ຕະຫລອດໄລຍະ 32 ປີ ມີໂຄງການລົງທຶນຈາກ ສປຈີນ 813 ໂຄງການ ມູນຄ່າ 16 ຕື້ໂດລາ
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີ ກະຊວງ ແຜນການ ແລະ ການລົງທຶນ ລາຍງານໃນກອງປະຊຸມ ພົບປະແລກປ່ຽນ ສະພາບການດໍາເນີນທຸລະກິດ ແລະ ການລົງທຶນ ຂອງ ສປ ຈີນ ຢູ່ໃນ ສປປ ໃນວັນທີ 13 ສິງຫາ 2021 ຜ່ານມານີ້ ວ່າ: ສປ ຈີນ ເປັນປະເທດ ທີ່ມາລົງທຶນໃນລາວຫຼາຍກວ່າໝູ່ເປັນອັນດັບໜຶ່ງ, ນັບແຕ່ປີ 1989 ເຖິງປັດຈຸບັນ ການລົງທຶນສະສົມມີເຖິງ 813 ໂຄງການ, ໂດຍມີມູນຄ່າລົງທຶນທັງໝົດປະມານ 16 ຕື້ໂດລາ, ໃນນັ້ນ ນັກລົງທຶນພາຍໃນຂອງລາວ ໄດ້ປະກອບສ່ວນຮ່ວມທຶນ ລວມເປັນມູນຄ່າ 2,9 ຕື້ໂດລາ, ຂົງເຂດການລົງທຶນກໍກວ້າງຂວາງ ແລະ ຫຼາກຫຼາຍ, ຂະໜາດຂອງຜູ້ ລົງທຶນກໍມີທັງຂະໜາດນ້ອຍ, ຂະໜາດກາງ ແລະ ຂະໜາດໃຫຍ່ແຕກຕ່າງກັນ, ມີທັງມາຈາກລັດວິສາຫະກິດ ແລະ ມີທັງພາກເອກະຊົນ.
ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີກະຊວງ ແຜນການ ແລະ ການລົງທຶນ ລາຍງານສະພາບການລົງທຶນຂອງ ສປປ ລາວ ແລະ ສະພາບການລົງທຶນ ຂອງນັກລົງທຶນຈີນ ໃນ ສປປ ລາວ ຕື່ມວ່າ: ສະເພາະ ປີ 2020, ທ່າມກາງການແພ່ລະບາດຂອງພະຍາດ ໂຄວິດ-19 ການລົງທຶນຈາກ ສປ ຈີນ ຍັງສືບຕໍ່ມີບັນຍາກາດທີ່ດີ ມີການອະນຸມັດໂຄງການລົງທຶນຈາກຈີນ ຈຳນວນ 21 ໂຄງການ ແລະ ມີມູນຄ່າການລົງທຶນ 2,5 ຕື້ໂດລາ, ໃນນັ້ນ ສ່ວນໃຫຍ່ແມ່ນການລົງທຶນໃນຂະແໜງ ບໍ່ແຮ່, ບໍລິການ, ພະລັງງານໄຟຟ້າ, ກະສິກຳ ແລະ ຂະແໜງການອື່ນໆ ກໍຍັງມີການລົງທຶນ ໃນການສ້າງພື້ນຖານໂຄງລ່າງ, ການລົງທຶນໃນກິດຈະການທົ່ວໄປເຊັ່ນ ຮ້ານຄ້າ, ຮ້ານອາຫານ ແລະ ທຸລະກິດຄ້າຂາຍທົ່ວໄປຈຳນວນຫຼາຍ.ນອກນັ້ນ ສປ ຈີນ ໄດ້ມີບົດບາດສຳຄັນໃນການລົງທຶນຢູ່ໃນບັນດາເຂດເສດຖະກິດພິເສດ ຊຶ່ງໄດ້ຮັບການອະນຸມັດຈຳນວນ 89 ຫົວໜ່ວຍ ແລະ ມີມູນຄ່າອະນຸມັດທັງໝົດຫຼາຍກວ່າ 215 ລ້ານໂດລາ.
ຈາກນັ້ນ, ກອງປະຊຸມ ກໍໄດ້ຮັບຟັງການສະເໜີສະພາບເຄື່ອນໄຫວວຽກງານ ແລະ ຂໍ້ຫຍຸ້ງຍາກທີ່ພົບຢູ່ໃນວຽກງານການລົງທຶນໂດຍລວມຂອງນັກທຸລະກິດຈີນ ໂດຍ ຜູ້ຕາງໜ້າສະພາການຄ້າຈີນ ແລະ ສະພາການຄ້າປະຈໍາທ້ອງຖິ່ນ; ຮັບຟັງຜູ້ຕາງໜ້າວິສາຫະກິດຈີນຈາກ 9 ຂະແໜງການ ຂຶ້ນລາຍງານ ແລະ ແລກປ່ຽນຄໍາຄິດເຫັນນໍາຂະແໜງການຂອງຝ່າຍລາວ ຊຶ່ງປະກອບມີຄື: ຂະແໜງພື້ນຖານໂຄງລ່າງດ້ານຄົມມະນາຄົມ, ຂະແໜງການເງິນ, ຂະແໜງການພັດທະນາເຂດເສດຖະກິດພິເສດ, ຂະແໜງໄຟຟ້າ, ຂະແໜງຮັບເໝົາການກໍ່ສ້າງ ແລະ ຮ່ວມມືດ້ານແຮງງານ, ຂະແໜງພັດທະນາບໍ່ແຮ່, ຂະແໜງຮ່ວມມືດ້ານກະສິກຳ, ຂະແໜງປຸງແຕ່ງ ແລະ ການຜະລິດ ແລະ ຂະແໜງການພັດທະນາອະສັງຫາລິມະຊັບ.
