ຂ່ຳນັບຊົມເຊີຍວັນສ້າງຕັ້ງລັດຖະທຳມະນູນຢ່າງສຸດໃຈ

ດັ່ງທົ່ວພັກ, ທົ່ວລັດ ແລະ ປະຊາຊົນບັນດາເຜົ່າໄດ້ຮັບຮູ້ນຳກັນແລ້ວວ່າ ວັນທີ 15 ສິງຫາ 2021 ແມ່ນເປັນວັນລັດຖະທຳມະນູນ ຄົບຮອບ 30 ປີ (15/8/1991-15/8/2021). ໝາຍວ່ານັບແຕ່ສາທາລະນະລັດ ປະຊາທິປະໄຕ ປະຊາຊົນລາວ ຂອງພວກເຮົາໄດ້ຮັບການສ້າງຕັ້ງເປັນຕົ້ນມານັບແຕ່ວັນທີ 2 ທັນວາ 1975 ຮອດປີ 1991 ຈຶ່ງມີລັດຖະທຳມະນູນຂອງຕົນຂຶ້ນມາ ເພື່ອປົກຄອງບ້ານເມືອງ ແລະ ສ້າງໃຫ້ເປັນລັດປະຊາທິປະໄຕປະຊາຊົນທີ່ປົກຄອງດ້ວຍກົດໝາຍ. ດັ່ງທ່ານ ຈະເລີນ ເຢຍປາວເຮີ ກຳມະການສູນກາງພັກ, ຮອງປະທານສະພາແຫ່ງຊາດ ໄດ້ໃຫ້ສຳພາດເມື່ອວັນທີ 9 ສິງຫາຜ່ານມາວ່າ: ປີນີ້ພວກເຮົາຈະມີການສະເຫລີມສະຫລອງວັນສ້າງຕັ້ງລັດຖະທຳມະນູນໃຫ້ມີຄວາມໝາຍທາງດ້ານປະຫວັດສາດ ຍ້ອນວ່າຕະຫລອດໄລຍະ 30 ປີຜ່ານມາ ລັດຖະທຳມະນູນ ແລະ ກົດໝາຍແຫ່ງ ສປປ ລາວ ໄດ້ສ້າງລັດປະຊາທິປະໄຕປະຊາຊົນທີ່ປົກຄອງດ້ວຍກົດໝາຍ. ໃນການສະເຫລີມສະຫລອງຄັ້ງນີ້ ຈະມີການໂຮມຊຸມນຸມ ແລະ ມີຄຳຂວັນທີ່ກ່ຽວຂ້ອງຫລາຍເນື້ອໃນ ເປັນຕົ້ນ ຊົມເຊີຍວັນລັດຖະທຳມະນູນແຫ່ງຊາດ ຄົບຮອບ 30 ປີ ຢ່າງສຸດໃຈ !, ເພີ່ມທະວີຄວາມສາມັກຄີເປັນປຶກແຜ່ນຂອງປະຊາຊົນໃນຊາດບົນພື້ນຖານລັດຖະທຳມະນູນແຫ່ງ ສປປ ລາວ !, ເຊີດຊູສະຕິເປັນເຈົ້າປະເທດຊາດ, ໃຊ້ສິດ ແລະ ປະຕິບັດພັນທະຂອງພົນລະເມືອງລາວຕາມລັດຖະທຳມະນູນຢ່າງຄົບຖ້ວນ !, ເພີ່ມທະວີການນຳພາຂອງຄະນະພັກທຸກຂັ້ນຕາມລັດຖະທຳມະນູນ ແລະ ກົດໝາຍ ແລະ ຍົກສູງຄວາມສັກສິດໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ເຫລົ່ານີ້ເປັນຕົ້ນ. ສຳລັບ 5 ຄຳຂວັນທີ່ກ່າວມານີ້ແມ່ນຈະໄດ້ຕິດຕັ້ງຕາມສະຖານທີ່ສຳຄັນຕ່າງໆ. ສ່ວນໃນເວທີໂຮມຊຸມນຸມຈະຕິດຕັ້ງແຕ່ຄຳຂວັນດຽວຄື ຊົມເຊີຍວັນລັດຖະທຳມະນູນແຫ່ງຊາດ ຄົບຮອບ 30 ປີ ຢ່າງສຸດໃຈ ! ເທົ່ານັ້ນ. ທ່ານ ຈະເລີນ ເຢຍປາວເຮີ ກ່າວ.

