ນ້ຳຖ້ວມໜັກຢູ່ແຂວງເຫີໜານ ຂອງຈີນ ມີຜູ້ເສຍຊີວິດແລ້ວ 12 ຄົນ ແລະ ເລັ່ງອົບພະຍົບປະຊາຊົນຫລາຍກວ່າແສນຄົນ
July 21, 2021 - 12:43 PM
ສຳນັກຂ່າວ ຊິນຫົວ ລາຍງານໃນວັນທີ 21 ກໍລະກົດ 2021 ນີ້ວ່າ: ສະຖານະການຝົນຕົກໜັກແຕ່ວັນທີ 16 ກໍລະກົດ ເປັນຕົ້ນມາສົ່ງຜົນໃຫ້ແຂວງເຫີໜານ ຕອນກາງຂອງປະເທດຈີນ ເກີດມີນໍ້າຖ້ວມ ມີລາຍງານຜູ້ເສຍຊີວິດແລ້ວ 12 ຄົນ ສົ່ງຜົນກະທົບຕໍ່ປະຊາຊົນຫລາຍກວ່າ 144.660 ຄົນ
ທາງການແຂວງໄດ້ອອກປະກາດຍົກລະດັບສະຖານະການໄພພິບັດສຸກເສີນເປັນລະດັບ 1 ພ້ອມກັບອອກປະກາດເຕືອນໄພຝົນທີ່ຈະຕົກລົງມາຢ່າງໜັກໃນແຂວງຕະຫລອດວັນທີ 21 ກໍລະກົດນີ້.
ນອກນີ້, ສຳນັກງານຂອງໜ່ວຍງານຄວບຄຸມນ້ຳໃນເມືອງເຈິ້ງໂຈ ຍັງໄດ້ລະບຸວ່າ ພາຍຫລັງ ມີຝົນຕົກລົງມາຢ່າງໜັກຕໍ່ເນື່ອງນັບແຕ່ 19-20 ກໍລະກົດ 2021 ເຮັດໃຫ້ນ້ຳໃນອ່າງເກັບນ້ຳຂຶ້ນສູງຫລາຍກວ່າລະດັບເຕືອນໄພ ພວມຢູ່ໃນພາວະສ່ຽງສູງ ອາດເຮັດໃຫ້ອ້າງຈະພັງຖະຫລົ່ມລົງມາ ດັ່ງນັ້ນ, ອຳນາດການປົກຄອງງຂັ້ນທ້ອງຖິ່ນຈຶ່ງໄດ້ປະກາດອົບພະຍົບປະຊາຊົນ 100.000 ຄົນອອກຈາກພື້ນທີ່ສ່ຽງໄປຍັງພື້ນທີ່ປອດໄພ.
