ຜູ້ຕິດເຊື້ອພະຍາດໂຄວິດ-19 ທີ່ລັກໜີອອກຈາກສູນປິ່ນປົວຢູ່ແຂວງຄໍາມ່ວນ ກັບມາສະເໜີຕົວເພື່ອຂໍປິ່ນປົວ
ຈາກກໍລະນີທີ່ມີຜູ້ຕິດເຊື້ອພະຍາດໂຄວິດ- 19 ລັກໜີອອກຈາກສູນປິ່ນປົວຢູ່ແຂວງຄໍາມ່ວນ ໃນວັນທີ 9 ສິງຫາ 2021. ຫລ້າສຸດຜູ້ກ່ຽວໄດ້ກັບຄືນໄປສະເໜີຕົວເພື່ອຂໍປິ່ນ ປົວຢູ່ສູນປິ່ນປົວຂອງແຂວງຮຽບຮ້ອຍແລ້ວ.
ດຣ ແສງແທິດ ທໍາມະໂນລາດ ວິຊາການຮັບຜິດຊອບວຽກງານລະບາດຂັ້ນແຂວງຄໍາມ່ວນ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດວ່າ: ຜູ້ຕິດເຊື້ອທີ່ລັກໜີອອກສູນຊື່ ນາງ ນໍ້າຝົນ ຄໍາມະນີວົງ, ອາຍຸ 27 ປີ ຢູ່ບ້ານ ວົງພັນສີ, ເມືອງອຸທຸມພອນ, ແຂວງສະຫວັນນະເຂດ. ນອກຈາກຕິດເຊື້ອແລ້ວຜູ້ກ່ຽວຍັງຖືພາໄດ້ 2 ເດືອນກວ່າ, ໂດຍລັກໜີອອກຈາກສູນປິ່ນປົວໃນເວລາ 20 ໂມງ 30 ນາທີ ຂອງວັນ ທີ 9 ສິງຫາ 2021 ເຊີ່ງມີຫມູ່ຂອງຜົວມາຮັບແລ້ວໄປສົ່ງຢູ່ເຮືອນພັກແຫ່ງໜຶ່ງທີ່ຢູ່ໃກ້ຄີວລົດເມຫລັກ 4.
ຕົກມາຮອດຕອນເຊົ້າວັນທີ 11 ສິງຫາ 2021 ຜູ້ກ່ຽວໄດ້ກັບໄປສະເຫນີໂຕຕໍ່ສູນປິ່ນປົວຜູ້ຕິດເຊື້ອພະຍາດໂຄວິດ-19 ຂອງແຂວງຄໍາມ່ວນ ເພືອຮັບການປິ່ນປົວແລ້ວ. ສ່ວນສະຖານທີ່ຜູ້ກ່ຽວໄປຄະນະສະເພາະກິດຂອງແຂວງ ໄດ້ມອບໃຫ້ຫ້ອງການສາທາລະນະສຸກເມືອງກ່ຽວຂ້ອງໄປພົ່ນຢາຂ້າເຊື້ອ ແລະ ໃຫ້ປິດຫ້ອງທີ່ຜູ້ກ່ຽວພັກຊົ່ວຄາວ, ເຊັ່ນດຽວກັບຜູ້ທີ່ໄປຮັບເອົາລາວໜີອອກຈາກສູນຕ້ອງໄດ້ກວດຫາເຊື້ອ ແລະ ຈໍາກັດບໍລິເວນຊົ່ວຄາວຈົນກວ່າຈະຄົບຕາມເວລາທີ່ຄະນະສະເພາະກິດກໍານົດໄວ້.
ຂໍ້ມູນຈາກ:ວິທະຍຸກະຈາຍສຽງແຫ່ງຊາດ
