ທ້າວ ເຕ້ ຖືກກັກຕົວ ຂໍ້ຫາ ການເອົາຄົນເຂົ້າປະເທດຢ່າງຜິດກົດໝາຍ

ພັທ ສີວິໄລ ພູມນະໄຊ ຫົວໜ້າກອງບັນຊາການ ປກສ ເມືອງສັງທອງ ນວ ໃຫ້ຮູ້ວ່າ: ພາຍຫຼັງທີ່ ທ້າວ ເຕ້ ໄດ້ລັກເອົາຄົນເຂົ້າປະເທດ ໃນຄັ້ງວັນທີ 26 ມິຖຸນາ 2021 ເຈົ້າໜ້າທີ່ ກອງບັນຊາການ ປກສ ເມືອງສັງທອງ ໄດ້ຊອກນຳຕົວ ເພື່ອແນະນຳຜູ້ກ່ຽວເຂົ້າສູນກັກກັນ ແຕ່ຜູ້ກ່ຽວບໍ່ໃຫ້ການຮ່ວມມື. ຈົນມາຮອດວັນທີ 27 ກໍລະກົດ 2021 ເຈົ້າໜ້າທີ່ຈິ່ງສາມາດກັກຕົວໄດ້ ໃນຂໍ້ກ່າວຫາການເອົາຄົນເຂົ້າປະເທດຢ່າງຜິດກົດໝາຍ ທີ່ຜູ້ກ່ຽວໄດ້ລັກລອບໄປເອົາຄົນມາແຕ່ປະເທດໄທ ແລ້ວເອົາຕົວຫຼົບໜີ, ປັດຈຸບັນ ເຈົ້າໜ້າທີ່ພວມທຳການສືບສວນ-ສອບສວນ.

ຜ່ານການສອບສວນຂອງເຈົ້າໜ້າທີ່ ທ້າວ ເຕ້ ໄດ້ຮັບສາລະພາບວ່າ: ໃນຄັ້ງວັນທີ 26 ມິຖຸນາ ຜ່ານມາ ຕົນໄດ້ຮັບຄ່າຈ້າງຈຳນວນ 500.000 ກີບ ຈາກ ທ້າວ ເບີດ ຢູ່ບ້ານຄົກເພີງ ໃຫ້ຕົນຂ້າມໄປຮັບຜູ້ຍິງຄົນ 1 (ບໍ່ຮູ້ຊື່) ຢູ່ທ່ານ້ຳ ບ້ານຜາແດງ ເມືອງສັງຄົມ ແຂວງໜອງຄາຍ (ປະເທດໄທ). ຈາກນັ້ນຕົນໄດ້ຊວນໝູ່ອີກຄົນ 1 ໄປນຳ ຊື່ ທ້າວ ເຄັງ ອາຍຸ 25 ປີ ຢູ່ບ້ານຄົກເພີງ ໄດ້ພາກັນຂີ່ເຮືອຂ້າມໄປຮັບເອົາຜູ້ຍິງຄົນດັ່ງກ່າວ ວັນທີ 26 ມິຖຸນາ 2021 ແລ້ວພາມາສົ່ງຂຶ້ນທ່ານ້ຳເຊິ່ງກັບເຮືອນຂອງ ທ້າວ ເບີດ ບ້ານຄົກເພີງ ແລະ ບໍ່ຮູ້ອີກວ່າ ທ້າວ ເບີດ ໄດ້ພາຜູ້ຍິງຄົນນັ້ນໄປໃສ, ສ່ວນພວກຕົນ ກໍ່ໄດ້ເອົາເຮືອໄປຊຸກເຊື່ອງໄວ້ແລ້ວພາກັນກັບເມື່ອເຮືອນ, ພໍຮອດເຮືອນ ນາງ ບີ ຜູ້ເປັນເມຍຂອງຕົນໄດ້ບອກວ່າມີເຈົ້າໜ້າທີ່ມາຖາມຫາ ຕົນຮູ້ສຶກຢ້ານ ຈິ່ງໄດ້ພາເມຍຫຼົບໜີໄປເຊົ່າຫ້ອງແຖວຢູ່ ເມືອງຊະນະຄາມ ແຂວງວຽງຈັນ.

ຮອດວັນທີ 27 ກໍລະກົດ 2021 ພວກຕົນໄດ້ພາກັນກັບຄືນມາບ້ານ ຈິ່ງຖືກເຈົ້າໜ້າທີ່ກັກຕົວໄວ້.