ສະພາຮັບຮອງ ການປັບປຸງບາງມາດຕາຂອງກົດໝາຍ ວ່າດ້ວຍຢາເສບຕິດ

ໃນວາລະການດຳເນີນກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດຊຸດທີ IX ໃນວັນທີ 9 ສິງຫານີ້ , ບັນດາສະມາຊິກສະພາແຫ່ງຊາດ (ສສຊ) ໄດ້ພິຈາລະນາ ແລະ ຮັບຮອງເອົາຮ່າງກົດໝາຍວ່າດ້ວຍການປັບປຸງ ບາງມາດຕາຂອງກົດໝາຍວ່າດ້ວຍຢາເສບຕິດ ທີ່ນຳສະເໜີ ໂດຍ ທ່ານ ພົນຕີ ທອງເຫລັກ ມັງໜໍ່ເມກ ຮອງລັດຖະມົນຕີ ກະຊວງປ້ອງກັນຄວາມສະ ຫງົບ ດ້ວຍຄະແນນສຽງເຫັນດີເປັນສ່ວນຫລາຍ ໃນ12 ມາດຕາດ້ວຍກັນຄື:

1. ມາດຕາ 9 ຢາເສບຕິດເກືອດຫ້າມ.
2. ມາດຕາ 10 ຢາເສບຕິດ ແລະ ສານເຄມີ.
3. ມາດຕາ 34 ຂອງກາງຄະດີຢາເສບຕິດ.
4. ມາດຕາ 35 ການຍຶດ,ການອາຍັດ ແລະ ການຮິບວັດຖຸສິ່ງຂອງ.
5. ມາດຕາ 36 ການຊັດທອດ.
6. ມາດຕາ 50 ການຄຸ້ມຄອງ ແລະ ການນໍາໃຊ້ກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ.
7. ມາດຕາ 56 ຂໍ້ຫ້າມທົ່ວໄປ.
8. ມາດຕາ 61 ອົງການຄຸ້ມຄອງວຽກງານຢາເສບຕິດ.
9. ມາດຕາ 63 ສິດ ແລະ ໜ້າທີ່ ຂອງກະຊວງປ້ອງກກັນຄວາມສະຫງົບ.
10. ມາດຕາ 64 ສິດ ແລະ ໜ້າທີ່ຂອງກອງບັນຊາການປ້ອງກັນຄວາມສະຫງົບ ແຂວງ, ນະຄອນຫລວງ.
11. ມາດຕາ 65 ສິດ ແລະ ໜ້າທີ່ຂອງກອງບັນຊາການປ້ອງກັນຄວາມສະຫງົບ ເມືອງ, ເທດສະບານ, ນະຄອນ.
12. ມາດຕາ 75/1 ມາດຕະການທາງອາຍາ (ເປັນບັນຫາເພີ່ມເຂົ້າ ໃໝ່) ສ່ວນມາດຕາ 75 ເກົ່າແມ່ນຖືກລົບລ້າງຕາມປະມວນກົດໝາຍອາຍາ.

ພາຍຫລັງສະມາຊິກສະພາແຫ່ງຊາດ ໄດ້ປະກອບຄຳຄິດເຫັນແລ້ວ, ປະທານກອງປະຊຸມ ໄດ້ສັງລວມການປະກອບຄຳຄິດຄຳເຫັນຂອງ ສສຊ ເພື່ອໃຫ້ຄະນະຮັບຜິດຊອບຮ່າງກົດໝາຍ ນຳໄປຄົ້ນ ຄວ້າພິຈາລະນາ ແລະ ປັບປຸງໃສ່ບາງເນື້ອໃນຂອງກົດໝາຍດັ່ງກ່າວ ໃຫ້ຖືກຕ້ອງ, ແທດເໝາະກັບສະພາບການ ແລະ ຮັບປະກັນໃຫ້ການຈັດຕັ້ງປະຕິບັດ ແນວທາງປ່ຽນແປງໃໝ່ຂອງພັກ ໂດຍສະເພາະວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ກາຍເປັນລັດປົກຄອງດ້ວຍກົດໝາຍຢ່າງແທ້ຈິງ ແລະ ທັງເປັນບ່ອນອີງ ໃຫ້ແກ່ການເຄື່ອນໄຫວວຽກງານຂອງຂະ ແໜງ ການກ່ຽວຂ້ອງ ເຮັດວຽກສະກັດກັ້ນ ແລະ ຕ້ານຢາເສບຕິດ ໃຫ້ໄປຕາມ ກົນໄກ ແລະ ຂັ້ນຕອນ ຂອງລະບຽບກົດຫມາຍໄດ້ເຂັ້ມງວດ.