ແມ່ຍິງລາວພວມກ້າວໄປບົນເສັ້ນທາງການສ້າງສາພັດທະນາປະເທດຊາດ
ໂດຍ: ທິດກໍ່າ
ມາຮອດຍຸກປັດຈຸບັນ ຕ້ອງຍອມຮັບວ່າແມ່ຍິງລາວເຮົາພວມກ້າວເດີນໄປບົນເສັ້ນທາງແຫ່ງການສ້າງສາພັດທະນາປະເທດຊາດໃນຍຸກໃໝ່ທັນສະໄໝຢ່າງເຕັມຕົວ ແລະ ເອກອ້າງທະນົງໃຈທີ່ສຸດໃນກຽດສັກສີຂອງການເປັນແມ່ຍິງລາວ. ອັນສາເຫດກໍຍ້ອນວ່າ ພັກ ແລະ ລັດຖະບານເຮົາຍາມໃດກໍໄດ້ເອົາໃຈໃສ່ຍົກສູງຖານະບົດບາດ ທັງໃຫ້ສິດແກ່ແມ່ຍິງລາວຕະຫລອດມາ. ສິ່ງທີ່ສະແດງໃຫ້ເຫັນຢ່າງຈະແຈ້ງນັ້ນກໍຄື ພັກເຮົາໄດ້ຈັດຕັ້ງນຳພາສຶກສາອົບຮົມແມ່ຍິງລາວ ກໍຄືອົງການຈັດຕັ້ງແມ່ຍິງລາວໃຫ້ມີການເຄື່ອນໄຫວຕາມພາລະບົດບາດ ແລະ ໜ້າທີ່ຂອງຕົນຢ່າງຈິງຈັງ ແລະ ຕັ້ງໜ້າ.
ຜ່ານຂະບວນວິວັດດັ່ງກ່າວ ຈຶ່ງເຮັດໃຫ້ອົງການຈັດຕັ້ງສະຫະພັນແມ່ຍິງລາວເຂັ້ມແຂງຂຶ້ນໃນແຕ່ລະໄລຍະ. ມາຮອດປັດຈຸບັນເຮົາຈຶ່ງເຫັນໄດ້ວ່າ ແມ່ຍິງລາວໄດ້ເປັນກຳລັງແຮງອັນມະຫາສານເຂົ້າໃນພາລະກິດສ້າງສາພັດທະນາປະເທດຊາດ. ທຸກຂົງເຂດວຽກງານ ບໍ່ວ່າໃນດ້ານເສດຖະກິດ-ສັງຄົມ, ວັດທະນະທຳ, ວຽກງານປ້ອງກັນຊາດ-ປ້ອງກັນຄວາມສະຫງົບ ລ້ວນແລ້ວແຕ່ມີແມ່ຍິງເປັນກຳລັງແຮງຜັກດັນໃຫ້ພາລະກິດວຽກງານຂອງຊາດສຳເລັດຜົນຕາມເປົ້າໝາຍ.
ຈາກຜົນສຳເລັດດັ່ງກ່າວ ຈຶ່ງເຮັດໃຫ້ຖານະບົດບາດຂອງແມ່ຍິງລາວກ້າວຂຶ້ນຢ່າງບໍ່ຢຸດຢັ້ງ. ຈາກພຶດຕິກຳຕົວຈິງ ມາຮອດປັດຈຸບັນແມ່ຍິງລາວໄດ້ມີຖານະຕຳແໜ່ງໃນອົງຄະນະພັກ ແລະ ລັດຖະບານ ນັບແຕ່ຂັ້ນສູນກາງລົງຮອດທ້ອງຖິ່ນ ເປັນກົມການເມືອງ, ເປັນລັດຖະມົນຕີ, ເປັນເຈົ້າແຂວງ, ເຈົ້າເມືອງ, ເປັນຫົວໜ້າກົມ, ຮອງກົມ, ເປັນນັກທຸລະກິດ, ນັກວິຊາການ ແລະ ເປັນພະນັກງານທີ່ດີຂອງພັກ, ຂອງລັດ ແລະ ຂອງຊາດ. ສ່ວນໃນຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ ແມ່ຍິງລາວເຮົາກໍໄດ້ມີຖານະຕຳແໜ່ງເປັນນາຍຮ້ອຍ, ນາຍພັນ, ເປັນນັກຮົບ, ເປັນຜູ້ບັງຄັບບັນຊາທີ່ເຂັ້ມແຂງໄວ້ໃຈໃນກົມກອງຂອງຕົນເປັນຢ່າງດີ.
ສິ່ງທີ່ໜ້າຍົກຍ້ອງຊົມເຊີຍອີກອັນໜຶ່ງນັ້ນ ແມ່ຍິງລາວເຮົາບໍ່ວ່າໃນຍຸກໃດສະໄໝໃດກໍຍັງຮັກສາຮີດຄອງປະເພນີວັດທະນະທຳທີ່ເປັນເອກະລັກສະເພາະຂອງຕົນໄດ້ເປັນຢ່າງດີເຊັ່ນ: ການນຸ່ງຖືສິ້ນໄໝເສື້ອໄໝ, ມີຜ້າບ່ຽງໃນຍາມມີບຸນມີງານ ຫລື ຍາມວຽກຍາມງານ ອັນເປັນມູນເຊື້ອສິລະປະວັດທະນະທຳຂອງຊາດ ແລະ ຂອງແມ່ຍິງລາວຕັ້ງແຕ່ໃດມາ. ສິ່ງທີ່ທິດກໍ່າຍົກມານີ້ ພຽງເປັນສ່ວນໜຶ່ງໃນພາລະກິດຂອງແມ່ຍິງລາວທີ່ໄດ້ປະກອບສ່ວນອຸທິດເຫື່ອແຮງສ້າງສາພັດທະນາປະເທດຊາດໃນໄລຍະຜ່ານມາ ກໍຄືຍຸກປັດຈຸບັນ ແລະ ຍັງມີອີກຫລາຍຢ່າງທີ່ແມ່ຍິງລາວເຮັດໄດ້ ແລະ ໃນບາງກໍລະນີ ແມ່ຍິງລາວສາມາດເຮັດໄດ້ເໜືອກວ່າເພດຊາຍອີກຊ້ຳ.
ແຕ່ເຖິງຢ່າງໃດກໍດີ, ອີງໃສ່ພາລະກິດຂອງຊາດໃນໄລຍະໃໝ່ ແລະ ຍາວນານ ແມ່ຍິງລາວຕ້ອງກ້າວເດີນໄປຕາມເສັ້ນທາງສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງຕະຫລອດໄປ.
