ຄົນ 7 ປະເພດ ຢ່າຄິດເສຍດາຍທີ່ຕ້ອງຕັດອອກຈາກຊີວິດ

ຄົງບໍ່ມີໃຜຢາກຈະທຳລາຍມິດຕະພາບດີໆທີ່ສ້າງຂຶ້ນມານຳກັນດອກ, ແຕ່ຖ້າມີຝ່າຍໃດຝ່າຍໜຶ່ງປ່ຽນໄປຈາກແຕ່ກ່ອນ ບໍ່ຄືເກົ່າແລ້ວ ຫລື ເປັນໂຕເຮົາເອງທີ່ຫາກໍຮູ້ນິໄສບາງຢ່າງທີ່ບໍ່ໜ້າປະທັບ ໃຈຂອງເຂົາ, ເຕືອນໂດຍກົງແລ້ວ, ເຕືອນແບບອ້ອມໆແລ້ວ ກໍບໍ່ຍອມປ່ຽນ. ສະນັ້ນແລ້ວ ທ່ານຄວນຖາມຕົນເອງໄດ້ແລ້ວວ່າກຸ້ມ ຄ່າຫລືບໍ່ທີ່ຈະຮັກສາຄວາມສຳພັນແບບນີ້ເອົາໄວ້ຕໍ່ໄປ ?

1. ຄົນທີ່ມີແຕ່ຄຳເວົ້າບໍ່ດີໃຫ້ເຮົາ : ຍ້ອນຄຳເວົ້າຂອງຄົນຜູ້ນັ້ນ ມັກບອກຫຍັງໄດ້ຫລາຍຢ່າງ ບໍ່ວ່າຈະເປັນທັດສະນະຄະຕິ, ການໃຊ້ຊີວິດ ຖ້າຄົບເປັນໝູ່ກັນມາຈັກໄລຍະໜຶ່ງ ຈົນພິສູດໄດ້ແລ້ວວ່າ ໝູ່ຜູ້ນີ້ໃຊ້ຄຳເວົ້າບໍ່ດີກັບເຮົາ, ບໍ່ວ່າຈະແບບຈົງໃຈ ຫລືບໍ່ກໍຕາມ ເຮົາກໍບໍ່ຄວນທົນຢູ່ກັບການຖືກບັ່ນທອນຄວາມຮູ້ສຶກແບບນີ້ ເຮົາຄວນມີຊີວິດທີ່ດີກ່ວານີ້.
2. ຄົນທີ່ເອົາແຕ່ອິດສາ : ຍ້ອນໝູ່ປະເພດທີ່ມັກປຽບທຽບສອດສ່ອງຊີວິດເຮົາຕະຫລອດ ພວກເຂົານັ້ນບໍ່ແມ່ນເປັນຫ່ວງ, ແຕ່ຍ້ອນອິດສາ ຢາກໄດ້ຢາກດີກ່ວາເຮົາ ໂດຍທີ່ເຮົາກໍຢູ່ຂອງເຮົາດີໆ ຍັງມັກມາເຮັດໃຫ້ເສຍຄວາມຮູ້ສຶກຢູ່ຕະຫລອດ ຄົນ ແບບນີ້ເຮົາບໍ່ສົມຄວນຈະຄົບຫາຕໍ່ໄປ ເພາະຄົນປະເພດນີ້ຈະບໍ່ມີມື້ຈິງໃຈກັບເຮົາຫາກຕົນເອງບໍ່ໄດ້ເໜືອກ່ວາ ຢູ່ນຳກັນແລ້ວກໍມີແຕ່ເສຍສຸຂະພາບຈິດ ເມື່ອຍລ້າ.
3. ພໍ້ກັນກໍເວົ້າແຕ່ເລື່ອງເງິນ : ເຊັ່ນ ຂໍຢືມເງິນແດ່ ຫລື ຕິດໜີ້ໄວ້ກ່ອນ ແລ້ວຈະສົ່ງຄືນແນ່ນອນ ເຊິ່ງເປັນຄຳເວົ້າຕິດປາກ, ສົ່ງຄືນແດ່ ບໍ່ສົ່ງແດ່ເປັນນິໄສ, ເວົ້າໄປທາງບໍ່ສົ່ງຄືນຫລາຍກ່ວາ ເຫດຜົນກໍຕ່າງໆນາໆທີ່ເຂົາຈະຍົກມາອ້າງ, ຕ້ອງຄິດໄດ້ແລ້ວວ່າເຂົາຄົບຫາກັບທ່ານຍ້ອນຢາກເປັນໝູ່ ຫລື ຢາກໄດ້ຜົນປະໂຫຍດກັນແທ້ ເພື່ອຄວາມໝັ້ນຄົງທາງການເງິນ ຢູ່ ຫ່າງໆເຂົາໄວ້ດີກ່ວາ.
