ທ່ານ ນາຍົກລັດຖະມົນຕີ ພັນຄຳ ວິພາວັນ ຖະແຫລງການກ່ຽວກັບການສືບຕໍ່ປະຕິບັດມາດຕະການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ

July 20, 2021 - 2:59 PM

ທ່ານ ນາຍົກລັດຖະມົນຕີ ພັນຄຳ ວິພາວັນ ຖະແຫລງການກ່ຽວກັບການສືບຕໍ່ປະຕິບັດມາດຕະການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ - kitchen vibe - ທ່ານ ນາຍົກລັດຖະມົນຕີ ພັນຄຳ ວິພາວັນ ຖະແຫລງການກ່ຽວກັບການສືບຕໍ່ປະຕິບັດມາດຕະການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ

ພະນັກງານ, ນັກຮົບ, ປະຊາຊົນລາວບັນດາເຜົ່າ, ທຸກຊັ້ນຄົນ ຕະຫຼອດຮອດຊາວຕ່າງປະເທດ ທີ່ພວມປະຕິບັດໜ້າທີ່ ຢູ່ ສປປ ລາວ ທີ່ນັບຖື ແລະ ຮັກແພງ ທັງຫຼາຍ !
ມື້ວານນີ້ ວັນທີ 19 ກໍລະກົດ 2021 ຄະນະສະເພາະກິດສະກັດກັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19 ໄດ້ມີຖະແຫຼງຂ່າວກ່ຽວກັບສະພາບການໃນປະຈຸບັນ ແລະ ບັນດາມາດຕະການ ທີ່ຈະສືບຕໍ່ປະຕິບັດໃນຕໍ່ໍໜ້າ, ມື້ນີ້ຂ້າພະເຈົ້າ ຖານະນາຍົກລັດຖະມົນຕີ ຂໍມີຄວາມເຫັນຕື່ມອີກດັ່ງນີ້:

ດັ່ງທີ່ພວກເຮົາໝົດທຸກຄົນ ໄດ້ຮັບຊາບແລ້ວວ່າ ພະຍາດໂຄວິດ-19 ໃນທົ່ວໂລກ ລວມທັງຢູ່ບາງປະເທດເພື່ອບ້ານໃກ້ຄຽງປະເທດພວກເຮົາ ແມ່ນສືບຕໍ່ແຜ່ລະບາດຢູ່ຊຸມຊົນ ຢ່າງກວ້າງຂວາງ, ຈຳນວນຜູ້ຕິດເຊື້ອ ແລະ ຜູ້ເສຍຊີວິດ ກໍຍັງສືບຕໍ່ເພີ່ມຂຶ້ນໃນແຕ່ລະວັນ, ພ້ອມທັງພົບຫຼາຍສາຍພັນໃໝ່ ທີ່ສາມາດແຜ່ເຊື້ອໄດ້ງ່າຍ, ໄວວາ ແລະ ມີຄວາມຮຸນແຮງກວ່າເກົ່າ.

ທ່ານ ນາຍົກລັດຖະມົນຕີ ພັນຄຳ ວິພາວັນ ຖະແຫລງການກ່ຽວກັບການສືບຕໍ່ປະຕິບັດມາດຕະການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ - Visit Laos Visit SALANA BOUTIQUE HOTEL - ທ່ານ ນາຍົກລັດຖະມົນຕີ ພັນຄຳ ວິພາວັນ ຖະແຫລງການກ່ຽວກັບການສືບຕໍ່ປະຕິບັດມາດຕະການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ

– ສຳລັບຢູ່ປະເທດເຮົາ ນັບແຕ່ມີການລະບາດຂອງພະຍາດໂຄວິດ-19 ໃນຕົ້ນປີ 2020, ລັດຖະບານຊຸດທີ VIII ກໍໄດ້ມີຄວາມພະຍາຍາມ ໃນການແກ້ໄຂ ໂດຍໄດ້ວາງ ແລະ ຊີ້ນໍາການປະຕິບັດບັນດາມາດຕະການໃນແຕ່ລະໄລຍະໃຫ້ສອດຄ່ອງ ເຮັດໃຫ້ບໍ່ມີຜູ້ຕິດເຊື້ອໃນຊຸມຊົນ ເປັນເວລາ 8 ເດືອນ ຈົນມາຮອດກາງເດືອນເມສາ 2021 ໄດ້ມີການລະບາດໃນຊຸມຊົນຄັ້ງໃໝ່ທີ່ຮ້າຍແຮງຂຶ້ນ, ລັດຖະບານ ກໍຄື ຄະນະສະເພາະກິດ ແລະ ອົງການປົກຄອງທ້ອງຖິ່ນ ໄດ້ສືບຕໍ່ປະຕິບັດບັນດາມາດຕະການໃນໄລຍະຮອບ I ຜ່ານມາ ແລະ ໄດ້ສົມທົບກັບການວາງມາດຕະການໃໝ່ເພີ່ມເຕີມ, ສຸມໃສ່ຊີ້ນຳການຈັດຕັ້ງປະຕິບັດຕົວຈິງ ຢ່າງໃກ້ຊິດ, ທັງມີການປະເມີນສະພາບການ ແລະ ດັດປັບມາດຕະການຕ່າງໆ ໃຫ້ແທດເໝາະກັບສະພາບຕົວຈິງ ຊຶ່ງໄດ້ສຸມໃສ່ປະຕິບັດມາດຕະການສາມຢ່າງໄປຄຽງຄູ່ກັນ (ມາດຕະການດ້ານການແພດ, ມາດຕະການດ້ານການບໍລິຫານ ແລະ ມາດຕະການດ້ານເສດຖະກິດ):

