ອົງການອະນາໄມໂລກ ກຳລັງທົດລອງຢາ 3 ຊະນິດເຂົ້າໃນການປິ່ນປົວຜູ້ຕິດເຊື້ອໂຄວິດ.
ໃນວັນທີ 19 ສິງຫາ 2021 ນີ້, ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງຂ່າວໃຫ້ຮູ້ວ່າ: ອົງການອະນາໄມໂລກ ປະກາດວ່າ ປັດຈຸບັນ ກຳລັງທົດລອງຢາ 3 ໂຕ ປະກອບ ມີ artesunate, imatinib ແລະ infliximab ເຊິ່ງໄດ້ທົດລອງນຳໃຊ້ໃນຄົນເຈັບທີ່ກຳລັງນອນປິ່ນປົວຢູ່ໂຮງໝໍ ເພື່ອຫຼຸດຜ່ອນຄວາມສ່ຽງໃນການເສຍຊີວິດ ເຊິ່ງທັງ 3 ໂຕຢາ ໄດ້ຖືກນຳໃຊ້ເຂົ້າໃນການປິ່ນປົວຜ່ານມາ ເປັນຕົ້ນ ຢາ artesunate ໃຊ້ສຳລັບ ປິ່ນປົວພະຍາດໄຂ້ມາລາເຣຍທີ່ຮຸນແຮງ, ຢາ imatinib ປິ່ນປົວມະເຮັງບາງຊະນິດ ແລະ ຢາ infliximab ປິ່ນປົວພະຍາດພູ້ມຄຸ້ມກັນ ເຊັ່ນ ພະຍາດປະດົງ ການທົດລອງ 3 ຢານີ້ ຖືວ່າເປັນຂ່າວດີຂອງໂລກເຮົາ ເຊິ່ງຜົນຂອງການສຶກສາຄົ້ນຄວ້າຄາດວ່າຈະອອກມາໄວໆນີ້.
ສຳລັບ ສປປ ລາວ ກະຊວງສາທາລະນະສຸກ ກໍ່ໄດ້ເຮັດການສຶກສາຄົ້ນຄວ້າ ໃນການນຳໃຊ້ພືດເປັນຢາ ເພື່ອສົມທົບເຂົ້າໃນການປ້ອງກັນ ແລະ ປິ່ນປົວພະຍາດໂຄວິດ-19 ເຊິ່ງມີພືດ 3 ຊະນິດ ຄື: ຕົ້ນລາຊາບີ, ຜັກຄາວທອງ ແລະ ຫົວກະຊາຍຂາວ, ຜົນຂອງການສຶກສາຄົ້ນຄວ້າ ເຫັນວ່າ ມີຫຼັກຖານສອດຄ່ອງກັນ ໃນການປ້ອງກັນ, ປິ່ນປົວ ແລະ ຢຸດຢັ້ງເຊື້ອພະຍາດໄວຣັສໄດ້ດີພໍສົມຄວນ. ແຕ່ເຖິງຢ່າງໃດກໍ່ຕາມກໍຄວນອ່ານ ແລະ ສຶກສາຄຳແນະນຳຢ່າງລະອຽດ ຫຼື ສອບຖາມນຳຜູ້ຊ່ຽວຊານຕື່ມ ເພື່ອນຳໃຊ້ຢາດ່ັງກ່າວໃຫ້ຖືກຕ້ອງ, ສົມເຫດສົມຜົນ ແລະ ປາດສະຈາກຜົນຂ້າງຄຽງໜ້ອຍທີ່ສຸດ.
