ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນເຄື່ອນໄຫວຊີ້ນໍາວຽກງານຢູ່ພະແນກການເງິນແຂວງຫຼວງນໍ້າທາ

ໃນວັນທີ 6 ສິງຫາ 2021 ຢູ່ທີ່ພະແນກການເງິນແຂວງຫຼວງນໍ້າທາ; ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ພ້ອມດ້ວຍຄະນະເຄື່ອນໄຫວ, ຢ້ຽມຢາມ ແລະ ຊີ້ນໍາວຽກງານຢູ່ພະແນກການເງິນແຂວງຫຼວງນໍ້າທາ, ໂດຍການຕ້ອນຮັບຂອງທ່ານ ຄໍາພັນ ໄຊສີ ຫົວໜ້າພະແນກການເງິນແຂວງຫຼວງນໍ້າທາ, ມີຄະນະ ພະແນກ, ຄະນະສ່ວຍສາອາກອນ, ຄະນະຄັງເງິນແຫ່ງຊາດປະຈຳແຂວງ,ຄະນະກອງຄຸ້ມຄອງພາສີ I, ຫົວໜ້າຂະແໜງ ພະນັກງານວິຊາການເຂົ້າຮ່ວມ.

ທ່ານ ຄໍາພັນ ໄຊສີ ຫົວໜ້າພະແນກການເງິນແຂວງຫຼວງນໍ້າທາ, ໄດ້ລາຍງານສະພາບການຈັດຕັ້ງປະຕິບັດວຽກງານການເງິນແຂວງຫຼວງນໍ້າທາ, ຄະນະພັກ, ຄະນະນຳພະແນກການເງິນໄດ້ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດໃຫ້ແກ່ສະມາຊິກພັກ, ພະນັກງານລັດຖະກອນພາຍໃນຂະແໜງການຕົນມີຄວາມອຸ່ນອຽນທຸ່ນທ່ຽງຕໍ່ໜ້າທີ່ວຽກງານ, ມີສະຕິຕໍ່ການຈັດຕັ້ງ, ເຄົາລົບກົດໝາຍ-ລະບຽບການຕ່າງໆ, ຈັດຕັ້ງປະຕິບັດວຽກງານດ້ວຍຄວາມຮັບຜິດຊອບສູງ ແລະ ໄດ້ຮັບຜົນສຳເລັດຕາມລະດັບຄາດໝາຍ.

ໂຄງປະກອບຂະແໜງການເງິນມີພະນັກງານ-ລັດຖະກອນທັງໝົດ 392 ຄົນ, ຍິງ 83 ຄົນ, ການຈັດຕັ້ງປະຕິບັດ 7 ເດືອນຕົ້ນປີສາມາດສ້າງລາຍຮັບ: ລວມລາຍຮັບພູດສູນກາງ ແລະ ທ້ອງຖິ່ນແຜນການປີ 2021
ຈຳນວນ 468,7 ຕື້ກີບ, ປະຕິບັດ 7 ເດືອນໄດ້ 279,8 ຕື້ກວ່າກີບເທົ່າກັບ 60 % ຂອງແຜນການປີ, ທຽບໃສ່ໄລຍະດຽວຂອງປີຜ່ານມາເພີ່ມ 32 %. ໃນນີ້, ລາຍຮັບພູດສູນກາງແຜນການປີ 339,1 ຕື້ກີບ, ປະຕິບັດ 7 ເດືອນໄດ້ 232,8 ຕື້ກວ່າກີບເທົ່າກັບ 68% ຂອງແຜນການປີ.ທຽບໃສ່ໄລຍະດຽວຂອງປີຜ່ານມາເພີ່ມ 41% ໃນນີ້, ພາສີແຜນການປີ 314 ຕື້ກີບ, ປະຕິບັດໄດ້ 232,7 ຕື້ກວ່າກີບເທົ່າກັບ 74% ຂອງແຜນການປີທຽບໃສ່ໄລຍະດຽວຂອງປີຜ່ານມາເພີ່ມ 64%; ລາຍຮັບທ້ອງຖິ່ນ ແຜນການປີ 129,6 ຕື້ກີບປະຕິບັດໄດ້ 46,9 ຕື້ກວ່າກີບເທົ່າກັບ 36 % ຂອງແຜນການປີ, ທຽບໃສ່ໄລຍະດຽວຂອງປີຜ່ານມາເພີ່ມ 1% ໃນນີ້, ສ່ວຍສາອາກອນ ແຜນການປີ 122 ຕື້ກີບ,ປະຕິບັດໄດ້ 40 ຕື້ກວ່າກີບເທົ່າກັບ 33 % ຂອງແຜນການປີ, ທຽບໃສ່ໄລຍະດຽວຂອງປີຜ່ານມາເພີ່ມຂື້ນ 21%, ຄຸ້ມຄອງຊັບສິນຂອງລັດ ແຜນການປີ 7,6 ຕື້ກີບ,ປະຕິບັດໄດ້ 6,3 ຕື້ກວ່າກີບເທົ່າກັບ 84 % ຂອງແຜນການປີ,ທຽບໃສ່ໄລຍະດຽວຂອງປີຜ່ານມາເພີ່ມ 31%.