 ມາດຕະການດ້ານການແພດ: ໄດ້ຂະຫຍາຍການເກັບຕົວຢ່າງກວດຫາເຊື້ອ ແລະ ຄົ້ນຫາກໍລະນີຜູ້ຕິດເຊື້ອໃນທ່າບຸກ, ຈັດຕັ້ງທີມງານໂຕ້ຕອບທົ່ວປະເທດ ມີທັງທີມເກັບຕົວຢ່າງຄົງທີ່ ແລະ ເຄື່ອນທີ່, ປັບປຸງ ແລະ ຂະຫຍາຍສູນກັກກັນ ແລະ ໂຮງໝໍພາກສະໜາມ, ສຸມໃສ່ປິ່ນປົວຜູ້ຕິດເຊື້ອ, ຕິດຕາມ ແລະ ປະເມີນອາການຄົນເຈັບຢ່າງໃກ້ຊິດ ແລະ ຕໍ່ເນື່ອງ; ໄດ້ເລັ່ງການຈັດຫາຢາວັກຊີນ ແລະ ຈັດຕັ້ງສີດຢາວັກຊີນດັ່ງກ່າວ ໃຫ້ປະຊາຊົນເຮົາໃນກຸ່ມເປົ້າໝາຍໄດ້ດີສົມຄວນ ປະຈຸບັນໄດ້ສີດສອງເຂັມແລ້ວ 743.949 ຄົນ (ກວມ 10,14%) ແລະ ສີດເຂັມໜຶ່ງແລ້ວ 1.056.672 ຄົນ (ກວມ 14,4%) ຕົວເລກວັນທີ 19 ກໍລະກົດ 2021.

 ມາດຕະການດ້ານການບໍລິຫານ: ໄດ້ປະຕິບັດມາດຕະການປິດການເຂົ້າ-ອອກ ສໍາລັບແຂວງທີ່ມີການລະບາດໃນຊຸມຊົນ; ໄດ້ປິດການເຂົ້າ-ອອກ ໃນໝູ່ບ້ານເຂດແດງ ແລະ ເຝົ້າລະວັງເຂດໃກ້ຄຽງ ຢ່າງໃກ້ຊິດ, ປິດສະຖານບັນເທີງ, ຮ້ານກິນດື່ມ, ຮ້ານຄາລາໂຄເກະ, ຮ້ານນວດ-ສະປາ ເຊິ່ງເປັນສະຖານທີ່ສ່ຽງຕໍ່ການຕິດເຊື້ອ, ຈັດຕັ້ງກຳລັງລາດຕະເວນຕາມຊາຍແດນ, ໂຄສະນາເຜີຍແຜ່ມາດຕະການຕ່າງໆ ທີ່ລັດຖະບານ ກໍຄື ຄະນະສະເພາະກິດວາງອອກ, ເອົາໃຈໃສ່ສະໜອງຂໍ້ມູນທາງດ້ານການແພດ, ຊີ້ແຈງບັນຫາ ແລະ ແຈ້ງນະໂຍບາຍຕ່າງໆ ໃຫ້ສັງຄົມຮັບຊາບ ຢ່າງເປັນປົກກະຕິ.
 ມາດຕະການດ້ານເສດຖະກິດ: ໄດ້ປະຕິບັດນະໂຍບາຍຍົກເວັ້ນການເກັບອາກອນລາຍໄດ້ສຳລັບຜູ້ທີ່ມີລາຍໄດ້ໜ້ອຍ, ເລື່ອນການຊໍາລະຕົ້ນທຶນ ແລະ ດອກເບ້ຍທະນາຄານ ພ້ອມທັງປ່ອຍເງິນກູ້ບ້ວງໃໝ່ເພີ່ມ, ເລື່ອນການຊໍາລະອາກອນລາຍໄດ້, ອາກອນກຳໄລ ໃຫ້ຜູ້ປະກອບການ, ຍົກເວັ້ນພາສີ-ອາກອນໃນການນໍາເຂົ້າອຸປະກອນການແພດ, ຫຼຸດຄ່າໄຟຟ້າ, ນໍ້າປະປາ ແລະ ອື່ນໆ.

– ການປະຕິບັດບັນດາມາດຕະການທີ່ກ່າວມາຂ້າງເທິງນັ້ນ ແມ່ນໄດ້ຮັບການສະໜັບສະໜູນ ແລະ ເຂົ້າຮ່ວມຢ່າງຕັ້ງໜ້າຂອງປະຊາຊົນລາວທຸກຊັ້ນຄົນ ກໍ່ຄືຊາວຕ່າງປະເທດທີ່ດຳລົງຊີວິດຢູ່ລາວ. ພ້ອມກັນນັ້ນ ລັດຖະບານ ແລະ ອົງການປົກຄອງທ້ອງຖິ່ນ ແຕ່ລະຂັ້ນ ຍັງໄດ້ຮັບການປະກອບສ່ວນຊ່ວຍເຫຼືອ ທັງທາງກົງ ແລະ ທາງອ້ອມ ຈາກປະຊາຊົນ ຄິດເປັນມູນຄ່າເປັນຈຳນວນຫຼວງຫຼາຍ. ອັນພິເສດ ແມ່ນປະເທດເພື່ອນມິດຂອງພວກເຮົາ ນັບທັງຜູ້ຢູ່ໃກ້ ແລະ ໄກ ແມ່ນໄດ້ສົ່ງການຊ່ວຍເຫຼືອໃຫ້ແກ່ ສປປ ລາວ ຢ່າງທັນການ ເຊັ່ນ: ທີມງານຊ່ຽວຊານແພດໝໍ, ອຸປະກອນການແພດ ແລະ ການຊາວຍເຫຼືອດ້ານຢາວັກຊີນ ໃຫ້ແກ່ ສປປ ລາວ.

