ດ່ວນ!! ເມືອງຫ້ວຍຊາຍ ແຂວງບໍ່ແກ້ວ ແຈ້ງປິດການເຂົ້າ-ອອກພາຍໃນຂອບເຂດບ້ານ ພິບຸນທອງ ແລະ ຕະຫລາດສີດອນມີ ເປັນການຊົ່ວຄາວ ຫລັງມີຜູ້ຕິດເຊື້ອ

ເນື່ອງຈາກສະພາບການແຜ່ລະບາດຂອງເຊື້ອພະຍາດໂຄວິດ-19 ຢູ່ພາຍໃນ ສປປ ລາວ, ໂດຍສະເພາະຢູ່ ເມືອງຫ້ວຍຊາຍ ແຂວງບໍ່ແກ້ວ ໄດ້ກວດພົບຈໍານວນຜູ້ຕິດເຊື້ອພະຍາດໂຄວິດ-19 ຮອບໃໝ່ເກີດຂຶ້ນໃນແຕ່ລະວັນ, ເພື່ອເປັນການປ້ອງກັນ ແລະ ສະກັດກັ້ນແພ່ເຊື້ອບໍ່ໃຫ້ແຜ່ຂະຫຍາຍເປັນວົງກວ້າງ ຄະນະສະເພາະກິດ ຂັ້ນເມືອງຫ້ວຍຊາຍ ຈຶ່ງມີຄວາມຈໍາເປັນອອກແຈ້ງການເພື່ອປິດການເຂົ້າ-ອອກບ້ານ ພິບຸນທອງ ເຫັນວ່າມີຜູ້ຕິດເຊື້ອ ພະຍາດໂຄວິດ-19 ເພີ່ມໃໝ່ 1 ກໍລະນີ ຈຶ່ງກໍານົດເປັນ (ບ້ານ ສີແດງ) ແລະ ກໍານົດບ້ານທີ່ມີຜູ້ສໍາພັດເປັນ (ບ້ານສີເຫລືອງ) ເພື່ອເຝົ້າລະວັງດັ່ງນີ້:

1. ໃຫ້ປິດການເຂົ້າ-ອອກ ພາຍໃນຂອບເຂດບ້ານ ພິບູນທອງ ນັບແຕ່ ເວລາ 10:00 ໂມງຂອງ ວັນທີ 26 ສິງຫາ-8 ກັນຍາ 2021 ໂດຍໃຫ້ ປິດການສັນຈອນໄປ-ມາພາຍໃນບ້ານ, ຍົກເວັ້ນເຈົ້າໜ້າທີ່, ພະນັກງານທີ່ປະຈໍາການ, ກວດກາລາດຕະເວນ, ຄົນເຈັບທີ່ຕ້ອງໄດ້ຮັບການປິ່ນປົວໂດຍດ່ວນ ແລະ ຜູ້ອອກໄປຊື້ອາຫານ.
2. ໃຫ້ປິດການບໍລິການຕະຫລາດສີດອນມີ, ຮ້ານອາຫານ, ຮ້ານກິນດື່ມ, ຮ້ານຕັດຜົມ ແລະ ຮ້ານເສີມຄວາມງາມ ໃນບໍລິເວນບ້ານ ພິບູນທອງ ແລະ ຕະຫຼາດສີດອນມີ ເປັນການຊົ່ວຄາວ.
3. ໃຫ້ກໍານົດບ້ານ ປາກສາວເໜືອ, ບ້ານ ປາກຮາວໃຕ້, ບ້ານ ອຸດົມ, ບ້ານ ມົກກະຈອກ, ບ້ານ ຂອນແກ້ວ ບ້ານ ດອນຄູນ ແລະ ບ້ານ ຫ້ວຍມອນ ເປັນບ້ານ ສີເຫລືອງ ທີ່ຕ້ອງໄດ້ເຝົ້າລະວັງ ຈໍາກັດການເຂົ້າອອກຂອງປະຊາຊົນພາຍໃນ ບ້ານ ຢ່າງເຂັ້ມງວດ.
4. ມອບໃຫ້ຄະນະພັກຊີ້ນໍາກຸ່ມບ້ານ ສົມທົບກັບ ສອງກໍາລັງ ປກຊ-ປກສ ເມືອງ, ເລຂາຄະນະພັກຮາກຖານ, ເລຂາພັກບ້ານ-ນາຍບ້ານ ຊີ້ນໍານໍາພາ ປກຊ-ປກສ ບ້ານເປັນເຈົ້າການປິດບ້ານ (ບ້ານ ສີແດງ) , ຕິດຕາມ, ກວດກາ ເຝົ້າລະວັງການເຂົ້າ-ອອກ (ບ້ານ ສີເຫລືອງ) ລາດຕະເວນຕາມຊາຍແດນ, ຕະຫລອດການເຂົ້າ-ອອກ ຢູ່ພາຍໃນບ້ານ ແລະ ສະຖານທີ່ຕ່າງໆ ທີ່ໄດ້ແຈ້ງການປິດ-ເຝົ້າລະວັງຢ່າງເຂັ້ມງວດ, ພ້ອມທັງປະຕິບັດມາດຕະການຕໍ່ຜູ້ເມີດ ຕາມ ລະບຽບກົດຫມາຍ.
5. ມອບໃຫ້ຫ້ອງການອຸດສາຫະກໍາ ແລະ ການຄ້າເມືອງ ສົມທົບກັບພາກສ່ວນທີ່ກ່ຽວຂ້ອງ ເປັນເຈົ້າການຕິດຕາມ, ກວດກາ ຕະຫລາດທີ່ມີແຈ້ງການປິດ ແລະ ແນະນໍາການບໍລິການ, ປະຕິບັດມາດຕະການຂອງບັນດາຮ້ານຄ້າຂາຍຍ່ອຍໃນຂອບເຂດຮັບຜິດຊອບຂອງຕົ້ນຢ່າງເຂັ້ມງວດ.
6. ໃນການຈັດຕັ້ງປະຕິບັດຕົວຈິງແມ່ນມອບທຸກອົງການຈັດຕັ້ງ, ຫ້ອງການອ້ອມຂ້າງເມືອງ, ຂະແໜງການ ກ່ຽວຂ້ອງທຸກພາກສ່ວນ ທີ່ໄດ້ຮັບມອບໝາຍ ຈົ່ງໄດ້ເພີ່ມທະວີເອົາໃຈໃສ່ໃນການຕິດຕາມ, ກວດກາ, ລາຍງານໃຫ້ ຄະນະສະເພາະກິດ ແລະ ກອງເລຂາຄະນະສະເພາະກິດ ຂັ້ນເມືອງ ຮັບຊາບເປັນແຕ່ລະໄລຍະ ແລະ ພ້ອມກັນແກ້ໄຂ ຢ່າງທັນເວລາ.
7. ສ່ວນມາດຕະການອື່ນໆ ໃນການປ້ອງກັນແກ້ໄຂພະຍາດໂຄວິດ-19 ແມ່ນໃຫ້ປະຕິບັດຕາມແຈ້ງການຂອງຫ້ອງ ວ່າການແຂວງສະບັບເລກທີ 913/ຫວຂ.ບກ, ລົງວັນທີ 20 ສິງຫາ 2001 ແລະ ແຈ້ງການຫ້ອງວ່າການເມືອງສະບັບ ເລກທີ 345/ຫວມ.ຫຊ, ລົງວັນທີ 20 ສິງຫາ 2001 ໄດ້ອອກໄປກ່ອນໜ້ານີ້.

ດັ່ງນັ້ນ, ຈຶ່ງແຈ້ງມາຍັງບັນດາທ່ານ ເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້ຢ່າງເຂັ້ມງວດຈົນ ກວ່າຈະມີແຈ້ງການຄືນໃໝ່.