ສປປ ລາວ ກວດພົບຜູ້ຕິດເຊື້ອໂຄວິດ-19 ໃນຊຸມຊົນ 65 ຄົນ.

ໃນວັນທີ 23 ສິງຫາ ປີ 2021 ນີ້, ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງຂ່າວໃຫ້ຮູ້ວ່າ: ສະພາບໂຄວິດ-19 ຢູ່ໃນ ສປປ ລາວ, ໃນວັນທີ 22 ສິງຫາ 2021 ຜ່ານມາ ສູນລະວາດວິທະຍາໄດ້ກວດວິເຄາະທັງໝົດ 2,427 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 152 ຄົນ. ຕິດເຊື້ອກໍລະນີນໍາເຂົ້າ 87 ຄົນ, ຄື: ສະຫວັນນະເຂດ 21 ຄົນ, ຈຳປາສັກ 22 ຄົນ, ນະຄອນຫຼວງ 15 ຄົນ, ຄຳມ່ວນ 25 ຄົນ, ສາລະວັນ 2 ຄົນ, ບໍລິຄຳໄຊ 1 ຄົນ ແລະ ໄຊຍະບູລີ 1 ຄົນ. ເປັນແຮງງານລາວ ທີ່ກັບມາແຕ່ປະເທດເພື່ອນບ້ານ ເຂົ້າຕາມຈຸດຜ່ານແດນສາກົນຖືກຕ້ອງຕາມລະບຽບ ແລະ ຕິດເຊື້ອໃນຊຸມຊົນ 65 ຄົນ ເປັນຜູ້ສຳຜັດໃກ້ຊິດນຳຜູ້ຕິດເຊື້ອທີ່ຜ່ານມາ ຄືຢູ່: ສະຫວັນນະເຂດ 43 ຄົນ, ບໍ່ແກ້ວ 18 ຄົນ, ນະຄອນຫຼວງ 3 ຄົນ, ຫຼວງນ້ຳທາ 1​ ຄົນ.

ສຳລັບການຕິດເຊື້ອໃນຊຸມຊົນຂອງແຕ່ລະແຂວງແມ່ນ: ຫວັນນະເຂດ 43 ຄົນ, ໃນນັ້ນ ຢູ່ສະຖານທີ່ຄຸມຂັງ 34 ຄົນ, ພະນັກງານພະແນກໂຍທາທິການ ແລະ ຂົນສົ່ງ 1 ຄົນ, ຜູ້ສໍາຜັດໃກ້ຊິດກັບຜູ້ທີ່ຕິດເຊື້ອທີ່ຜ່ານມາ 3 ຄົນ, ພະນັກງານແພດປະຈຳສູນຈຳກັດບໍລິເວນ 1 ຄົນ. ສ່ວນເຫຼືອນັ້ນ ແມ່ນທີມງານກຳລັງລົງເກັບກຳຂໍ້ມູນລາຍລະອຽດ ຈະແຈ້ງໃຫ້ຊາບຕື່ມໃນພາຍຫຼັງ. ແຂວງ ບໍ່ແກ້ວຕິດເຊື້ອໃນຊຸມຊົນ 18 ຄົນ ແມ່ນມາຈາກບ້ານໃຫຍ່ສີເມືອງງາມ ທັງໝົດ. ແຂວງຫຼວງນ້ຳທາ 1 ຄົນ ເປັນຄົນຈີນ ທີ່ມີປະຫວັດເດີນທາງຈາກ ພະນົມເປັນ, ປະເທດກຳປູເຈຍ ໂດຍຍົນເໝົາລຳ ມານະຄອນຫຼວງວຽງຈັນ (ລະຫວ່າງທາງບໍ່ໄດ້ພັກ), ຫຼັງຈາກນັ້ນ ຕໍ່ລົດໂດຍສານໄປດ່ານບໍ່ເຕັນ, ແຂວງຫຼວງນ້ຳທາ. ນະຄອນຫລວງວຽງຈັນ ແມ່ນກໍລະນີ ໃກ້ສິດ ກັບຜູ້ຕິດເຊື້ອກ່ອນຫນ້ານັ້ນ.

ມາຮອດມື້ນີ້ ສປປ ລາວ ມີຕົວເລກຜູ້ຕິດເຊື້ອສະສົມທັງໝົດ 12,621 ຄົນ, ປົວດີສະສົມ 8.305 ຄົນ, ເສຍຊີວິດສະສົມ 11 ຄົນ ແລະ ກຳລັງປິ່ນປົວ 4.305 ຄົນ.