– ສຳຄັນອີກອັນໜຶ່ງ, ຢູ່ຂັ້ນຊຸມຊົນ ພໍ່ແມ່ພີ່ນ້ອງປະຊາຊົນຫຼາຍຄົນ ໄດ້ມີຈິດໃຈເອື້ອເຟື້ອເຜື່ອແຜ່ ຊ່ວຍເຫຼືອຊຶ່ງກັນ ແລະ ກັນ ເພື່ອຜ່ອນເບົາບັນເທົາຄວາມຫຍຸ້ງຍາກ ເຊັ່ນ: ຊ່ວຍເຫຼືອເບິ່ງແຍງກັນໃນຍາມຫຍຸ້ງຍາກ, ແຈກຢາຍອາຫານນໍ້າດື່ມ, ເຈົ້າໜີ້ໄດ້ຢືດເວລາການຊຳລະໜີ້, ຄ່າເຊົ່າຕ່າງໆ ໃຫ້ແກ່ກັນ ແລະ ອື່ນໆ. ທັງໝົດນັ້ນ ສະແດງໃຫ້ເຫັນເຖິງຄວາມໂອບເອື້ອອາລີສາມັກຄີຮັກແພງ ທັງເປັນນໍ້າໜຶ່ງໃຈດຽວກັນຂອງທົ່ວປວງຊົນລາວທັງຊາດ ໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ທັງເປັນການຢັ້ງຢືນໃຫ້ເຫັນເຖິງ ມູນເຊື້ອດີງາມຂອງປະຊາຊົນລາວບັນດາເຜົ່າ ແລະ ຊັ້ນຄົນຕ່າງໆ ພາຍໃນຊາດລາວເຮົາ.
ຈາກຄວາມພະຍາຍາມໃນການກຳນົດ ແລະ ປະຕິບັດມາດຕະການຕ່າງໆທີ່ສອດຄ່ອງ, ການຮ່ວມມືຈາກທຸກພາກສ່ວນໃນສັງຄົມ ແລະ ການຊ່ວຍເຫຼືອຂອງປະເທດເພື່ອນມິດ ພວກເຮົາສາມາດຈຳກັດໄດ້ ການຕິດເຊື້ອພາຍໃນຊຸມຊົນ ມີທ່າອ່ຽງຫຼຸດລົງ ແລະ ຄວບຄຸມການລະບາດບໍ່ໃຫ້ຂະຫຍາຍເປັນວົງກວ້າງ. ຕົວຢ່າງ: ຢູ່ນະຄອນຫຼວງວຽງຈັນ ໃນໄລຍະຕົ້ນໆ ແມ່ນລະບາດຢ່າງຮ້າຍແຮງ, ມາຮອດປັດຈຸບັນນີ້ ພວກເຮົາສາມາດຄວບຄຸມໄດ້ ອາທິດກວ່າແລ້ວນະຄອນຫຼວງ ບໍ່ມີຜູ້ຕິດເຊື້ອຊຸມຊົນ, ຍົກເວັ້ນໃນວັນທີ 15 ກໍລະກົດ 2021 ມີພຽງ 1 ກໍລະນີ ທີ່ຕິດເຊື້ອຢູ່ພາຍໃນ ເປັນການຕິດເຊື້ອຂອງແພດຈາກການປິ່ນປົວໃກ້ຊິດກັບຜູ້ຕິດເຊື້ອ.

ສະຫຼຸບລວມແລ້ວ ສາມາດຕີລາຄາໄດ້ວ່າ ບັນດາມາດຕະການທີ່ວາງອອກ ໃນຜ່ານມາ ແມ່ນຖືກຕ້ອງ, ທັນການ ແລະ ໄດ້ຮັບການສະໜັບສະໜູນຮ່ວມໄມ້ຮ່ວມມືຈາກປະຊາຊົນເຮົາ ແລະ ປະເທດເພື່ອນມິດ ທີ່ຢູ່ໃກ້ ແລະ ໄກ ຈຶ່ງສາມາດຄວບຄຸມການແຜ່ລະບາດໄດ້ໃນລະດັບດີ ແລະ ເຮັດໃຫ້ປະຊາຊົນ ສາມາດກັບຄືນມາໃຊ້ຊີວິດປົກກະຕິໄດ້ຫຼາຍຂຶ້ນ. ໃນນາມລັດຖະບານແຫ່ງ ສປປ ລາວ ຂ້າພະເຈົ້າສະແດງຄວາມຊົມເຊີຍ, ຂອບໃຈ ແລະ ຮູ້ບຸນຄຸນ ຕໍ່ການສະໜັບສະໜູນຊ່ວຍເຫຼືອດັ່ງກ່າວ ແລະ ຫວັງວ່າຈະໄດ້ຮັບການຊ່ວຍເຫຼືອໃນຂັ້ນຕໍ່ໄປ.
ເຖິງຢ່າງໃດກໍຕາມ ເມື່ອມາຕີລາຄາຢ່າງເລິກເຊິ່ງແລ້ວ ກໍເຫັນວ່າ ຍັງມີຂໍ້ຄົງຄ້າງ ແລະ ສິ່ງທ້າທາຍຈຳນວນໜຶ່ງ ທີ່ຈະຕ້ອງໄດ້ສືບຕໍ່ເອົາໃຈໃສ່ແກ້ໄຂ ເປັນຕົ້ນ:
1) ສະຕິຕື່ນຕົວຮັບຜິດຊອບຂອງຄົນຈຳນວນໜຶ່ງ ບໍ່ທັນດີ, ຍັງມີປະກົດການລ່ວງລະເມີດລະບຽບການທີ່ວາງອອກ ເຊັ່ນ ມີການພົບປະກິນດື່ມຊຸມແຊວກັນ, ການເຄື່ອນໄຫວໄປມາ ທີ່ບໍ່ມີການປະຕິບັດມາດຕະການປ້ອງກັນ, ບໍ່ຈິງໃຈລາຍງານສະພາບຄວາມສ່ຽງຂອງການຕິດເຊື້ອຂອງຕົນເອງ ຕໍ່ເຈົ້າໜ້າທີ່ ແລະ ແພດໝໍ, ອັນເປັນເຫດເຮັດໃຫ້ໃນບາງໄລຍະ ມີການແຜ່ລະບາດ ຂອງພະຍາດໂຄວິດ-19 ຢູ່ຊຸມຊົນ ຫຼາຍບໍລິເວນ.

