ຜູ້ເສຍຊີວິດຈາກອຸປະຕິເຫດ ຕາມທ້ອງຖະໜົນຍັງມີສະຖິຕິສູງກວ່າໂຄວິດ19
ໂດຍ: ທິດກ່ຳ
ໃນວັນທີ 19 ສິງຫາ 2021 ຜ່ານມາ, ລາຍການຂັບຂີ່ປອດໄພໄດ້ສຳພາດທ່ານ ພັນຕີ ຈັນທະວີ ເພັດລາສີ ກົມຈາະຈອນ ກະຊວງປ້ອງກັນຄວາມສະຫງົບ ໄດ້ໃຫ້ຂໍ້ມູນກ່ຽວກັບບັນຫາການເກີດອຸປະຕິເຫດໃນທ້ອງຖະໜົນທົ່ວປະເທດສະເພາະດືອນກໍລະກົດ 2021 ຜ່ານມາ ແມ່ນມີສູງເຖິງ 428 ລາຍ ເພີ່ມຂຶ້ນລື່ນຈາກເດືອນມິຖຸນາ 102 ລາຍ, ມີພາຫະນະນ້ອຍໃຫຍ່ເປ່ເພ 726 ຄັນ ເພີ່ມຂຶ້ນລື່ນຈາກເດືອນມິຖຸນາ 163 ຄັນ, ມີຜູ້ບາດເຈັບນ້ອຍໃຫຍ່ໜັກເບົາ ແລະ ສາຫັດລວມ 642 ຄົນ.
ທ່ານ ພັນຕີ ຈັນທະວີ ເພັດລາສີ ຍັງໄດ້ໃຫ້ຂໍ້ມູນຕື່ມວ່າ: ຈາກອຸປະຕິເຫດທີ່ເກີດຂຶ້ນດ້ວຍກໍລະນີຕ່າງໆນີ້ ມີຜູ້ເສຍຊີວິດສູງເຖິງ 60 ຄົນ ແລະ ລວມມຸນຄ່າເສຍຫາຍ 5.420.400.000 ກີບ (ຫ້າຕື້ສີ່ຮ້ອຍຊາວລ້ານສີ່ແສນກີບຖ້ວນ) ນີ້ຄືຕົວເລກທີ່ໜ້າເປັນຫ່ວງສະຢົດສະຢອງ ຈຶ່ງຂໍຮຽກຮ້ອງມາຍັງຜູ້ຂັບຂີ່ຈົ່ງມີສະຕິໃນການໄປມາ, ໃຊ້ລົດໃຊ້ຖະໜົນ ແລະ ການປະຕິບັດກົດຈາລະຈອນໃຫ້ເຂັ້ມງວດ. ທ່ານ ຈັນທະວີ ເພັດລາສີ ກ່າວຢ້ຳ.
ແນວໃດກໍດີ, ຕາມທິດກ່ຳວ່າ, ຕໍ່ສະພາບທີ່ມັນເກີດຂຶ້ນນີ້ ຖ້າເຮົາມາສົມທຽບໃສ່ການຕາຍຍ້ອນໂຄວິດ-19 ເຫັນວ່າຫລຸດລື່ນກັນປານຟ້າກັບດິນ. ຕົວຢ່າງນັບແຕ່ມີການລະບາດຂອງເຊື້ອພະຍາດໂຄວິດ-19 ເລີ່ມຈາກເດືອນເມສາເປັນຕົ້ນມາມີຄົນຕາຍຍ້ອນໂຄວິດ-19 ພຽງ 10 ກວ່າຄົນເທົ່ານັ້ນ. ນີ້ຄືຕົວເລກປຽບທຽບຊີ້ໃຫ້ເຫັນຢ່າງຊັດເຈນ.
ເມື່ອຕັ້ງໂຈດກັນວ່າ, ດ້ວຍສາເຫດໃດຈຶ່ງມີຄົນຕາຍຍ້ອນໂຄວິດ-19 ໜ້ອຍ ແລະ ຕາຍຍ້ອນອຸປະຕິເຫດຫລາຍ ຈົນວ່າບາງມື້ບາງເດືອນມັນເພີ່ມຂຶ້ນ. ຕາມເຮົາວ່າ ສາເຫດຫລັກໆກໍຄື ໃນການແຜ່ລະບາດຂອງເຊື້ອພະຍາດໂຄວິດ-19 ພວກເຮົາມີການຄຸມເຂັ້ມ ແລະ ເດັດຂາດ, ມີຄະນະສະເພາະກິດ ນັບແຕ່ຂັ້ນສູນກາງລົງຮອດທ້ອງຖິ່ນທີ່ເປັນເສນາທິການໃຫ້ລັດຖະບານ. ອີກປະການໜຶ່ງ ໃຜກໍເຫັນຕົວຈິງ ທັງຊ່າລືກັນທົ່ວໂລກວ່າເຊື້ອພະຍາດໂຄວິດ-19 ມັນສຸດໂຫດ ແລະ ອັນຕະລາຍ ທັງບໍ່ມີກິ່ນ, ບໍ່ມີອາຍ, ບໍ່ມີຕົນບໍ່ມີໂຕຍ່າງມາໂຍ້ງໆຄືຄົນ ແລະ ສັດສາວາສິ່ງ ມັນເປັນມັດຈຸລາດປຽບດັ່ງຮ່າຂ້າຄົນ ຖ້າຜູ້ໃດຕິດເຊື້ອໄປແລ້ວປິ່ນປົວບໍ່ທັນມັນກໍເຂົ້າໄປກິນຕັບກິນປອດຢ່າງໜ້າສົມເພດ, ກົງກັນຂ້າມ ຜູ້ທີ່ຕາຍຍ້ອນອຸປະຕິເຫດມັນພັດແມ່ນຕົວຕົນເຮົາເອງເປັນຜູ້ເຮັດ ແລະ ເປັນຜູ້ກະທຳ ເຊິ່ງສະຫລຸບແລ້ວ ແມ່ນຍ້ອນຄວາມປະໝາດເລີ້ນເລີ້ ຫລືບໍ່ກໍແມ່ນຍ້ອນຄວາມມືນເມົາເອົາງ່າຍນັ້ນເປັນສ່ວນໃຫຍ່.
ເຖິງຢ່າງໃດກໍດີ, ເພື່ອບໍ່ໃຫ້ມີຄົນຕາຍຍ້ອນອຸປະຕິເຫດຫລວງຫລາຍພາຍມາກຄືແນວນີ້ ມັນກໍມີຫລາຍປັດໄຈ ເປັນຕົ້ນຂະແໜງການກ່ຽວຂ້ອງຕ້ອງຄຸມເຂັ້ມມາດຕະການທາງກົດໝາຍ, ແຕ່ອັນທີ່ສັກສິດກວ່າໝູ່ກໍຄືຜູ້ຂັບຂີ່ຕ້ອງປະຕິບັດກົດຈາລະຈອນຢ່າງເຂັ້ມງວດ ນັບທັງມີສະຕິໃນການຂັບຂີ່. ສິ່ງທີ່ຄວນໃສ່ໃຈເປັນເລີດກໍຄື ເມົາແລ້ວຫ້າມຂັບຂີ່ລົດ ຫລືວ່າຜູ້ຂັບລົດແມ່ນບໍ່ໃຫ້ເມົາເດັດຂາດ. ນີ້ຄືຕຳລາຢາຮາກໄມ້ທີ່ຈະເຮັດໃຫ້ໜີພົ້ນຈາກຄວາມຕາຍຍ້ອນອຸປະຕິເຫດນັ້ນແລ !
