ເດືອນສິງຫາກັບຄວາມໝາຍທາງປະຫວັດສາດຂອງຊາດ

ໂດຍ: ທິດກ່ຳ

ສະເພາະເດືອນສິງຫານີ້ ອາດຈະຍັງມີຫລາຍທ່ານ ແລະ ຫລາຍຄົນທີ່ຍັງບໍ່ທັນຮູ້ວ່າ ໃນເດືອນນີ້ແມ່ນມີວັນໃດແດ່ທີ່ມີສັນຍາລັກ ແລະ ຄວາມໝາຍທາງດ້ານປະຫວັດສາດຂອງຊາດລາວເຮົາ.
ເພາະສະນັ້ນ ທິດກ່ຳ ຈຶ່ງຂໍຢິບຍົກເອົາຈຳນວນວັນຕ່າງໆໃນຊ່ວງເດືອນສິງຫາວ່າມີວັນໃດແດ່ທີ່ມີຄວາມໝາຍສຳຄັນທາງດ້ານປະຫວັດສາດຂອງຊາດລາວເຮົາມາເວົ້າສູ່ກັນຟັງຄື: ວັນທີ 13 ສິງຫາ ເປັນວັນສື່ມວນຊົນ ແລະ ພິມຈຳໜ່າຍ ຄົບຮອບ 71 ປີ, ວັນທີ 15 ສິງຫາ ເປັນວັນລັດຖະທຳມະນູນແຫ່ງຊາດ ຄົບຮອບ 30 ປີ ແລະ ວັນທີ 23 ສິງຫາ ເປັນວັນຢຶດອຳນາດທົ່ວປະເທດ. ໃນ 3 ວັນດັ່ງກ່າວລ້ວນແລ້ວແຕ່ເປັນວັນສຳຄັນ ທັງມີຄວາມໝາຍທາງດ້ານປະຫວັດສາດຂອງຊາດລາວເຮົາ ເຊິ່ງມັນໄດ້ຕິດພັນກັບພາລະກິດແຫ່ງການຕໍ່ສູ້ກູ້ຊາດ ແລະ ການສ້າງສາພັດທະນາປະເທດຊາດໃຫ້ກ້າວເດີນໄປຕາມເສັ້ນທາງແຫ່ງຍຸກສະໄໝຂອງໂລກ ແລະ ຄວາມມຸ້ງຫວັງຂອງປວງຊົນລາວທັງຊາດ ຄືເສັ້ນທາງສັງຄົມນິຍົມ.

ແນວໃດກໍຕາມ, ໜຶ່ງໃນວັນສຳຄັນທີ່ກ່າວມານີ້ ຄືວັນທີ 13 ທີ່ຈະມາເຖິງໃນມໍ່ໆນີ້ກໍແມ່ນວັນສື່ມວນຊົນ ແລະ ການພິມຈຳໜ່າຍແຫ່ງຊາດ ເຊິ່ງວັນດັ່ງກ່າວ ບັນດານັກສື່ມວນຊົນລາວທົ່ວປະເທດ ພ້ອມກັບປະຊາຊົນບັນດາເຜົ່າຈະໄດ້ຮ່ວມກັນສະເຫລີມສະຫລອງຢ່າງມີຄວາມໝາຍ ແລະ ພາຍໃຕ້ບັນຍາກາດຟົດຟື້ນ ດ້ວຍຮູບການ ແລະ ວິທີການຕ່າງໆຢ່າງເໝາະສົມ ຕາມເງື່ອນໄຂທີ່ປະເທດຊາດຂອງພວກເຮົາພວມຢູ່ໃນໄລຍະເຮັດສົງຄາມຕ້ານໂຄວິດ-19.

ເຖິງຢ່າງໃດກໍດີ, ເພື່ອເຮັດໃຫ້ງານສະເຫລີມສະຫລອງວັນສື່ມວນຊົນເຕັມໄປດ້ວຍບັນຍາກາດອັນດີ ແລະ ມີຄວາມໝາຍອັນຍິ່ງໃຫຍ່ໃນປີ 2021 ນີ້, ທາງກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກໍໄດ້ເຮັດແຈ້ງການແນະນຳເຖິງຫົວໜ້າອົງການສື່ມວນຊົນ, ຫົວໜ້າອົງການພິມຈຳໜ່າຍ ຕະຫລອດເຖິງຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງ, ນະຄອນຫລວງວຽງຈັນໃນຂອບເຂດທົ່ວປະເທດວ່າໃຫ້ມີການສະຫລຸບລາຍງານຜົນງານ ແລະ ມູນເຊື້ອ ທັງກຳນົດແຜນເຄື່ອນໄຫວຂອງຕົນຢ່າງມີວິໄສທັດ ຖືເອົາບັ້ນໂຄສະນາວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງເຊື້ອພະຍາດໂຄວິດ-19 ເປັນວຽກງານອັນສຳຄັນ ໂດຍຕິດພັນກັບວຽກງານສ້າງຂະບວນການຂ່ຳນັບຮັບຕ້ອນວັນສຳຄັນຂອງພັກຂອງຊາດ. ນອກຈາກນັ້ນ ກໍໃຫ້ກະກຽມຫົວຂໍ້ສຳມະນາວິທະຍາສາດ ຫລື ຫົວຂໍ້ທີ່ກ່ຽວຂ້ອງໃນວຽກງານພັດທະນາສື່ມວນຊົນ ແລະ ການພິມຈຳໜ່າຍ ເພື່ອແນະນຳແລກປ່ຽນຄຳຄິດຄຳເຫັນ ແລະ ຖອດຖອນບົດຮຽນເຊິ່ງກັນ ແລະ ກັນ. ອັນສຳຄັນອີກອັນໜຶ່ງກໍແມ່ນກະກຽມບົດໂອ້ລົມໃຫ້ການນຳຂັ້ນຕ່າງໆໃຫ້ລະອຽດ, ຈະແຈ້ງ ແລະ ຊັດເຈນ. ກໍຂໍໃຫ້ການສະເຫລີມສະຫລອງວັນສື່ມວນຊົນປີນີ້ຈົ່ງມີບັນຍາກາດຟົດຟື້ນ ແລະ ມີຜົນສຳເລັດໂດຍດີ.