2) ສູນກັກກັນ ບາງທ້ອງຖິ່ນ ບໍ່ພຽງພໍ ແລະ ມີຂໍ້ຈຳກັດການອຳນວຍຄວາມສະດວກ; ແຮງງານລາວທີ່ເດີນທາງກັບຄືນປະເທດ ຈາກປະເທດເພື່ອນບ້ານໃກ້ຄຽງ ມີຈຳນວນຫຼວງຫຼາຍ ໃນນັ້ນມີຈຳນວນໜຶ່ງລັກລອບເຂົ້າມາແບບຜິດກົດໝາຍ ຊຶ່ງເຮັດໃຫ້ມີຄວາມສ່ຽງສູງ ທີ່ຈະນຳເອົາເຊື້ອພະຍາດ ເຂົ້າມາຕິດຕໍ່ໃສ່ຄອບຄົວ ແລະ ຊຸມຊົນ; ຜູ້ຢູ່ສູນກັກກັນ ຈຳນວນໜຶ່ງ ຍັງພະຍາຍາມລັກໜີອອກຈາກສູນ ກ່ອນຄົບກຳນົດ ຊຶ່ງມີຄວາມສ່ຽງໃນການເກີດການລະບາດໃນຊຸມຊົນ.

3) ເນື່ອງຈາກແຮງງານລາວ ກັບຄືນປະເທດເປັນຈຳນວນຫຼວງຫຼາຍ ຄືໄດ້ເວົ້າມານັ້ນ ຈິ່ງເຮັດໃຫ້ການຕິດເຊື້ອຈາກການນຳເຂົ້າເພີ່ມຂື້ນໄວ ສະຖານທີ່ຮອງຮັບການປິ່ນປົວ ແລະ ຈຳນວນແພດໝໍມີຈຳກັດ ຊຶ່ງຈະເປັນບັນຫາຫຍຸ້ງຍາກຂື້ນຕື່ມ ເຊັ່ນ: ແຂວງຈຳປາສັກ, ສະຫວັນນະເຂດ, ຄຳມ່ວນ, ສາລະວັນ, ນະຄອນຫຼວງວຽງຈັນ, ບໍ່ແກ້ວ ແລະ ແຂວງອື່ນໆ ຫຼາຍກວ່າໝູ່ແມ່ນແຂວງຈຳປາສັກ ແລະ ແຂວງສະຫວັນນະເຂດ ສະເພາະ ແຂວງຈຳປາສັກຢູ່ສູນກັກກັນມີ 1.220 ຄົນ ແລະ ຜູ້ຕິດເຊື້ອທີ່ກຳລັງປິ່ນປົວຢູ່ 632 ກໍລະນີ; ແຂວງສະຫວັນນະເຂດ ຢູ່ສູນກັກກັນມີ 1.674 ຄົນ ແລະ ຜູ້ຕິດເຊື້ອທີ່ກຳລັງປິ່ນປົວຢູ່ 526 ກໍລະນີ, ໃນໄລຍະເວລາຫຼັງໆມານີ້ ພວກເຮົາຍັງກວດພົບຜູ້ຕິດເຊື້ອສາຍພັນໃໝ່ ສາຍພັນອານຟາ ແລະ ເດວຕາ ຈາກການນຳເຂົ້າ ຊຶ່ງເປັນສາຍພັນທີ່ແຜ່ເຊື້ອໄວກວ່າແຕ່ກ່ອນ.
ພໍ່ແມ່ ພີ່ນ້ອງ ທີ່ຮັກແພງທັງຫຼາຍ,

