ໂຈະຊົ່ວຄາວການຮັບເອກະສານສະເໜີໃໝ່ສໍາລັບການສໍາຫລວດ, ຂຸດຄົ້ນ ແລະ ສົ່ງອອກ ແຮ່ເຫຼັກ ແບບທົດລອງ
ອີງຕາມ ຫ້ອງວ່າການສຳນັກງານນາຍົກ ເລກທີ 862/ຫສນຍ ວັນທີ 26 ກໍລະກົດ 2021 ນີ້ ໂດຍມີເນື້ອໃນວ່າ: ຫ້ອງວ່າການສໍານັກງານນາຍົກລັດຖະມົນຕີ ຂໍຖືເປັນກຽດແຈ້ງການຊີ້ນໍາ ຂອງນາຍົກລັດຖະມົນຕີ ໂດຍໃຫ້ໂຈະຊົ່ວຄາວການຮັບເອກະສານສະເໜີຂໍລົງທຶນ ສໍາຫຼວດ, ຂຸດຄົ້ນ ແລະ ສົ່ງອອກ ແຮ່ເຫຼັກ ແບບທົດລອງ ເລີ່ມແຕ່ວັນທີ 1 ສິງຫາ 2021 ເປັນຕົ້ນໄປ ເພື່ອກວດກາ ແລະ ປະເມີນການອະນຸຍາດຜ່ານມາ ໂດຍມອບໃຫ້ກະຊວງແຜນການ ແລະ ການລົງທຶນ ເປັນໃຈກາງສົມທົບພາກສ່ວນກ່ຽວຂ້ອງຈັດຕັ້ງປະຕິບັດການປະເມີນຄືນດັ່ງກ່າວ, ບົນພື້ນຖານຜົນການປະເມີນ ເພື່ອສະເໜີກອງປະຊຸມນາຍົກ-ຮອງນາຍົກລັດຖະມົນຕີ ພິຈາລະນາ.
ພ້ອມທັງໃຫ້ຕະລະຂະແໜງການທີ່ກ່ຽວຂ້ອງ ເຊັ່ນ: ກະຊວງພະລັງງານ ແລະ ບໍ່ແຮ່, ກະຊວງການເງິນ, ກະຊວງໂຍທາທິການ ແລະ ຂົນສົ່ງ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ອົງການປົກຄອງທ້ອງຖິ່ນຕ່າງໆ ສືບຕໍ່ປະຕິບັດຕາມພາລະບົດບາດຂອງຕົນ ສິ່ງສໍາຄັນການຢັ້ງຢືນ ເນື້ອທີ່ແຮ່ເຫຼັກ ໃນໃບສະເຫນີຂອງບໍລິສັດຕ່າງໆ ບໍ່ໃຫ້ມີທັບຊ້ອນກັບເນື້ອທີ່ຂອງບໍລິສັດອື່ນ ທີ່ໄດ້ຮັບອະນຸຍາດຖືກຕ້ອງ ຜ່ານມາແລ້ວນັ້ນ.
