ມື້ນີ້ໃນອະດີດ! 25 ສິງຫາ 2012 ທ່ານ ນີລ ອາມສະຕອງ (Neil Armstrong) ເສຍຊີວິດ ດ້ວຍອາຍຸໄດ້ 82 ປີ.

ທ່ານ ນີລ ອາມສະຕອງ ນັກບິນອາວະກາດຊາວອາເມຣິກາ ຜູ້ສ້າງປະຫວັດສາດເປັນມະນຸດຄົນທຳອິດທີ່ໄດ້ຢຽບດວງຈັນ ທ່ານໄດ້ເສຍຊີວິດລົງດ້ວຍອາຍຸ 82 ປີ ໃນວັນທີ 25 ສິງຫາ 2012, ຊີວິດນັກບິນອາວະກາດຄົນນີ້ ເລີ່ມຕົ້ນເປັນທະຫານຮັບໃຊ້ໃນສົງຄາມຫວຽດນາມ ກ່ອນຈະເຂົ້າຮັບຕໍາແໜ່ງເປັນນັກບິນຄົ້ນຄວ້າພົນລະເຮືອນຂອງຄະນະທີ່ປຶກສາດ້ານການບິນແຫ່ງຊາດຂອງສະຫະລັດອາເມຣິກາ (NACA), ຕໍ່ມາແມ່ນ ‘NASA’ ຫຼື ອົງການບໍລິຫານການບິນ ແລະ ອາວະກາດແຫ່ງຊາດໃນທຸກມື້ນີ້.

ທ່ານ ນີລ ອາມສະຕອງ ປະຕິບັດພາລະກິດໃນໂຄງການ Gemini ແລະ Apollo ລາວເປັນຜູ້ບັນຊາການໂຄງການອາໂປໂລ 11, ເຊິ່ງມີເປົ້າຫມາຍທີ່ຈະລົງຈອດຍານອາວະກາດຢູ່ເທິງດວງຈັນ ມີສະມາຊິກທີມແມ່ນ Edwin Aldrin ແລະ Michael Collins. ໃນວັນທີ 20 ກໍລະກົດ 1969, ທ່ານ ນີລ ອາມສະຕອງ ຍ່າງຢູ່ເທິງດວງຈັນດ້ວຍຂາຊ້າຍຂອງລາວ ພ້ອມກັບເວົ້າປະໂຫຍກປະຫວັດສາດນັ້ນວ່າ“ ນີ້ເປັນບາດກ້າວນ້ອຍໆຂອງຜູ້ຊາຍຄົນຫນຶ່ງ ແຕ່ເປັນບາດກ້າວອັນຍິ່ງໃຫຍ່ສໍາລັບມະນຸດຊາດ.”

ການເສຍຊີວິດຂອງລາວໃນອາຍຸ 82 ປີ ໃນມື້ນີ້ໃນປີ 2012, ໄດ້ນຳຄວາມຊົງຈຳກັບຄືນມາສູ່ພາລະກິດອັນຍິ່ງໃຫຍ່ຂອງລາວຕໍ່ກັບມວນມະນຸດໃນເວລານັ້ນ ປະທານາທິບໍດີສະຫະລັດອາເມຣິກາທ່ານ ບາຣັກ ໂອບາມາ ໄດ້ສັນລະເສີນທ່ານ ນີລ ອາມສະຕອງ ວ່າລາວເປັນວິລະບຸລຸດຊາວອາເມລິກາທີ່ຍິ່ງໃຫຍ່ທີ່ສຸດ ບໍ່ພຽງແຕ່ໃນຊ່ວງເວລາຂອງລາວເທົ່ານັ້ນ ແຕ່ວ່າຕະຫຼອດໄປ.