ດັ່ງທີ່ໄດ້ກ່າວມາແລ້ວນັ້ນ ໃນເວລານີ້, ບັນດາປະເທດໃນໂລກ ລວມທັງ ປະເທດໃກ້ຄຽງ ກໍຄື ປະເທດພວກເຮົາ ແມ່ນຍັງຢູ່ໃນສະພາບການທີ່ມີຄວາມທ້າທາຍ ແລະ ຫຼໍ່ແຫຼມຫຼາຍດ້ານ ທີ່ບໍ່ອາດຈະປະໝາດ, ລະເຫຼີງ ແລະ ເຜີຕົວໄດ້ເປັນອັນຂາດ. ພວກເຮົາ ຕ້ອງພ້ອມກັນເພີ່ມທະວີການປ້ອງກັນ, ຄວບຄຸມ ພະຍາດໂຄວິດ-19 ດ້ວຍທຸກມາດຕະການ ແລະ ທຸກກຳລັງແຮງ ຢ່າງເປັນປະຈຳ ເພື່ອບໍ່ໃຫ້ມີການລະບາດເກີດຂຶ້ນໃນຮອບໃໝ່ຢູ່ປະເທດພວກເຮົາ. ສິ່ງສຳຄັນ, ພວກເຮົາຕ້ອງພ້ອມກັນເພີ່ມທະວີຄວາມຮັບຜິດຊອບ ຕໍ່ປະເທດຊາດ ແລະ ປະຊາຊົນຂອງພວກເຮົາ ດ້ວຍການຍົກສະຕິລະວັງຕົວ ໃຫ້ສູງກວ່າເກົ່າ ແລະ ເອົາໃຈໃສ່ປະຕິບັດບັນດາມາດຕະການທີ່ລັດຖະບານ ກໍຄື ຄະນະສະເພາະກິດວາງອອກ ໃນແຕ່ລະໄລຍະຢ່າງເຂັ້ມງວດ ແນໃສ່ຫຼຸດຜ່ອນຜົນກະທົບດ້ານເສດຖະກິດ-ສັງຄົມ ແລະ ເພື່ອໃຫ້ບັນລຸຄາດໝາຍທີ່ວ່າ ໃຫ້ມີຜູ້ຕິດເຊື້ອໜ້ອຍທີ່ສຸດ, ມີຜູ້ເສຍຊີວິດໜ້ອຍທີ່ສຸດ ແລະ ໃຫ້ສັງຄົມ ໄດ້ຫັນໄປສູ່ການດຳລົງຊີວິດປົກກະຕິ ພາຍໃຕ້ເງື່ອນໄຂວິຖີຊີວິດປົກກະຕິໃໝ່ ໄດ້ໄວ ແລະ ທົ່ວເຖິງ. ນັ້ນແມ່ນຄາດໝາຍໃຫຍ່ຂອງລັດຖະບານ. ສະນັ້ນ, ຖືໂອກາດນີ້ ຕາງໜ້າໃຫ້ແກ່ພັກ-ລັດຖະບານ ຂ້າພະເຈົ້າ ສະເໜີໃຫ້ພວກເຮົາ ໝົດທຸກຄົນ ເອົາໃຈໃສ່ຕື່ມບາງດ້ານ ດັ່ງນີ້:

1. ຮຽກຮ້ອງມາຍັງພະນັກງານ, ປະຊາຊົນລາວບັນດາເຜົ່າທຸກຊັ້ນຄົນ ຕະຫຼອດຮອດຊາວຕ່າງປະເທດ ທີ່ພວມປະຕິບັດໜ້າທີ່ ຢູ່ ສປປ ລາວ ສືບຕໍ່ເພີ່ມທະວີຄວາມເປັນເຈົ້າການໃນການປະຕິບັດ ບັນດານະໂຍບາຍ ແລະ ມາດຕະການ ທີ່ລັດຖະບານ ກໍຄື ຄະນະສະເພາະກິດແຕ່ລະຂັ້ນວາງອອກ ໃນແຕ່ລະໄລຍະ ໃຫ້ເຂັ້ມງວດ ແລະ ໃຫ້ຖືວ່າວຽກງານດັ່ງກ່າວ ແມ່ນໜ້າທີ່ ແລະ ຄວາມຮັບຜິດຊອບຂອງໝົດທຸກຄົນ ຊຶ່ງປະກອບ ດ້ວຍມາດຕະການທາງການແພດ, ດ້ານການບໍລິການ ແລະ ດ້ານເສດຖະກິດ ພະຍາຍາມສູງເຮັດແນວໃດໃຫ້ມີຄວາມດູນດ່ຽງ ຊ່ວຍໜູນກັນລະຫວ່າງ ບັນດາມາດຕະການດັ່ງກ່າວ ແນ່ໃສ່ບັນລຸຕາມຄາດໝາຍລວມ ດັ່ງໄດ້ກ່າວໄປແລ້ວຂ້າງເທິງ. ພ້ອມນີ້, ຮຽກຮ້ອງໃຫ້ ທຸກຄົນໃນສັງຄົມ ຈົ່ງຮັບເອົາຂໍ້ມູນຂ່າວສານຢ່າງມີສະຕິ, ໃຫ້ເອົາໃຈໃສ່ ຕິດຕາມຂ່າວສານ ຈາກທາງການ, ອັນໃດບໍ່ເຂົ້າໃຈ ຫຼືອັນໃດຍັງມີຄວາມລະແວງສົງໄສ ບໍ່ຈະແຈ້ງ ແມ່ນໃຫ້ສອບຖາມໂດຍກົງກັບເຈົ້າໜ້າທີ່ ທີ່ຮັບຜິດຊອບ, ບໍ່ໃຫ້ຫຼົງເຊື່ອນຳຂ່າວລື, ຂ່າວບິດເບືອນ ທີ່ຈະສ້າງຄວາມແຕກຕື່ນວຸ້ນວາຍສັບສົນ ໃນສັງຄົມ ແລະ ເປັນຊ່ອງວ່າງ ສ້າງຄວາມແຕກແຍກຄວາມສາມັກຄີພາຍໃນ.

