ແຂວງສະຫວັນນະເຂດ ພົບຜູ້ຕິດເຊື້ອໃນຊຸມຊົນ 58 ຄົນ ໃນນັ້ນ 48 ຄົນແມ່ນພົບຢູ່ສະຖານທີ່ຄຸມຂັງ

ວັນທີ 20 ສິງຫາ ປີ 2021 ນີ້, ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ແຫຼງຂ່າວວ່າ:
ໃນວັນທີ 19 ສິງຫາ 2021 ຜ່ານມາ, ສປປ ລາວ ໄດ້ກວດວິເຄາະຫາເຊື້ອໂຄວິດ-19 ທັງໝົດ 3.317 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ 440 ຄົນ, ຕິດເຊື້ອໃນຊຸມຊົນເຖິງ 75 ຄົນ, ເປັນຜູ້ສຳຜັດໃກ້ຊິດນຳຜູ້ຕິດເຊື້ອທີ່ຜ່ານມາ ຄື: ບໍ່ແກ້ວ (ຕົ້ນເຜິ້ງ) 13 ຄົນ, ຫຼວງນ້ຳທາ 3 ຄົນ (ມາແຕ່ແຂວງບໍ່ແກ້ວ), ເຊກອງ 1 ຄົນ ແລະ ສະຫວັນນະເຂດ 58 ຄົນ ( ສຳລັບ ແຂວງສະຫວັນນະເຂດ ທີ່ຕິດເຊື້ອໃນຊຸມຊົນ 58 ຄົນນີ້, ໃນນັ້ນ ເປັນນັກໂທດຢູ່ສະຖານທີ່ຄຸມຂັງ 48 ຄົນ ແລະ ກຸ່ມຄົນທົ່ວໄປ 10 ຄົນ ຄື: ພະນັກງານຕຳຫຼວດປະຈຳສູນຈຳກັດບໍລິເວນ 1 ຄົນ, ພະນັກງານດ່ານ 2 ຄົນ, ຜູ້ສຳຜັດໃກ້ຊິດນຳຜູ້ຕິດເຊື້ອ 3 ຄົນ, ຄົນຂາຍນ້ຳມັນ 1 ຄົນ, ພະນັກງານບໍລິສັດຂົນສົ່ງ 1 ຄົນ ແລະ ອີກ 2 ຄົນ ທີມງານກ່ຽວຂ້ອງກຳລັງລົງເກັບກຳຂໍ້ມູນລາຍລະອຽດ ຈະແຈ້ງຊາບຕື່ມໃນພາຍຫຼັງ.
ສ່ວນ ກໍລະນີນໍາເຂົ້າ ມີ 365 ຄົນ ຈາກ ຈຳປາສັກ 114 ຄົນ, ນະຄອນຫຼວງ 101 ຄົນ, ສະຫວັນນະເຂດ 77 ຄົນ, ຄຳມ່ວນ 45 ຄົນ, ສາລະວັນ 23 ຄົນ, ໄຊຍະບູລີ 4 ຄົນ ແລະ ຫຼວງພະບາງ 1 ຄົນ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ.

ປັດຈຸບັນ ສປປ ລາວ ມີຕົວເລກຜູ້ຕິດເຊື້ອສະສົມທັງໝົດ 11.753 ຄົນ, ປົວດີສະສົມ 7.138 ຄົນ, ກໍາລັງປິ່ນປົວ ທັງໝົດ 4.604 ຄົນ ແລະ ເສຍຊີວິດສະສົມ 11 ຄົນ ( ເສຍຊີວິດໃໝ່ມື້ນີ້ 2 ຄົນ ).
ສຳລັບ ຜູ້ເສຍຊີວິດໃໝ່ຄົນທີ 1 ເປັນເພດຊາຍ, ອາຍຸ 55 ປີ, ອາຊີບ ກຳມະກອນ, ບ້ານໂພນຊາຍ, ເມືອງໄກສອນ ແຂວງສະຫວັນນະເຂດ ເຂົ້ານອນປິ່ນປົວຢູ່ໂຮງໝໍ ໃນວັນທີ 11 ສິງຫາ 2021 ຍ້ອນໄຂ້ໄອ 6 ວັນ ຜູ້ກ່ຽວມີພະຍາດປະຈຳໂຕ ຄວາມດັນເລືອດສູງ, ວັນທີ 12 ສິງຫາ 2021 ຜູ້ກ່ຽວ ຫາຍໃຈຝືດ, ແໜ້ນໜ້າເອິກ, ຜົນຈາກການສ່ອງໄຟຟ້າລັງສີປອດ ສະແດງໃຫ້ເຫັນວ່າ ປອດອັກເສບ. ອາການຂອງຜູ້ກ່ຽວໜັກລົງເລື້ອຍໆ ຈົນມາຮອດ ເວລາ 1 ໂມງເຊົ້າຂອງວັນທີ 18 ສິງຫາ 2021 ຜູ້ກ່ຽວໄດ້ເສຍຊີວິດ. ແລະ ຜູ້ເສຍຊີວິດຄົນທີ 2 ເປັນເພດຍິງ, ອາຍຸ 26 ປີ, ອາຊີບ ພະນັກງານເສີບອາຫານ, ບ້ານດອນພູຄຳ, ເມືອງມະຫາໄຊ, ແຂວງຄຳມ່ວນ. ເດີນທາງເຂົ້າມາ ສປປ ລາວ ໃນວັນທີ 3 ສິງຫາ 2021, ຜົນກວດພົບເຊື້ອ COVID-19, ໃນວັນທີ 7 ສິງຫາ 2021 ຜູ້ກ່ຽວມີໄຂ້, ໄອ, ຫາຍໃຈຝືດ ແລະ ກະວົນກະຕາຍ. ຜູ້ກ່ຽວເກີດລູກໄດ້ 5 ວັນ ແລະ ເສຍຊີວິດ ໃນວັນທີ 20 ສິງຫາ 2021 ສ່ວນລູກປອດໄພ.