ຕຳຫລວດອັງກິດຈັບກຸມ 7 ຄົນຜູ້ຖືກສົງໄສຮ່ວມຂະບວນການໂຈມຕີລັດຖະສະພາ
ຕຳຫລວດອັງກິດຈັບກຸມ 7 ຄົນ ຈາກການກວດຄົ້ນໃນຫຼາຍຈຸດ, ພາຍຫລັງເກີດເຫດຄົນຮ້າຍຂັບລົດຕຳຂົວເວສມິນສະເຕີ ຢູ່ນະຄອນຫລວງລອນດອນ ໃນວັນທີ 22 ມີນາ ແລະ ໄດ້ຫລຸດຈໍານວນຜູ້ເສຍຊີວິດບໍ່ລວມຄົນຮ້າຍຈາກ 4 ຄົນເປັນ 3 ຄົນ.
ທ່ານ ມາຣກ ໂຣລີ ຮັກສາການຮອງຜູ້ບັນຊາການຕຳຫຼວດນະຄອນບານລອນດອນ ແລະ ຜູ້ຊ່ວຍຜູ້ບັນຊາການໜ່ວຍປະຕິບັດການພິເສດ ຖະແຫລງໃນວັນທີ 23 ມີນາວ່າ: ຕຳຫລວດໄດ້ກວດຄົ້ນ 6 ແຫ່ງ ທັງຢູ່ນະຄອນຫລວງລອນດອນ, ເມືອງເບີມິງແຮມ ແລະ ອີກຫລາຍເມືອງ ຈັບກຸມຜູ້ຖືກສົງໄສໄດ້ 7 ຄົນ ແລະ ໄດ້ແຈ້ງປັບຫລຸດຈໍານວນຜູ້ເສຍຊີວິດຈາກເຫດກໍ່ການຮ້າຍໃນວັນທີ 22 ມີນາວ່າມີທັງໝົດ 3 ຄົນ ປະກອບມີທ່ານ ຄຣີ ພາຣມເມີ ຕຳຫລວດອາຍຸ 48 ປີ ທີ່ຖືກແທງ 1 ຄົນ, ປະຊາຊົນ 2 ຄົນ ເປັນຜູ້ຍິງອາຍຸ 40 ກວ່າປີ ແລະ ຜູ້ຊາຍອາຍຸ 50 ກວ່າປີ ຈາກທີ່ເຄີຍຖະແຫລງຂ່າວໃນເບື້ອງຕົ້ນວ່າມີປະຊາຊົນເສຍຊີວິດ 3 ຄົນ, ສ່ວນຄົນຮ້າຍຖືກຕຳຫລວດຍິງເສຍຊີວິດຫລັງແທງຕຳຫລວດ.
ທ່ານ ໂຣລີ ກ່າວອີກວ່າ: ຕຳຫລວດຍັງເຊື່ອໝັ້ນວ່າຄົນຮ້າຍກໍ່ເຫດຄົນດຽວ ໂດຍໄດ້ແຮງຈູງໃຈຈາກການກໍ່ການ ຮ້າຍສາກົນ ແລະ ເຊື່ອວ່າຮູ້ຕົວຕົນຂອງຄົນຮ້າຍ ແຕ່ຍັງບໍ່ຂໍເປີດເຜີຍໃນຕອນນີ້ ເພາະຢູ່ລະຫວ່າງການສອບສວນ, ສ່ວນຜູ້ບາດເຈັບທີ່ມີປະມານ 40 ຄົນ ປັດຈຸບັນນີ້ຍັງປິ່ນປົວຢູ່ໂຮງໝໍ 29 ຄົນ ໃນຈຳນວນນີ້ 7 ຄົນອາການສາຫັດ.
