ຂະແໜງກະສິກຳ ແລະ ປ່າໄມ້ ເນັ້ນໃສ່ 5 ວຽກຈຸດສຸມ

ໃນວາລະກອງປະຊຸມສະໄໝສາມັນ ຂອງສະພາແຫ່ງຊາດຊຸດທີ IX ໃນວັນທີ 6 ສິງຫາ ນີ້, ທ່ານ ເພັດ ພົມພີພັກ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ສະເໜີດການແກ້ໄຂບາງບັນຫາທີ່ຕິດພັນກັບ

ຂະແໜງການຂອງຕົນໃນຊ່ວງໄລຍະແຕ່ນີ້ຫາທ້າຍປີ 2023, ຊຶ່ງມີ 5 ວຽກຕົ້ນຕໍຄື:
1. ເລັ່ງຊຸກຍູ້ການສົ່ງອອກສິນຄ້າກະສິກໍາ-ລ້ຽງສັດທີ່ໄດ້ມີສັນກັບປະເທດຄູ່ຄ້າແລ້ວເຊັ່ນ: ຕະຫລາດ ສປ ຈີນ ແລະ ບັນດາປະເທດໃກ້ຄຽງທີ່ໄດ້ ກໍານົດຢູ່ໃນບັນຊີຜະລິດຕະພັນພືດ.

2. ເລັ່ງປັບປຸງມາດຕະຖານການຜະລິດກະສິກໍາສະອາດ(OA,GAP ແລະ ອື່ນໆ) ໃຫ້ສາມາດເທົ່າທຽມມາດຕະຖານຂອງ ອາຊຽນ ແລະ ສາກົນ ໂດຍສຸມໃສ່ 57 ພືດ ດ້ວຍການສ້າງ ແລະ ປັບປຸງ ນິຕິກໍາ ເພື່ອເປັນເຄື່ອງມື ຈໍານວນ 45 ສະບັບ ສໍາລັບພືດ ແລະ 32 ສະບັບສໍາລັບສັດລ້ຽງ ,ດລັ່ງ ກວດກາຄຸນນະພາບ ແລະ ມາດຕະ ຖານຜະລິດຕະພັນຈາກພືດ, ສັດ ແລະ ປາ ຢູ່ໃນດ່ານສາກົນ ແລະ ແຂວງຈໍານວນໜຶ່ງ, ອອກໃບຢັ້ງຢືນກະສິກໍາສະອາດ ໃຫ້ໄດ້ 250 ຫົວໜ່ວຍ, ເຜີຍແຜ່ນິຕິກໍາມາດຕະຖານ SPS ຈໍານວນ 12 ສະບັບ; ເລັ່ງຝຶກອົບຮົມ ແລະ ເຜີຍແຜ່ ມາດຕະຖານ ກະສິກໍາ ສະອາດ ໃຫ້ຜູ້ຜະລິດ ແລະ ຜູ້ປະກອບການ ຈໍານວນ 34 ຫົວໜ່ວຍຕໍ່ປີ; ສ້າງນັກກວດກາຂັ້ນສູນກາງ ແລະ ຂັ້ນແຂວງ ກ່ຽວກັບ ກະສິກໍາ ສະອາດ ແລະ ມາດຕະຖານອື່ນໆ; ປັບປຸງກົນໄກວາງແຜນ, ປະສານງານ ແລະ ແລກປ່ຽນຂໍ້ມູນດ້ານການຜະລິດ ແລະ ຕະຫລາດ ສໍາລັບສິນຄ້າກະສິກໍາສົ່ງອອກລະຫວ່າງ ຂັ້ນສູນກາງ, ທ້ອງຖິ່ນ ແລະ ຜູ້ປະກອບການໃຫ້ດີຂຶ້ນ.