ຕະຫລອດໄລຍະ 30 ປີຜ່ານມາ, ການປະຕິບັດລັດຖະທຳມະນູນ ແລະ ກົດໝາຍແມ່ນແນໃສ່ສຶກສາອົບຮົມການເມືອງ ນຳພາແນວຄິດໃນທົ່ວພັກ, ທົ່ວລັດ, ກຳລັງປະກອບອາວຸດແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ ແລະ ພົນລະເມືອງລາວທຸກທົ່ວໜ້າໃນການເພີ່ມທະວີຍົກສູງສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ ເພື່ອເສີມຂະຫຍາຍ ແລະ ປະຕິບັດສິດປະຊາທິປະໄຕຂອງພົນລະເມືອງລາວໃຫ້ຖືກຕ້ອງ, ຄົບຖ້ວນຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ, ເພີ່ມທະວີຄວາມສາມັກຄີເປັນເອກະພາບໃນຖັນແຖວສະມາຊິກພັກ, ພະນັກງານ, ກຳລັງປະກອບອາວຸດ ແລະ ປະຊາຊົນລາວບັນດາເຜົ່າ, ເດັດດ່ຽວຕັດສິນໃຈແກ້ໄຂປາກົດການຫຍໍ້ທໍ້ຕ່າງໆທີ່ເກີດຂຶ້ນໃນການຈັດຕັ້ງພັກ-ລັດແຕ່ລະຂັ້ນ ແລະ ໃນສັງຄົມຢ່າງເດັດຂາດເຂັ້ມງວດ ທັງນີ້ກໍເພື່ອເປັນການໂຄສະນາຜົນສຳເລັດ, ຄວາມເອກອ້າງທະນົງໃຈທີ່ມີລັດຖະທຳມະນູນ ແລະ ກົດໝາຍ. ທ່ານ ຈະເລີນ ເຢຍປາວເຮີ ກ່າວໃນບັ້ນທ້າຍ.

ນັບແຕ່ປະເທດຊາດຂອງພວກເຮົາໄດ້ມີລັດຖະທຳມະນູນມານີ້ ໄດ້ມີການປັບປຸງມາແລ້ວ 2 ຄັ້ງຄື: ໃນຄັ້ງທີ 1 ແມ່ນໃນວັນທີ 6 ສິງຫາ 2003, ຄັ້ງທີ 2 ແມ່ນໃນວັນທີ 8 ທັນວາ 2015 ລັດຖະທຳມະນູນ ສປປ ລາວ ຂອງພວກເຮົາມີ 10 ໝວດ 80 ມາດຕາ ເຊິ່ງແຕ່ລະໝວດໄດ້ກຳນົດລະອຽດດັ່ງລຸ່ມນີ້: ໝວດທີ 1 ກຳນົດລະບອບການເມືອງ, ໝວດ 2 ລະບອບເສດຖະກິດ-ສັງຄົມ, ໝວດ 3 ສິດ ແລະ ພັນທະພື້ນຖານຂອງພົນລະເມືອງ, ໝວດ 4 ສະພາແຫ່ງຊາດ, ໝວດ 5 ປະທານປະເທດ, ໝວດ 6 ລັດຖະບານ, ໝວດ 7 ການປົກຄອງ, ໝວດ 8 ອົງການຕຸລາການ, ໝວດ 9 ພາສາ, ອັກສອນ, ເຄື່ອງໝາຍຊາດ, ທຸງຊາດ, ເພງຊາດ ແລະ ນະຄອນຫລວງ, ໝວດ 10 ແມ່ນບົດບັນຍັດສຸດທ້າຍ. ຂ່ຳນັບຊົມເຊີຍວັນສ້າງຕັ້ງລັດຖະທຳມະນູນຢ່າງສຸດໃຈ !