ສະພາແຫ່ງຊາດ ເນັ້ນໃຫ້ລັດຖະບານເອົາໃຈໃສ່ 7 ບັນຫາແກ້ໄຂຢາເສບຕິດ

ໃນວາລະດຳເນີນກອງປະຊຸມສະໄຫມສາມັນຂອງສະພາແຫ່ງຊາດຊຸດທີ IX ໃນວັນທີ 6 ສິງຫານີ້ ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ຕາງໜ້າຄະນະປະຈໍາສະພາແຫ່ງຊາດ ໄດ້ມີຄໍາເຫັນຕໍ່ບົດລາຍງານວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ວ່າ: ຄະນະປະຈໍາສະພາແຫ່ງຊາດ ເຫັນດີເປັນເອກະພາບ ຕາມເນື້ອໃນທີ່ລະບຸໄວ້ ຢູ່ໃນພາກທີ II ຂອງວາລະແຫ່ງຊາດດັ່ງກ່າວ ຊຶ່ງເລີ່ມຈາກທັດສະນະຊີ້ນໍາຂອງພັກ ແລະ ຫລັກການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດທີ່ວ່າ: ເດັດຂາດ, ໂປ່ງໃສ, ເປັນມືອາຊີບ ແລະ 6 ວຽກງານຈຸດສຸມຂອງລັດຖະບານ ແຕ່ ປີ 2021-2023.

ແຕ່ເຖິງຢ່າງໃດກໍຕາມ, ຄະນະປະຈໍາສະພາແຫ່ງຊາດ ເຫັນວ່າລັດຖະບານ ຈະຕ້ອງໄດ້ເອົາໃຈໃສ່ບາງບັນຫາຕື່ມດັ່ງນີ້:

1. ກ່ຽວກັບຄາດໝາຍໃນການແກ້ໄຂບັນຫາຢາເສບຕິດ ແຕ່ປີ 2021-2023 ຄວນພິຈາລະນາຕື່ມໃຫ້ຈະ ແຈ້ງ ເຊັ່ນວ່າ: ຈະແກ້ໄຂອັນໃດກ່ອນ, ແກ້ໄຂອັນໃດຫລັງ, ໄລຍະເວລາໃດແກ້ໄດ້ອັນໃດ ແລະ ໃຫ້ມີຜົນສໍາເລັດໃນລະດັບໃດ, ຄວນມີຕາຕະລາງກໍານົດໜ້າວຽກ ແລະ ກໍານົດເວລາຢ່າງຈະແຈ້ງ ໂດຍສ້າງເປັນໜ້າວຽກລະອຽດ ແລະ ເປັນເອກະສານຊ້ອນທ້າຍ ຂອງເອກະສານວາລະແຫ່ງຊາດສະບັບນີ້.
2. ສະເໜີໃຫ້ຖືເອົາ “ການຕ້ານ, ສະກັດກັ້ນ ແລະ ປ້ອງກັນ” ກັບການ “ປາບປາມ” ບັນຫາຢາເສບຕິດໄປພ້ອມໆກັນ, ໃນນັ້ນ ຖືການປຸກລະດົມ, ສຶກສາອົບຮົມເປັນພື້ນຖານຕົ້ນຕໍ; ເອົາການປາບປາມ, ລົງໂທດເປັນສໍາຄັນ, ຈໍາເປັນ ແລະ ເດັດຂາດ, ເຂັ້ມງວດ ໂດຍສະເພາະ ການກໍານົດມາດຕະການ ແລະ ລົງໂທດຕໍ່ຜູ້ກະທໍາຜິດ, ຫາກແມ່ນເຈົ້າໜ້າທີ່, ພະນັກງານລັດ ເປັນຜູ້ກະທໍາຜິດເອງ ຫລື ພົວພັນກ່ຽວຂ້ອງກັບບັນຫາຢາເສບຕິດ ແມ່ນຕ້ອງ ຖືກວິໄນ, ຕ້ອງໄດ້ຮັບໂທດຫນັກກວ່າປະຊາຊົນ ເພື່ອເປັນແບບຢ່າງ ແລະ ສ້າງຄວາມເຊື່ອໝັ້ນໃຫ້ແກ່ສັງຄົມ.
3. ລັດຖະບານ ຕ້ອງເດັດຂາດແກ້ໄຂຕ່ອງໂສ້-ເຄືອຂ່າຍ ຂະບວນການຄ້າຢາເສບຕິດ ໂດຍສະເພາະແມ່ນ ການປາບປາມຫົວໂປ່ໂຕການໃຫ້ມີການລົງໂທດຢ່າງເຂັ້ມງວດ, ເດັດຂາດຕາມກົດໝາຍ ເພື່ອຕັດວົງຈອນຂະບວນການການຜະລິດ, ຂົນສົ່ງ ແລະ ຈໍາໜ່າຍຢາເສບຕິດ, ຄຽງຄູ່ກັນນັ້ນ, ຕ້ອງເດັດຂາດ ແກ້ໄຂບັນຫາຢາເສບຕິດ ທີ່ຕິດພັນກັບການກໍ່ໃຫ້ເກີດບັນຫາຫຍໍ້ທໍ້ທາງສັງຄົມ ແລະ ເສດຖະກິດ ກໍຄືຄວາມໝັ້ນຄົງ, ຄວາມເປັນລະບຽບຮຽບຮ້ອຍຂອງສັງຄົມ ເຊັ່ນ: ການຄ້າປະເວນີ, ການຄ້າມະນຸດ, ການກູ້ເງິນນອກລະບົບ, ການຟອກເງິນ, ການຂີ້ລັກ, ປຸ້ນຈີ້ ແລະ ອື່ນໆ…
4. ການສ້າງ, ປັບປຸງນິຕິກຳໃຕ້ກົດໝາຍຕ້ອງດໍາເນີນການໄວ, ທັນສະພາບການ, ອັນທີ່ມີແລ້ວ ແຕ່ບໍ່ທັນ ສອດຄ່ອງ, ບໍ່ທັນຮັດກຸມ ແລະ ອັນໃດຍັງບໍ່ທັນຄົບ, ບໍ່ທັນຈະແຈ້ງ, ບໍ່ທັນມີ, ຕ້ອງສ້າງ ແລະ ປັບປຸງເພື່ອຮັບປະກັນ ໃຫ້ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ.
5. ໃຫ້ເພີ່ມທະວີການປະຕິບັດກົດໝາຍ, ນິຕິກໍາໃຕ້ກົດໝາຍ ແລະ ບັນຫາອື່ນໆ ທີ່ກ່ຽວຂ້ອງເຖິງວຽກງານແກ້ໄຂບັນຫາຢາເສບຕິດ ຂອງພາກສ່ວນອົງການສືບສວນ-ສອບສວນ, ສານປະຊາຊົນ, ອົງການໄອຍະການປະຊາຊົນ, ອົງການປະຕິບັດຄໍາຕັດສິນຂອງສານ ແລະ ຂະແໜງວິຊາສະເພາະທີ່ກ່ຽວຂ້ອງໃຫ້ມີຄວາມເດັດຂາດ ແລະ ເຂັ້ມງວດອີຫລີ. ສໍາຄັນແມ່ນການປະຕິບັດໜ້າທີ່ສືບສວນ-ສອບສວນ, ພິຈາລະນາຕັດສິນຄະດີ ແລະ ການຈັດຕັ້ງປະຕິບັດຄໍາຕັດສິນຂອງສານ ຕ້ອງຮັບປະກັນເຮັດໃຫ້ທຸກຂັ້ນຕອນ ຂອງການດໍາເນີນການມີຄວາມໂປ່ງໃສ ຕາມ ກົດໝາຍ ແລະ ຮັບປະກັນຄວາມຍຸຕິທໍາຢ່າງແທ້ຈິງ.
6. ເອົາໃຈໃສ່ສ້າງຄວາມເຂັ້ມແຂງໃຫ້ສະຖາບັນຄອບຄົວ ແລະ ຊຸມຊົນ ໃນການຕ້ານ, ສະກັດກັ້ນ ແລະ ແກ້ໄຂບັນຫາຢາເສບຕິດ, ສິ່ງສໍາຄັນແມ່ນເຮັດໃຫ້ປະຊາຊົນ, ສະຖາບັນຄອບຄົວ, ບ້ານມີສ່ວນຮ່ວມ ແລະ ເປັນເຈົ້າການຮ່ວມກັບອໍານາດການປົກຄອງ ເພື່ອຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ ເປັນຮູບປະທໍາຕົວຈິງ.
7. ຕ້ອງຖືເອົາວຽກງານລົງກໍ່ສ້າງຮາກຖານການເມືອງ ຕິດພັນກັບການສ້າງບ້ານພັດທະນາ, ບ້ານປອດຢາ ເສບຕິດ, ບ້ານວັດທະນາທໍາ ຕາມທິດ 3 ສ້າງໃຫ້ມີຄຸນນະພາບ ແລະ ຖືກຕ້ອງຕາມຄວາມຈິງອີຫລີ, ເພາະຜ່ານມາ ເຫັນວ່າປະຕິບັດໄດ້ ເເຕ່ພຽງເປັນຮູບການ.