ຊົມເຊີຍວັນສື່ມວນຊົນ ແລະ ພິມຈຳໜ່າຍ ຄົບຮອບ 71 ປີ
ໂດຍ: ທິດກ່ຳ
ວັນສື່ມວນຊົນລາວ ແລະ ພິມຈຳໜ່າຍແຫ່ງຊາດ ຄົບຮອບ 71 ປີ ໄດ້ໝູນວຽນມາບັນຈົບຄົບຮອບອີກວາລະໜຶ່ງ. ສຳລັບປີນີ້ ວັນດັ່ງກ່າວຍິ່ງມີຄວາມໝາຍສຳຄັນສຳລັບນັກສື່ມວນຊົນ ແລະ ປະຊາຊົນບັນດາເຜົ່າເຮົາ ຍ້ອນວ່າພວກເຮົາພວມຢູ່ໃນໄລຍະການປະຕິບັດມະຕິ ຄັ້ງທີ XI ຂອງພັກ ແລະ ພວມກ້າວເຂົ້າສູ່ການປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາເສດຖະກິດ-ການເງິນ ແລະ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ. ຢູ່ໃນບັນດາເນື້ອໃນທີ່ກ່າວມານີ້ມັນກາຍເປັນພາລະກິດອັນສຳຄັນ ແລະ ຍິ່ງໃຫຍ່ຂອງສື່ມວນຊົນ ກໍຄືນັກສື່ມວນຊົນລາວເຮົາທີ່ຕ້ອງບຸກທະລຸ ເພື່ອເຮັດໃຫ້ພາລະກິດບັ້ນນີ້ໃຫ້ບັນລຸໄຊຊະນະຢ່າງໃຫຍ່ຫລວງ. ພາລະໜ້າທີ່ອັນສຳຄັນຂອງວຽກສື່ມວນຊົນເຮົາທີ່ຕ້ອງເຮັດຢ່າງເລັ່ງດ່ວນ ກໍຄືໂຄສະນາບັນດາເນື້ອໃນ, ຈຸດປະສົງ, ຄາດໝາຍ, ເປົ້າໝາຍ ນັບທັງບັນດາລະບຽບການ, ຫລັກການ ຕະຫລອດຮອດເນື້ອໃນກົດໝາຍທີ່ກ່ຽວພັນ ແລະ ຕິດພັນກັບວາລະແຫ່ງຊາດ.
ຕະຫລອດໄລຍະ 71 ປີຜ່ານມາ, ວຽກງານສື່ມວນຊົນ ແລະ ພິມຈຳໜ່າຍໄດ້ປະກອບສ່ວນຢ່າງໃຫຍ່ຫລວງໃນພາລະກິດປະຕິວັດຊາດປະຊາທິປະໄຕ, ວຽກງານສື່ມວນຊົນ ແລະ ພິມຈຳໜ່າຍໄດ້ເປັນກະບອກສຽງຢ່າງແມ້ນຢຳ ແລະ ສັກສິດໃນການປຸກລະດົມ, ໂຄສະນາປະຊາຊົນບັນດາເຜົ່າ ເພື່ອເຂົ້າຮ່ວມການປະຕິວັດຕໍ່ສູ້ກັບສັດຕູທີ່ເຂົ້າມາຮຸກຮານ. ບາດກ້າວ ແລະ ຂະຫຍາຍຕົວຂອງລະບົບສື່ມວນຊົນເຮົາໃນເວລານັ້ນແມ່ນເລີ່ມຕົ້ນຈາກໃບປິວ, ໃບຂ່າວ, ກ້າວຂຶ້ນຈົນມີໜັງສືພິມແນວລາວອິດສະຫລະ, ມີວິທະຍຸ ແລະ ໜັງສືພິມແນວລາວຮັກຊາດ.
ສ່ວນການພິມຈຳໜ່າຍກໍເລີ່ມຈາກການຂຽນໃບຂ່າວດ້ວຍມື ກ້າວຂຶ້ນມາເປັນຈັກພິມດີດ, ຈັກແກວ່ງໂລນຽວ ແລະ ມີໂຮງພິມຂະໜາດໃຫຍ່ຂອງແນວລາວຮັກຊາດ. ສ່ວນບຸກຄະລາກອນດ້ານສື່ມວນຊົນເວລານັ້ນກໍກາຍເປັນນັກຮົບປະຕິວັດ ທັງເຮັດໜ້າທີ່ວິຊາສະເພາະ ແລະ ທັງສູ້ຮົບ ຖ້າມີກໍລະນີຜະເຊີນໜ້າໂດຍກົງກັບສັດຕູ.
ພໍຕົກມາຮອດໄລຍະສ້າງສາພັດທະນາປະເທດຊາດ ວຽກງານສື່ມວນຊົນ ແລະ ພິມຈຳໜ່າຍຍິ່ງມີບົດບາດສຳຄັນ ແລະ ມີພາລະກິດຢ່າງໃຫຍ່ຫລວງໃນການເປັນກະບອກສຽງໃຫ້ພັກ ແລະ ລັດຖະບານ ເຊິ່ງພາລະກຽດອັນຍິ່ງໃຫຍ່ກໍຄືຮັບໃຊ້ຊາດຮັບໃຊ້ປະຊາຊົນ. ມາຮອດຍຸກປັດຈຸບັນນີ້ ສື່ມວນຊົນລາວ ແລະ ການພິມຈຳໜ່າຍໄດ້ກ້າວສູ່ຄວາມເປັນທັນສະໄໝໃນທຸກດ້ານ.
ສະນັ້ນ, ໃນໂອກາດວັນສື່ມວນຊົນ ແລະ ພິມຈຳໜ່າຍ ຄົບຮອບ 71 ປີ ຈຶ່ງຂໍສະດຸດີ ແລະ ຊົມເຊີຍເປັນຢ່າງຍິ່ງ ຂໍໃຫ້ພາລະກິດສື່ມວນຊົນລາວ ແລະ ການພິມຈຳໜ່າຍຈົ່ງສືບຕໍ່ພັດທະນາ ແລະ ກ້າວໄປຢ່າງບໍ່ຢຸດຢັ້ງ.
