ເວທີປຶກສາຫາລືພັດທະນາສື່ແບບໃໝ່

ສະມາຄົມນັກຂ່າວແຫ່ງ ສປປ ລາວ (ສຂລ) ຮ່ວມກັບວິທະຍຸສາກົນ ແຫ່ງປະເທດຈີນ (CRI) ປະຈຳລາວ ໄດ້ຈັດ “ເວທີປຶກສາຫາລືການພັດທະນາສື່ແບບໃໝ່ ”  ໃນວັນທີ  26 ສິງຫາ 2021 ນີ້ທີ່ໂຮງແຮມ ແລນມາກ, ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ສະຫວັນຄອນ ຣາຊະມົນຕຣີ ປະທານ ສຂລ; ມີທ່ານ ນາງ MO Xiaoling (ແສງແກ້ວ) ຫົວໜ້າ CRI ປະຈຳລາວ, ມີບັນດາຄະນະນໍາສື່ມວນຊົນ ແລະ ນັກຂ່າວ  ຈາກພາກລັດ-ພາກເອກະຊົນ ເຂົ້າຮ່ວມເປັນຈຳນວນ.

ໃນຍຸກສະໄຫມປັດຈຸບັນການພັດທະນາສື່ແບບໃໝ່ເປັນວຽກທີ່ມີຄວາມໝາຍສໍາຄັນຍິ່ງເພື່ອພັດທະນາຖັນແຖວສື່ມວນຊົນລາວໃຫ້ສາມາດເຊື່ອມໂຍງກັບສາກົນ, ດັ່ງນັ້ນການຮ່ວມກັນປຶກສາຫາລືໃນຄັ້ງນີ້ມັນເປັນໂອກາດອັນດີໃນການນໍາໃຊ້ສື່ແບບໃໝ່ໃຫ້ເປັນສື່ຫຼັກ ແລະ ເປັນສື່ທີ່ມີຄ່ານິຍົມສູງ, ຕໍ່ຜະລິດຕະພັນສື່ມວນຊົນລາວນັບທັງເນື້ອໃນ ແລະ ຮູບແບບ, ດັ່ງນັ້ນການແລກປ່ຽນບົດຮຽນກັບສື່ຫຼັກຂອງຈີນທີ່ນໍາໃຊ້ສື່ແບບໃໝ່ໃນຄັ້ງນີ້ຈະນຳຜົນປະໂຫຍດສູງມາສູ່ສື່ມວນຊົນລາວເຮົາ, ພ້ອມນີ້, ໃນພະທີດັ່ງກ່າວຍັງໄດ້ຮັບຟັງການສົນທະນາ, ແລກປ່ຽນຄໍາຄິດຄຳເຫັນໃນຫຼາຍດ້ານ ຕິດພັນກັບສື່ມວນຊົນ ແລະ ວຽກອື່ນໆ ທີ່ປິ່ນອ້ອມຈາກບັນດາທ່ານເອກອັກຄະລັດຖະ ທູດ, ຄະນະນໍາຈາກສະພາອຸດສາຫະກໍາ ແລະ ການຄ້າ ແລະ ຜູ້ຊ່ຽວຊານດ້ານເຕັກໂນໂລຊີ; ນອກນັ້ນ, ຍັງມີການແລກປ່ຽນບົດຮຽນ ຜ່ານສື່ອອນລາຍຈາກ CRI ທີ່ປັກກິ່ງ ແລະ ຈາກອົງການສື່ມວນຊົນຕ່າງແຂວງ ອີກດ້ວຍ.

ໃນຄຳປາໃສກ່າວເປີດກແງປະຊຸມທ່ານປະທານ ສຂລ ໄດ້ຕີລາຄາສູງ ຕໍ່ການພົວພັນ,ຮ່ວມມືທີ່ດີງາມລະຫວ່າງ ລາວ-ຈີນໃນໄລຍະຜ່ານມາ, ໂດຍສະເພາະປີນີ້ ເປັນປີທີ່ມີຄວາມໝາຍສໍາຄັນຍິ່ງຕໍ່ການພົວພັນ,ຮ່ວມມືລະຫວ່າງ ລາວ-ຈີນ ນັບທັງສູນກາງ ແລະ ທ້ອງຖິ່ນ ໃນຫານໂຄສະນາໃຫ້ແກ່ປີມິດຕະພາບລາວ-ຈີນ ຄົບຮອບ 60 ປີ ແລະ ເຫດການສຳຄັນອື່ນໆອີກ.

ໃນໂອກາດນີ້ ສື່ມວນຊົນລາວ ແລະ ຈີນ ຍັງໄດ້ພົບປະຫາລື ແລກປ່ຽນບົດຮຽນແລະປະສົບການຕ່າງໆຊຶ່ງກັນ ແລະ ກັນນຳອີກ .