3. ເລັ່ງກໍານົດບັນຊີລາຍການສິນຄ້າກະສິກໍາເພື່ອທົດແທນການນໍາເຂົ້າ ແລະ ນະໂຍບາຍສົ່ງ ເສີມຢ່າງຮອບດ້ານ ໄປຄຽງຄູ່ກັບການຂະຫຍາຍ ແລະ ປັບປຸງ ກໍາລັງການຜະລິດ (ກຸ່ມການຜະລິດ, ສະຫະກອນກະສິກໍາ, ສະມາຄົມ, ເຄືອຂ່າຍກະສິກອນ ແລະ ອື່ນໆ) ແລະ ຮູບແບບການຜະລິດຕ່າງໆ ໃຫ້ກວ້າງຂວາງ ແລະ ເປັນຮູບປະທໍາຫລາຍຂຶ້ນ.
4. ເລັ່ງປັບປຸງ ແລະ ພັດທະນາໂຄງລ່າງພື້ນຖານການຜະລິດ ແລະ ເຕັກນິກ ເພື່ອຫລຸດຜ່ອນຕົ້ນທຶນການຜະລິດ ເຊັ່ນ: ໂຮງອົບ, ໂຮງຂັດເມັດ, ລານຕາກ, ສາງເກັບມ້ຽນສິນຄ້າ, ສາງເຢັນ, ຫ້ອງວິໄຈ, ສູນບໍລິການສຸຂານາໄມ ພືດ ແລະ ສັດ, ຕະຫລາດ ຂາຍຍຍ່ອຍ-ຂາຍຍົກ ແລະ ລະບົບການຂົນສົ່ງຜົນຜະລິດກະສິກໍາ ທີ່ໄດ້ກໍານົດໃນ 7 ໂຄງການສໍາລັບພືດ ແລະ 2 ໂຄງການສໍາລັບສັດ ), ເຂດຄ່ຽນຖ່າຍສິນຄ້າຕາມແລວທາງລົດໄຟ ລາວ-ຈີນ, ດ່ານສາກົນ, ເຂດ ເສດຖະກິດພິເສດ, ເຂດເສດຖະກິດສະເພາະ ແລະ ເຂດຄ່ຽນຖ່າຍສິນຄ້າທ່າບົກ ຊຶ່ງປະຈຸ ບັນ ເຮົາມີໂຄງການສະຫນັບສະຫນູນ ທັງຫມົດ 57 ໂຄງການ ໃນນີ້ ໂຄງການຊ່ວຍເຫລືອລ້າ ຈໍານວນ 29 ໂຄງການ, ກູ້ຢືມ 15 ໂຄງການ, ໂຄງການຮ່ວມມືດ້ານວິຊາການ 12 ໂຄງການ, ນອກນັ້ນ ຍັງມີໂຄງການລົງທຶນຂອງຜູ້ປະກອບການ ຈໍານວນໜຶ່ງເຊັ່ນ: ບໍລິສັດ ຊວນເຢ, ບໍລິສັດ AIDC, ບໍລິສັດ ຕ່ຽນຈາງ……

5. ເລັ່ງຈັດບູລິມະສິດ ແລະ ກໍານົດເຂດການລົງທຶນດ້ານກະສິກໍາ, ເອົາໃຈໃສ່ຕິດຕາມກວດກາ ໂຄງການລົງທຶນໃນຂະແໜງກະສິກໍາ ອີງຕາມສັນຍາທີ່ໄດ້ຕົກລົງ, ປັບປຸງກົນໄກ ການລົງທຶນຕາມ ຮູບແບບຮ່ວມມືລັດ-ເອກະຊົນ, ການຜະລິດກະສິກໍາຕາມສັນຍາ ເຊັ່ນ: ຮູບແບບ 2+3, ຮູບແບບ PPP, ຮູບແບບເຊົ່າ ຫລື ສໍາປະທານດິນລັດ, ໃນນີ້ແມ່ນຈະສຸມໃສ່ປັບປຸງບັນດານິຕິກໍາເພື່ອຊຸກຍູ້ສົ່ງເສີມການລົງທຶນ ໂດຍການຕັດບັນດາຂັ້ນຂອດທີ່ອຸດຕັນ, ກົດໜ່ວງ ການລົງທຶນໃນຂົງເຂດກະສິກໍາ ແລະ ປ່າໄມ້ ໃຫ້ມີຄວາມຄ່ອງຕົວ. ດໍາເນີນການສໍາຫລວດ, ຈັດສັນ ແລະ ກໍານົດພື້ນທີ່ ການຜະລິດກະສິກໍາຕາມທ່າແຮງ ແລະ ເງື່ອນໄຂເຫມາະສົມຕາມລະບົບນິເວດ ໄປຄ່ຽງຄູ່ກັບການນໍາໃຊ້ນະວັດຕະກໍາໃຫມ່ທີ່ທັນສະໄຫມ ແລະ ເປັນມິດຕໍ່ສິ່ງແວດລ້ອມ ທີ່ໄດ້ກໍານົດໃນ 7 ໂຄງການສໍາລັບພືດ ແລະ 2 ໂຄງການສໍາລັບສັດ.