ຍີ່ປຸ່ນກຽມການສັກວັກຊີນເຂັມທີ 3 ໃຫ້ກັບບຸກຄະລາກອນທາງການແພດ

ວັນທີ 20 ສິງຫາ 2021 ນີ້ ທ່ານ ທາໂຣະ ໂຄເນະ ລັດຖະມົນຕີ ຜູ້ຮັບຜິດຊອບ ແຜນວັກຊີນ ປ້ອງກັນໂຄວິດ-19 ຂອງຍີ່ປຸ່ນ ກ່າວວ່າ: ລັດຖະບານຍີ່ປຸ່ນພວມກຽມພ້ອມສັກວັກຊີນປ້ອງກັນໂຄວິດ-19 ໂດສທີ 3 ໃຫ້ກັບບຸກຄະລາກອນທາງການແພດ, ຫາກກະຊວງສາທາລະນະສຸກເຫັນວ່າ ເປັນເລື່ອງຈຳເປັນ.

ທ່ານ ທາໂຣະ ໂຄເນະ ກ່າວລະຫວ່າງກອງປະຊຸມຄະນະກຳມະການສະພານິຕິບັນຍັດວ່າລັດຖະບານຕັດສິນໃຈສັກວັກຊີນ ປ້ອງກັນ ໂຄວິດ-19 ໂດສທີ 3 ໃຫ້ປະຊາຊົນທີ່ສັກວັກຊິນ ໂດສທີ 2 ມາແລ້ວ 8 ເດືອນ ໃນເດືອນຕຸລານີ້.

ຂະນະດຽວກັນລັດຖະບານພວມກຽມພ້ອມແຜນສັກວັກຊິນປ້ອງກັນໂຄວິດ-19 ເພື່ອໃຫ້ສາມາດເລີ່ມດຳເນີນງານໄດ້ໂດຍທັນທີ ຫາກກະຊວງ ແນະນໍາສັກວັກຊິນໂດສທີ 3.
ການຕັດສິນໃຈ ດັ່ງກ່າວຂອງລັດຖະບານມີຂຶ້ນໂດຍອີງໃສ່ຂໍ້ມູນຊີ້ແຈງຈຳເປັນຕ້ອງສັກວັກຊີນໂດສເພີ່ມເຕີມເພື່ອກະຕຸ້ນພູມຕ້ານທານເພື່ອໃຫ້ສາມາດຕໍ່ສູ້ກັບເຊື້ອໄວຣັດໄດ້ຢ່າງຕໍ່ເນື່ອງ.