ທົ່ວປະເທດລາວ ຈະເລີ່ມສັກວັກຊີນປ້ອງກັນໂຄວິດ-19 ຈອນສັນ ແລະ ຈອນສັນ ວັນທີ 2 ສິງຫານີ້
ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາ ລະນະສຸກ ໃຫ້ຮູ້ວ່າ: ໃນວັນທີ 2 ສິງຫາ 2021 ນີ້ ລັດຖະບານ ຈະເລີ່ມສັກວັກຊີນປ້ອງກັນໂຄວິດ-19 Johnson&Johnson ຈຳນວນ 1.008.000 ໂດສ ໃນຂອບເຂດທົ່ວປະເທດ, ສຳລັບຢູ່ນະຄອນຫລວງວຽງຈັນແມ່ນກຳນົດສັກແຕ່ວັນທີ 2-9 ສິງຫານີ້ ຢູ່ສູນການຄ້າລາວ-ໄອເຕັກ, ມູນນິທິຈີນດົງປ່າແຫລບ, ໂຮງໝໍ 9 ຕົວເມືອງ, ໂຮງຮຽນປະຖົມໂນນຄໍ້, ແລະ ມຕ ຕານມີໄຊ. ເຊິ່ງການແຈກຢາຍແມ່ນໄດ້ສຸມໃສ່ບັນດາແຂວງພາກໃຕ້ ທີ່ມີການລະບາດຫລາຍເປັນບູລະມະສິດ.
ສຳລັບການແຈກຢາຍວັກຊີນ ແມ່ນອີງໃສ່ 3 ຫລັກການໃຫຍ່ ຄື: ພື້ນທີ່ ທີ່ມີການລະບາດ, ພື້ນທີ່ ທີ່ມີຄວາມສ່ຽງ ເຊັ່ນ: ເປັນແຂວງທີ່ມີຊາຍແດນຕິດຈອດກັບປະເທດທີ່ມີການລະບາດຫລາຍ ແລະ ອີງໃສ່ຈຳນວນປະຊາກອນ. ສ່ວນກຸ່ມເປົ້າໝາຍທີ່ຈະຕ້ອງໃຫ້ເຂົ້າເຖິງໃນການສັກຄັ້ງນີ້, ແມ່ນສຸມໃສ່ຜູ້ສູງອາຍຸ, ກຸ່ມພະນັກງານແພດໝໍ ແລະ ຜູ້ທີ່ເຮັດວຽກຢູ່ດ່ານໜ້າ, ພ້ອມກັນນັ້ນ ທຸກຄົນທີ່ເຂົ້າມາຈຳກັດບໍລິເວນ ຢູ່ບັນດາສູນຈຳກັດບໍລິເວນ ພາຍຫລັງຈຳກັດບໍລິເວນຄົບ 14 ວັນແລ້ວ ແລະ ຜົນກວດອອກມາເປັນລົບແລ້ວ ຕ້ອງໄດ້ສັກວັນຊີນກ່ອນອອກເມືອບ້ານ ແລະ ຫລັງຈາກເມືອບ້ານຕ້ອງໄດ້ກັກໂຕຕື່ມ 7 ວັນ ເພື່ອຕິດຕາມຮ່າງກາຍ ຖ້າບໍ່ມີຫຍັງຈຶ່ງອອກໄປເຄື່ອນໄຫວຢູ່ໃນສັງຄົມແບບປົກກະຕິ.
ມາຮອດວັນທີ 28 ກໍລະກົດ 2021, ສປປ ລາວ ສາມາດສັກວັກຊີນເຂັມທີ 1 ກວມໄດ້ 15,12% ແລະ ເຂັມທີ 2 ກວມເອົາ 11,69% ຂອງຈຳນວນປະຊາກອນທັງໝົດ. ສະເພາະນະຄອນຫລວງວຽງຈັນແມ່ນກວມເອົາ 41% ແລະ ແຂວງບໍ່ແກ້ວກວມເອົາ 39% ເນື່ອງຈາກວ່າສອງແຂວງດັ່ງກ່າວ ເປັນພື້ນທີ່ທີ່ມີການລະບາດຫລາຍໃນຊຸມຊົນໃນເມື່ອກ່ອນ. ສະນັ້ນ, ຈຶ່ງໄດ້ສຸມວັກຊີນເຂົ້າໄປສອງແຂວງດັ່ງກ່າວໃຫ້ໄດ້ສັກຫລາຍເທົ່າທີ່ຈະຫລາຍໄດ້.