4. ຄົນທີ່ເວົ້າເຖິງແຕ່ເລື່ອງຕົນເອງ : ຍ້ອນເກີນ 90% ຂອງບົດສົນທະນາສ່ວນຫລາຍນັ້ນຈະເປັນເລື່ອງຊີວິດຂອງໝູ່ປະເພດນີ້ ເຊັ່ນ : ເລື່ອງຢູ່ເຮືອນ, ເລື່ອງກິນ, ຊີວິດດີໆ ລວມໄປເຖິງຊີວິດບໍ່ດີ ເຂົາຈະຕັ້ງໃຈເລົ່າໃຫ້ທ່ານຟັງ ບາງເທື່ອເຮົາເອງກໍມີເລື່ອງໜັກໃຈຢາກລະບາຍແດ່ ຖ້າເປັນຄົນປະເພດນີ້ທີ່ບໍ່ເປີດໂອກາດໃຫ້ເຮົາໄດ້ເວົ້າເລີຍ ຫລື ຮູ້ສຶກບໍ່ດີສະເໝີ ເວລາລົມກັນ ແບບນີ້ ຫ່າງອອກມາດີກ່ວາ.
5. ຄົນທີ່ຕໍ່ໜ້າເປັນແບບໜຶ່ງ ລັບຫລັງເປັນອີກແບບໜຶ່ງ : ຫລາຍຄົນເຄີຍພົບມາແນ່ນອນ ປະເພດທີ່ຢູ່ຕໍ່ໜ້າເປັນແນວໜຶ່ງ ເວົ້າຈາດີ ຮູ້ຈັກເອົາອົກເອົາໃຈ ເຂົ້າຂ້າງທ່ານສາລະພັດຫລວງຫລາຍ, ແຕ່ເມື່ອລັບຫລັງທ່ານ ຊ້ຳພັດເອົາເລື່ອງທີ່ທ່ານ ເວົ້າໄປເວົ້າອີກແບບໜຶ່ງ ໃຫ້ຄົນອື່ນຟັງ. ສະນັ້ນແລ້ວ ຄົບເປັນໝູ່ມາດົນກ່ວາຈະຮູ້ໂຕ ຄວາມເຂົ້າໃຈຜິດຕ່າງໆກໍລຸກລາມ ບານປາຍຈົນແກ້ໄຂບໍ່ໄດ້ແລ້ວ ຄົນແບບນີ້ຄວນຢູ່ໃຫ້ຫ່າງ ບໍ່ເລົ່າເລື່ອງສ່ວນໂຕນຳອີກ ບໍ່ດີຕໍ່ຊີວິດຂອງທ່ານແນ່ນອນ.
6. ຄົນທີ່ທ່ານຢູ່ນຳແລ້ວບໍ່ມີຄວາມສຸກ : ເພາະມີຄົນບາງປະເພດທີ່ເຖິງຈະບໍ່ໄດ້ມີນິໄສບໍ່ດີໃຫ້ເຫັນ, ແຕ່ລວມໆແລ້ວຄື ຢູ່ນຳແລ້ວບໍ່ມີຄວາມສຸກນັ້ນເອງ ແລະ ກໍບໍ່ແມ່ນເລື່ອງທີ່ທ່ານຈະຕ້ອງທົນອີກຕໍ່ໄປ ໂດຍສະເພາະຢ່າງຍິ່ງ ຫາກທ່ານລອງປັບ ໂຕເອງເຂົ້າຫາແລ້ວ ໝູ່ຄົນນີ້ຍັງເຮັດໃຫ້ທ່ານຮູ້ສຶກບໍ່ດີຕື່ມອີກ ກໍບໍ່ມີເຫດຜົນທີ່ຈະຕ້ອງທົນຄົບກັນອີກຕໍ່ໄປ ໝູ່ມີຫລວງ ຫລາຍ ເລືອກຄົບຄົນທີ່ເຂົາດີໆ ຊີວິດຈະໄດ້ພົບແຕ່ສິ່ງດີໆ.
7. ຄົນທີ່ຖ່ວງດຶງຊີວິດເຮົາໃຫ້ຕົກຕ່ຳ : ເມື່ອໃດທີ່ທ່ານເປັນໝູ່ກັນແລ້ວ ມັນກໍຍ່ອມຕ້ອງເຖິງໃສເຖິງກັນ ຍ່າງໄປນຳກັນໄດ້ ສະເໝີ, ແຕ່ຫາກໝູ່ຄົນນີ້ ເຂົາມັກພາທ່ານໄປຍັງທິດທາງທີ່ເສື່ອມຖອຍ ບໍ່ວ່າຈະເປັນເລື່ອງການໃຊ້ຊີວິດ, ວຽກງານ, ສຸຂະພາບ ແມ່ນແຕ່ຈິດໃຈ ມີແຕ່ເລື່ອງຈົມລົງໆຕັ້ງແຕ່ຄົບຫາກັບຄົນຜູ້ນີ້ ກໍບໍ່ມີເຫດຜົນຫຍັງໃຫ້ທ່ານຄົບຫາກັບເຂົາຕໍ່ໄປ ເມື່ອຮູ້ໂຕກໍກ້າວອອກມາຈາກວົງຈອນຊີວິດແບບນີ້ໄດ້ແລ້ວ.