, ການນໍາເຂົ້າເພື່ອສົ່ງອອກ, ລະບົບສາງພາສີ, ພາກການຄຸ້ມຄອງການນຳເຂົ້າຊົ່ວຄາວ ແລະ ຄຸ້ມຄອງການລົງທຶນ, ພາກການເລື່ອນຊຳລະ, ການສະເໜີຂໍເງິນຄືນ, ພາກການກວດສອບຄືນການແຈ້ງພາສີ, ພາກຖານຂໍ້ມູນ, ພາກດຳເນີນຄະດີ, ຊຶ່ງທັງໝົດນັ້ນແມ່ນເນື້ອໃນສຳຄັນທີ່ຄະນະສ້າງ ແລະ ປັບປຸງຄຳແນະນຳ ກໍຄືກົມພາສີໄດ້ຄົ້ນຄວ້າ, ຮຽບຮຽງເນື້ອໃນເຂົ້າໃຫ້ສອດຄ່ອງກັບລະບຽບການພາຍໃນ ແລະ ສາກົນ ເພື່ອຈັດຕັ້ງຜັນຂະຫຍາຍເນື້ອໃນບາງມາດຕາຂອງກົດໝາຍໃຫ້ເປັນອັນລະອຽດຊັດເຈນ ແລະ ເປັນຄູ່ມືໃນການຈັດຕັ້ງປະຕິບັດໜ້າທີ່ວິຊາສະເພາະໃຫ້ມີຄວາມເປັນເອກະພາບ ແລະ ມີຜົນສຳເລັດ.

ໃນກອງປະຊຸມທ່ານ ສົມປະສົງ ອໍາແພງໄພ ຫົວໜ້າພະແນກນິຕິກໍາ ກົມພາສີ ຍັງໄດ້ແນະນໍາຂັ້ນຕອນການແຈ້ງພາສີ, ການນໍາໃຊ້ໃບຂົນສົ່ງສິນຄ້າ, ວິທີການແຈ້ງພາສີໂດຍສັງເຂບ ຜ່ານລະບົບການແຈ້ງພາສີປະຕູດຽວ ແລະ ວິທີການນໍາໃຊ້ແບບພິມທີ່ລັດຖະການພາສີກໍານົດ, ກົນໄກການຄຸ້ມຄອງ ການແຈ້ງພາສີ ແລະ ວິທີການແຈ້ງພາສີເປັນລາຍລະອຽດໂດຍການປະກອບຂໍ້ມູນ ແລະ ເອກະສານແຈ້ງພາສີເປັນລາຍລະອຽດພ້ອມທັງໃຫ້ຮູ້ວິທີການຮັບ ແລະ ກວດກາເບື້ອງຕົ້ນອີກດ້ວຍ.

ທັງນີ້, ກໍ່ເພື່ອໃຫ້ບັນດາຫົວໜ້າພະແນກຮອງພະແນກ, ກອງຄຸ້ມຄອງພາສີ, ກອງກວດກາພາສີປະຈຳແຂວງ, ດ່ານພາສີຊາຍແດນ ແລະ ເຈົ້າໜ້າທີ່ພາສີໄດ້ຄົ້ນຄວ້າ ເຊື່ອມຊືມ ສ້າງຄວາມຮັບຮູ້ ແລະ ເຂົ້າໃຈເພື່ອນຳໄປຈັດຕັ້ງປະຕິບັດໄດ້ໃຫ້ມີຄວາມເປັນເອກະພາບ ແລະ ມີຜົນສຳເລັດ.