2. ສືບຕໍ່ຈັດຫາ ຢາວັກຊີນ ແລະ ຈັດຕັ້ງສີດໃຫ້ປະຊາຊົນ ໃຫ້ບັນລຸຕາມແຜນການທີ່ກຳນົດໄວ້ ຄື ຢ່າງໜ້ອຍປີ 2021 ນີ້ ໃຫ້ໄດ້ 50 % ຂອງພົນລະເມືອງທົ່ວປະເທດ. ປະຈຸບັນ ໄດ້ສີດໄປແລ້ວສອງເຂັມມີ 743.949 ຄົນ ແລະ ສີດໄປແລ້ວ ເຂັ້ມທີໜຶ່ງ 1.056.672 ຄົນ, ຖ້າບວກທັງສອງປະເພດນີ້ເຂົ້າກັນ ກໍ່ປະມານ 1.800.621 ຄົນ ແລະ ຍັງສືບຕໍ່ສີດຕໍ່ໄປ, ຖ້າສະເລ່ຍຕົວເລກອັນນີ້ ທັງເຂັມໜຶ່ງ ແລະ ເຂັມສອງ ກໍ່ກວມ 25,7% ຂອງພົນລະເມືອງ. ວັກຊິນ ຍັງຈະສືບຕໍ່ຈັດສົ່ງມາອີກ ເປັນໄລຍະໄລຍະ ໂດຍສະເພາະ ໄລຍະໃກ້ໆນີ້ ມື້ວັນທີ 16 ກໍລະກົດ 2021 ວັກຊິນຈອນສັນແອນຈອນສັນ ໂດຍໄດ້ຮັບການຊ່ວຍເຫຼືອ ຈາກລັດຖະບານສະຫະລັດອາເມລິກາ ກໍ່ໄດ້ມາເຖິງ ສປປ ລາວ ຈຳນວນ 1 ລ້ານໂດສ, ຖ້າພວກເຮົາສີດໝົດ 1 ລ້ານໂດສນີ້ ບວກກັບອັນເກົ່າ ທີ່ສີດຜ່ານມາແລ້ວ ກໍ່ຈະໄດ້ປະມານ 40 ກວ່າເປີເຊັນ ຂອງພົນລະເມືອງ, ຄາດວ່າ ຍັງຈະມີວັກຊິນ ນຳເຂົ້າມາເປັນໄລຍະໄລຍະ ແລະ ພວກເຮົາຈະສາມາດປະຕິບັດໄດ້ຕາມຄາດໝາຍ. ວັກຊີນທີ່ນຳໃຊ້ຢູ່ປະເທດເຮົາ ແມ່ນມີຫຼາຍສະນິດ ເຊັ່ນ: ຊິໂນຟາມ, ສະປຸກນິກ, ແອດສຕຣາຊິເນກາ, ຟາຍເຊີ ແລະ ຈອນສັນແອນຈອນສັນ, ຢືນຢັນອີກວ່າ ທຸກສະນິດລ້ວນແຕ່ດີມີຄຸນນະພາບ, ລັດຖະບານມີນະໂຍບາຍສັກໃຫ້ປະຊາຊົນ ຢ່າງສະເໝີພາບ ຕາມຫຼັກວິຊາການແພດ ຊຶ່ງໄດ້ມີເປົ້າໝາຍຕາມອາຍຸກະສຽນ, ຕາມສະພາບສຸຂະພາບຂອງແຕ່ລະຄົນ ແນ່ໃສ່ຮັບປະກັນຄວາມປອດໄພຂອງປະຊາຊົນ.

ໃນເລື່ອງນີ້ຮຽກຮ້ອງໃຫ້ທຸກຄົນ ຕື່ນຕົວສະໝັກໃຈ ປະຕິບັດຕາມກົດລະບຽບ ແລະ ແຜນການມາດຕະການທາງການແພດ ຫຼີກເວັ້ນການແຍ່ງຊິງກັນ ແລະ ສ້າງຄວາມສັບສົນໃນເວລາແຈກຢາຍ ແລະ ໃນເວລາສີດວັກຊີນ ດັ່ງກ່າວ.

ການສີດວັກຊີນ ແມ່ນການສ້າງພູມຕ້ານທານໃນຮ່າງກາຍ. ຕາມບົດຮຽນຕົວຈິງຂອງບັນດາປະເທດ ບໍ່ໝາຍຄວາມວ່າໄດ້ສີດຢາແລ້ວຈະບໍ່ຕິດເຊື້ອອີກ, ສີດວັກຊີນແລ້ວກໍ່ຕາມ ອາດຈະຕິດເຊື້ອໄດ້ອີກ ແຕ່ອາດຈະບໍ່ມີອາການປ່ວຍຮ້າຍແຮງ, ປົວດີ ໄດ້ໄວ ແລະ ຈຳກັດການເສຍຊີວິດ. ສະນັ້ນ ສີດວັກຊີນແລ້ວ ກໍ່ຍັງຕ້ອງສືບຕໍ່ປະຕິບັດຕາມມາດຕະການ ພື້ນຖານຂອງການປ້ອງກັນ ເຊັ່ນ: ຮັກສາໄລຍະຫ່າງ, ໃສ່ຜ້າອັດປາກ, ລ້າງມືດ້ວຍເຈວມີທາດເຫຼົ້າ ຫຼື ສະບູ ແລະ ປະຕິບັດມາດຕະການອື່ນໆ ທີ່ຄະນະສະເພາະກິດວາງອອກ ຢ່າງເປັນປົກກະຕິ.
3. ສືບຕໍ່ໃຫ້ບັນດາແຂວງ ປັບປຸງ ແລະ ຂະຫຍາຍສູນກັກກັນ ແລະ ໂຮງໝໍພາກສະໜາມ ໃຫ້ສາມາດຮອງຮັບໄດ້ການກັບມາຂອງແຮງງານລາວຈາກຕ່າງປະເທດ, ເພີ່ມທະວີມາດຕະການດ້ານການແພດ ແລະ ການບໍລິຫານຄຸ້ມຄອງຢ່າງເຂັ້ມງວດ ເພື່ອບໍ່ໃຫ້ເຊື້ອພະຍາດເລັດລອດແຜ່ລະບາດອອກສູ່ຊຸມຊົນ. ຂໍຮຽກຮ້ອງເຖິງເຈົ້າໜ້າທີ່ ແລະ ຜູ້ທີ່ເຂົ້າກັກເກັບໂຕໃນສູນ ກໍ່ຄືຜູ້ຕິດເຊື້ອ ທີ່ພວມປິ່ນປົວຢູ່ໂຮງໝໍ ຈົ່ງມີຄວາມຮັບຜິດຊອບຕໍ່ຕົນເອງ ຕໍ່ຄອບຄົວ ແລະ ຕໍ່ສັງຄົມ ບໍ່ຝ່າຝືນລະບຽບການ ແລະ ມາດຕະການຕ່າງໆ ທີ່ໄດ້ກຳນົດໄວ້.