ສ່ວນລາຍຮັບຊັບສິນແຂວງຮັບຊ່ວຍສູນກາງປະຕິບັດ 7 ເດືອນໄດ້ 4,7 ຕື້ກີບການປະຕິບັດລາຍຈ່າຍງົບປະມານແຜນການປີ 322 ຕື້ກີບ, ລວມການລົງທຶນ, ລວມອະນຸມັດ 7 ເດືອນໄດ້ 218 ຕື້ກວ່າກີບ, ເທົ່າກັບ 67,9 4% ຂອງແຜນການປີ. ໃນນີ້; ລາຍຈ່າຍປົກກະຕິແຜນການປີ 308 ຕື້ກີບ, ລວມອະນຸມັດ 7 ເດືອນໄດ້ 212 ຕື້ກວ່າກີບເທົ່າກັບ 68,93 % ຂອງແຜນການປີ. ລາຍຈ່າຍວິຊາການແຜນການປີ 13 ຕື້ກີບ, ລວມອະນຸມັດ 7 ເດືອນໄດ້ 6 ຕື້ກວ່າກີບເທົ່າກັບ 45,59 % ຂອງແຜນການປີ;ມາຮອດປັດຈຸບັນແມ່ນສໍາເລັດການເບີກຈ່າຍເງິນເດືອນໆ 7 ທົ່ວແຂວງ.
ສໍາລັບທິດທາງແຜນການຈະໄດ້ສູມໃຫ້ສ້າງລາຍຮັບເຂົ້າງົບປະມານ ແລະ ຄຸ້ມຄອງລາຍຈ່າຍໃຫ້ໄປຕາມລະ ບຽບການ,ເພື່ອເຮັດໃຫ້ການຈັດຕັ້ງປະຕິບັດທິດທາງໜ້າທີ່ວຽກງານຂອງຂະແໜງການເງິນໃຫ້ມີປະສິດທິຜົນ, ພ້ອມນັ້ນຜູ້ເຂົ້າຮ່ວມຂັ້ນສູນກາງ ແລະ ຂັ້ນແຂວງໄດ້ມີຄໍາຄິດຄໍາເຫັນແລກປ່ຽນເຊິ່ງກັນ ແລະ ກັນ, ເພື່ອເຮັດໃຫ້ວຽກງານການເງິນໄດ້ຕາມແຜນທີ່ວາງໄວ້.

ໂອກາດນີ້, ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ໄດ້ໃຫ້ກຽດໂອ້ລົມໃຫ້ທິດຊີ້ນໍາຫຼາຍບັນຫາທີ່ສໍາຄັນໂດຍສະເພາະໄດ້ເນັ້ນໜັກໃຫ້ຄະນະນໍາພະແນກການເງີນແຂວງສຶກສາອົບຮົມການເມືອງແນວຄິດໃຫ້ພະນັກງານລັດຖະກອນໃນຂະແໜງການຂອງຕົນ, ຍົກສູງດ້ານບຸກຄະລາກອນ, ຄຸ້ມຄອງລາຍຮັບ-ລາຍຈ່າຍໃຫ້ໄປຕາມລະບຽບການຂອງກະຊວງການເງີນວາງອອກ ແລະ ສູ້ຊົນການເກັບລາຍຮັບເຂົ້າງົບປະມານໃຫ້ໄດ້ຕາມແຜນທີ່ກໍານົດ.