ຖືໂອກາດຍາມເຂົ້າພັນສາລະຫ່າງຈາກໂຄວິດ-19

ໂດຍ: ທິດກ່ຳ

ໂດຍປົກກະຕິແລ້ວ ຊ່ວງໄລຍະເຂົ້າພັນສາ ນັບແຕ່ຂຶ້ນ 15 ຄ່ຳເດືອນ 8 ລາວ ຫາຂຶ້ນ 15 ຄ່ຳເດືອນ 11 2564 ຕາມປະຕິທິນລາວ ເຊິ່ງເປັນໄລຍະ 3 ເດືອນສຳລັບພະສົງສາມະເນນກໍຈະງົດອອກໄປທຳບຸນສິນກິນທານ ຫລື ທຳກິດຈະວັດຕ່າງໆຢູ່ແຫ່ງອື່ນໆ. ໝາຍວ່າເພິ່ນຈະປະຕິບັດທຳຢູ່ໃນວັດຕະຫລອດ 3 ເດືອນເຕັມ, ສ່ວນຄະລືຫັດ ຫລື ອອກຕົນຍາດໂຍມຜູ້ໃດທີ່ຖືສາສະໜາພຸດອ່າວເຄັ່ງຂັດແດ່ກໍຈະອະທິທານທຳຕົນເປັນຄົນດີ, ລະຫ່າງສິ່ງອະບາຍຍະມຸກຕ່າງໆ ດ້ວຍການກະທຳໃນສິ່ງທີ່ເປັນມຸງຄຸນແກ່ຊີວິດ ເປັນຕົ້ນງົດການດື່ມເຫລົ້າ, ງົດການຊຸມແຊວ, ງົດການໄປຫລິ້ນໄປທ່ຽວ, ວັນສິນວັນພະກໍໄປຈຳສິນ ຫລື ນັ່ງສະມາທິຢູ່ໃນວັດ. ນອກຈາກນັ້ນ ກໍກະທຳໃນສິ່ງທີ່ດີໆທີ່ມີປະໂຫຍດຕໍ່ສັງຄົມບ້ານເມືອງ.

ເພາະສະນັ້ນ ໃນຊ່ວງໄລຍະເຂົ້າພັນສານີ້ ພວກເຮົາທັງຫລາຍທີ່ພາກັນຖືສາສະໜາພຸດກໍຍິ່ງເປັນໂອກາດດີ ເພື່ອພ້ອມກັນເປັນປຶກແຜ່ນໃນການປະຕິບັດຕົນເພື່ອຫາວິທີລະຫ່າງຈາກການຕິດເຊື້ອພະຍາດໂຄວິດ-19 ໄດ້ເປັນຢ່າງດີ. ສຳລັບແບບແຜນ, ຮູບການ ແລະ ວິທີການລະຫ່າງຈາກໂຄວິດ-19 ມັນກໍເປັນເລື່ອງທີ່ພວກເຮົາປະຕິບັດໄດ້ແບບງ່າຍໆຄື: ຫ້າມໄປຊຸມແຊວຢູ່ນອກບ້ານ, ຫ້າມໄປໃນເຂດຊຸມຊົນແອອັດທີ່ມີຄວາມສ່ຽງ ຖ້າມີຄວາມຈຳເປັນແທ້ໆ ໄປໃສມາໃສໃຫ້ໃຊ້ຄວາມຫ່າງ, ໃຊ້ຜ້າອັດປາກປິດດັງ, ຮັກສາຄວາມຫ່າງ, ພະຍາຍາມຮັກສາສຸຂະພາບ ດ້ວຍການອອກກຳລັງກາຍທີ່ບໍ່ພົວພັນໃກ້ຊິດກັນ. ແຕ່ອັນສຳຄັນທີ່ສຸດ ຕ້ອງພາກັນໄປສັກຢາໃຫ້ຄົບຕາມຫລັກການແພດ.

ໃນສັງຄົມຍຸກປັດຈຸບັນ ກໍຄືໃນອະນາຄົດຕໍ່ໜ້ານີ້ ຖ້າຜູ້ໃດບໍ່ໄດ້ສັກຢາວັກຊີນຄົບຖ້ວນຕາມເຂັມ ສະແດງວ່າຜູ້ນັ້ນບໍ່ທັນເຂົ້າໃຈໃນການດຳລົງຊີວິດແບບໃໝ່ ( Newnormal). ໃນຫລັກການ ແລະ ຄວາມຈຳເປັນໃນການສັກວັກຊີນນັ້ນ ກ່ອນອື່ນໝົດແມ່ນເພື່ອຮັກສາຊີວິດອິນຊີຂອງເຮົາເອງ ແລະ ຜູ້ອື່ນ. ກົງກັນຂ້າມ ຖ້າຜູ້ໃດບໍ່ໄດ້ສັກຢາວັກຊີນໂຄສິດ-19 ຄົບຖ້ວນ ຜູ້ນັ້ນຈະບໍ່ໄດ້ພິຈາລະນາການໄປມາ, ຮ່ວມກິນຮ່ວມຢູ່ ຕະຫລອດເຖິງການປະຕິບັດໜ້າທີ່ວຽກງານກໍຈະຢູ່ໃນວົງຈຳກັດ.

ສະຫລຸບແລ້ວ ບັດຂຽວທີ່ຢັ້ງຢືນວ່າໄດ້ສັກຢາຈະກາຍເປັນໃບເບີກທາງອັນວິເສດທີ່ຈະເຮັດໃຫ້ຕົນເອງຢູ່ໄດ້ຢ່າງສະດວກສະບາຍໃນສັງຄົມຍຸກໃໝ່.

ເພາະສະນັ້ນ ໃນໂອກາດເຂົ້າພັນສາປີນີ້ ຂໍໃຫ້ທຸກຄົນທີ່ເປັນຊາວພຸດຈົ່ງເປັນຕົ້ນແບບໃນການດຳລົງຊີວິດໃນຍຸກໂຄວິດ-19 ເພາະໃນສະພາບປັດຈຸບັນ ກໍຄືອະນາຄົດ ເຮົາກໍຍັງບໍ່ທັນຮູ້ວ່າພະຍາດນີ້ມັນຈະຈິບຫາຍ ຫລື ຂະຫຍາຍພັນທຸກຳເປັນສາຍພັນອື່ນໆອີກ ດັ່ງພວກເຮົາເຫັນທຸກວັນນີ້.