4. ຮຽກຮ້ອງມາຍັງປະຊາຊົນລາວ ກໍ່ຄືຊາວຕ່າງປະເທດ ທີ່ມີຄວາມປະສົງຈະເຂົ້າ-ອອກ ສປປ ລາວ ໃຫ້ປະຕິບັດຖືກຕ້ອງຕາມຂັ້ນຕອນຂອງລະບຽບການ ບໍ່ໃຫ້ລັກລອບເຂົ້າ-ອອກ ຕາມລຳພັງ ຊຶ່ງຈະເປັນການນຳເອົາເຊື້ອພະຍາດໂຄວິດ-19 ເຂົ້າມາແຜ່ລະບາດເປັນວົງກວ້າງຢູ່ ສປປ ລາວ ແລະ ກໍ່ຢູ່ປະເທດເພື່ອນບ້ານເຊັ່ນກັນ ຊຶ່ງຈະເຮັດໃຫ້ຄວບຄຸມໄດ້ຍາກທີ່ສຸດ. ພິເສດ ຕໍ່ກັບແຮງງານລາວ ທີ່ໄປອອກແຮງງານຢູ່ປະເທດໃກ້ຄຽງ ກໍ່ຂໍໃຫ້ປະຕິບັດເຂັ້ມງວດຕາມລະບຽບການຂອງປະເທດເພື່ອນບ້ານທີ່ຕົນເອງອາໃສຢູ່ ໃນຂະນະດຽວກັນ ຖ້າຕ້ອງການກັບຄືນ ສປປ ລາວ ເຊິ່ງເປັນບ້ານເກີດເມືອງນອນຂອງຕົນເອງ ກໍ່ໃຫ້ດຳເນີນຢ່າງຖືກຕ້ອງຕາມຂັ້ນຕອນຂອງກົດໝາຍ ເຖິງແມ່ນວ່າເວລາອອກໄປຕ່າງປະເທດ ຈະລັກລອບອອກໄປກໍ່ຕາມ ແຕ່ເວລາກັບເຂົ້າມາ ຂໍໃຫ້ກັບມາຢ່າງຖືກຕ້ອງ ໂດຍໃຫ້ພົວພັນກັບເຈົ້າໜ້າທີ່ສະຖານທູດ, ກົງສູນລາວ ແລະ ເຈົ້າໜ້າທີ່ກ່ຽວຂ້ອງ ແລ້ວເດີນທາງມາຜ່ານດ່ານຕ່າງໆຢ່າງເປັນທາງການ. ລັດຖະບານ ຖືວ່າການເດີນທາງເຂົ້າມາປະເທດຢ່າງຖືກຕ້ອງນັ້ນ ເປັນການກະທຳທີ່ຮັກຊາດ ຮັກບ້ານເກີດເມືອງນອນຂອງຕົນຢ່າງແທ້ຈິງ ແລະ ກົງກັນຂ້າມ ບຸກຄົນໃດຫາກລັກລອບເຂົ້າມາ ຈະແມ່ນດ້ວຍເສັ້ນທາງໃດກໍ່ຕາມ ຖືວ່າເປັນຜູ້ມີຄວາມຜິດຕາມກົດໝາຍ ແລະ ເປັນຜູ້ນຳເອົາຜົນເສຍຫາຍມາໃຫ້ປະເທດຊາດ ຊຶ່ງຈະຖືກດຳເນີນຄະດີຕາມກົດໝາຍຂອງ ສປປ ລາວ.(ເລື່ອງນີ້ ຂ້າພະເຈົ້າ ຂໍຮຽກຮ້ອງໃຫ້ ພໍ່ແມ່ ພີ່ນ້ອງ ສົ່ງຂ່າວຕໍ່ໃຫ້ລູກຫຼານ ແລະ ໝູ່ຄູ່ຂອງຕົນເອງຊາບ ໃຫ້ຈະແຈ້ງ ແລະ ທົ່ວເຖິງ)

