ຊ໊ອກວົງການເພງ ! ເຊສເຕີ ເບນນິງຕັນ ນັກຮ້ອງນຳວົງ Linkin Park ແຂວນຄໍຕາຍ
ອາເມລິກາ 21 ກໍລະກົດ: ເຊສເຕີ ເບນນິງຕັນ ນັກຮ້ອງນຳວົງ Linkin Park ວົງດົນຕີອັລເທີເນທີຟເມທັດຊື່ດັງ ແຂວນຄໍຕາຍໃນເຮືອນຂອງຕົນຢູ່ລອດແອນເຈລິດ ສະຫະລັດອາເມລິກາ ດ້ວຍໄວພຽງ 41 ປີ.
ເຈົ້າໜ້າທີ່ຕຳຫລວດ ແລະ ພະແນກຊັນນະສູດເຂດລອດແອນເຈລິດເຄົາຕີ ໄດ້ຮັບແຈ້ງຫລັງເວລາ 09:00 ໂມງ ວັນທີ 20 ກໍລະກົດຕາມເວລາທ້ອງຖິ່ນ ວ່າມີຜູ້ພົບສົບ ເບນນິງຕັນ ເສຍຊີວິດໃນເຮືອນຂອງລາວ ຢູ່ເຂດພາລອສ ເວີເດສ ເຊິ່ງເປັນເຂດຄົນມີຖານະໃນນະຄອນລອດແອນເຈລິດ.
ຈາກການກວດສອບເບື້ອງຕົ້ນເຊື່ອວ່າ ລາວເສຍຊີວິດຈາກການແຂວນຄໍຕາຍ, ແຕ່ກຽມເອົາສົບໄປຜ່າພິສູດເພີ່ມອີກ ເພື່ອເບິ່ງວ່າມີຢາ, ແອລກໍຮໍ ຫລື ສານເສບຕິດໃນຮ່າງກາຍ ຫລື ບໍ່, ສ່ວນ ໄມ ຊິນໍດາ ມືກີ່ຕ້າ ແລະ ນັກຮ້ອງນຳຂອງ Linkin Park ອີກຄົນ ສະແດງຂໍ້ຄວາມຢືນຢັນການເສຍຊີວິດຂອງ ເບນນິງຕັນ ວ່າເປັນຄວາມຈິງ. ເປັນຂ່າວທີ່ຕົກໃຈ ແລະ ເຈັບປວດທີ່ສຸດ. ເບນນິງຕັນ ຮ່ວມກໍ່ຕັ້ງວົງ Linkin Park ກັບສະມາຊິກວົງຄົນອື່ນໆ ໃນປີ 1996 ສ້າງຊື່ຈາກອາລະບ້ຳ Hybrid Theory ໃນປີ 2000 ທີ່ມີເພງດັງຄື In the End, One Step Closer, Papercut ແລະ Crawling ຈົນເຮັດໃຫ້ Linkin Park ກາຍເປັນວົງດົນຕີອັລເທີເນທີຟເມທັດຂັ້ນແນວໜ້າ ແລະ ເປັນຫົວຫອກຂອງດົນຕີທີ່ເອີ້ນວ່າ ນູ ເມທັດ.
ທັງນີ້, ໃນໄລຍະຜ່ານມາ ເບນນິງຕັນ ເລີ່ມເປີດເຜີຍເຖິງເລື່ອງລາວຄວາມຍາກລຳບາກທີ່ລາວຜະເຊີນໃນໄວເດັກ ທັງການຖືກຄົນໃກ້ຊິດລ່ວງລະເມີດທາງເພດ, ກ່ອນພໍ່ແມ່ຈະແຍກທາງກັນເມື່ອລາວອາຍຸໄດ້ພຽງ 11 ປີ ຈົນເຮັດໃຫ້ລາວຕ້ອງຫັນໄປໃຊ້ຢາເສບຕິດ ແລະ ດື່ມເຫລົ້າຢ່າງໜັກ ກ່ອນຫັນມາລະບາຍຄວາມຄຽດອອກທາງດົນຕີ ດ້ວຍສຽງຮ້ອງແບບກະແທກໃນລຳຄໍອັນຊົງພະລັງ ແລະ ເປັນເອກະລັກ, ຂະນະທີ່ເນື້ອໃນຫລາຍເພງທີ່ລາວແຕ່ງຂຶ້ນສະທ້ອນເຖິງຄວາມຄຽດ ແລະ ຜິດຫວັງ.
ນອກຈາກນີ້ ເບນນິງຕັນ ຍັງສະແດງຄວາມເສົ້າເສຍໃຈຢ່າງໜັກກັບການເສຍຊີວິດຂອງ ຄຣິສ ຄໍເນລ ໝູ່ຂອງລາວ ເຊິ່ງເປັນນັກຮ້ອງນຳວົງຊາວກາເດນ ທີ່ເສຍຊີວິດຈາກການແຂວນຄໍຕາຍເຊັ່ນກັນໃນເດືອນພຶດສະພາຜ່ານມາ. ການເສຍຊີວິດຢ່າງກະທັນຫັນຂອງ ເບນນິງຕັນ ເກີດຂຶ້ນພາຍຫລັງ Linkin Park ຫາກໍອອກອາລະບ້ຳຊຸດໃໝ່ One More Light ໃນເດືອນພຶດສະພາຜ່ານມາ ແລະ ມີກຳນົດອອກທົວຄອນເສີດຄັ້ງໃຫຍ່ໃນອາທິດໜ້າເປັນຕົ້ນໄປ ລວມທັງການສະແດງຢູ່ນະຄອນນິວຢ໋ອກນຳ. ສຳລັບຊີວິດສ່ວນຕົວ ເບນນິງຕັນ ແຕ່ງດອງແລ້ວ 2 ຄັ້ງ ມີລູກ 6 ຄົນ.