5. ຂໍໃຫ້ປະຊາຊົນລາວທຸກຖ້ວນໜ້າ, ເຈົ້າໜ້າທີ່ທີ່ກ່ຽວຂ້ອງທຸກພາກສ່ວນ ຮັບຮູ້ເຂົ້າໃຈວ່າ ພະຍາດໂຄວິດ-19 ໄດ້ລະບາດຮຸນແຮງໄປຂອບເຂດທົ່ວໂລກ ສ້າງຄວາມເສຍຫາຍຢ່າງໃຫຍ່ຫຼວງໃຫ້ແກ່ຊີວິດ ແລະ ເສດຖະກິດ-ຊີວິດການເປັນຢູ່ຂອງປະຊາຊົນ ຢ່າງມະຫາສານ. ລັດຖະບານ ກໍ່ຄືປະຊາຊົນທຸກໆປະເທດໃນທົ່ວໂລກ ແມ່ນໄດ້ມີຄວາມພະຍາຍາມສະກັດກັ້ນ ແລະ ຕ້ານສຸດຄວາມສາມາດຂອງຕົນ ແຕ່ກໍ່ຍັງບໍ່ທັນສາມາດຈະດັບມອດມັນໄດ້ເທື່ອ ແລະ ມັນກໍ່ອາດຈະຍັງສືບຕໍ່ຢູ່ຄຸກຄາມມວນມະນຸດພວກເຮົາຕໍ່ໄປ. ສຳລັບປະເທດເຮົາ ຂ້າພະເຈົ້າເຂົ້າໃຈດີວ່າ ປະຊາຊົນກໍ່ເຊັ່ນດຽວກັນກັບແພດໝໍ ແລະ ເຈົ້າໜ້າທີ່ກ່ຽວຂ້ອງ ລ້ວນແຕ່ມີຄວາມອິດເມື່ອຍຕໍ່ການເຝົ້າລະວັງ ແລະ ກໍ່ປະຕິບັດໜ້າທີ່ຂອງຕົນ ໂດຍສະເພາະ ແມ່ນແພດໝໍ ແລະ ເຈົ້າໜ້າທີ່ກ່ຽວຂ້ອງ ຊຶ່ງໄດ້ເປັນຜູ້ເຮັດໜ້າທີ່ບໍລິການຮັບໃຊ້ ປະຊາຊົນ ໃນການປ້ອງກັນ ແລະ ປິ່ນປົວ ມາເປັນເວລາ 2 ປີ. ສະນັ້ນ ຂໍຮຽກຮ້ອງໃຫ້ເຫັນອົກເຫັນໃຈຊຶ່ງກັນ ແລະ ກັນ ຂໍໃຫ້ທຸກຄົນຈົ່ງໃຊ້ເຫດຜົນ ໃຊ້ຄວາມອົດທົນ ບໍ່ໃຊ້ອາລົມຕໍ່ກັນ-ປະຊາຊົນກໍ່ຕ້ອງເຫັນໃຈແພດໝໍ ແລະ ເຈົ້າໜ້າທີ່, ເຈົ້າໜ້າທີ່ ກໍ່ຕ້ອງເຂົ້າໃຈ ແລະ ເຫັນໃຈປະຊາຊົນຜູ້ເຈັບປ່ວຍ, ສາມັກຄີຊ່ວຍເຫຼືອກັນ ຮ່ວມແຮງກັນ ພ້ອມກັນຜ່ານຜ່າໄປດ້ວຍກັນ, ຈົ່ງພ້ອມກັນປົກປັກຮັກສາມູນເຊື້ອອັນດີງາມຂອງສັງຄົມລາວເຮົາ ເຊິ່ງເປັນສັງຄົມຂອງການໂອບເອື້ອອາລີ ສາມັກຄີຮັກແພງ.

ພໍ່ແມ່ ພີ່ນ້ອງຮ່ວມຊາດ ທີ່ຮັກແພງທັງຫຼາຍ,
ອີກເທື່ອໜຶ່ງ ຂ້າພະເຈົ້າ ຂໍຢືນຢັນວ່າ: ລັດຖະບານ ຈະສືບຕໍ່ເຝົ້າລະວັງ, ຕິດຕາມ, ປະເມີນສະຖານະການ ທຸກໆໄລຍະ ເພື່ອປັບປຸງ ປ່ຽນແປງມາດຕະການ ຕາມສະພາບຕົວຈິງ ຢ່າງສົມເຫດສົມຜົນ ລວມທັງ ການຈັດຫາ ແລະ ສີດຢາວັກຊິນໃຫ້ແກ່ພໍ່ແມ່ປະຊາຊົນ ໃນກຸ່ມເປົ້າໝາຍຕ່າງໆ ໃຫ້ໄດ້ຕາມຄາດໝາຍ ເພື່ອຜົນປະໂຫຍດສຸກຂອງປະຊາຊົນລາວບັນດາເຜົ່າ.

ສຸດທ້າຍນີ້, ຂ້າພະເຈົ້າ ຂໍຢ້ຳຕື່ມອີກເທື່ອໜຶ່ງວ່າ ບັນດາມາດຕະການ ທີ່ລັດຖະບານ ກໍ່ຄືຄະນະສະເພາະກິດວາງອອກນັ້ນ ຈະມີປະສິດທິພາບ ແລະ ປະສິດທິຜົນໄດ້ ແມ່ນຂຶ້ນກັບການຮ່ວມໄມ້ຮ່ວມມື ແລະ ຄວາມເປັນເຈົ້າການໃນການປະຕິບັດຢ່າງເຂັ້ມງວດ ຂອງທຸກຄົນໃນສັງຄົມ, ລຳພັງແຕ່ລັດຖະບານ ກໍ່ຄືຄະນະສະເພາະກິດ, ແພດໝໍ ແລະ ເຈົ້າ ໜ້າທີ່ກ່ຽວຂ້ອງ ແມ່ນບໍ່ສາມາດປະສົບຜົນສຳເລັດໄດ້. ສະນັ້ນ, ຂ້າພະເຈົ້າ ຈຶ່ງຂໍຮຽກຮ້ອງໃຫ້ພໍ່ແມ່ປະຊາຊົນ ແລະ ທຸກພາກສ່ວນໃນສັງຄົມ ຈົ່ງສືບຕໍ່ຮ່ວມແຮງຮ່ວມໃຈກັນ, ປະກອບສ່ວນເຂົ້າໃນວຽກງານປ້ອງກັນ ແລະ ແກ້ໄຂການລະບາດຂອງພະຍາດໂຄວິດ-19 ເພື່ອແນ່ໃສ່ເຮັດໃຫ້ ປະເທດຊາດ ແລະ ພວກເຮົາທຸກຄົນ ພ້ອມກັນຜ່ານຜ່າວິກິດນີ້ໄປດ້ວຍກັນ ຢ່າງຕະຫຼອດປອດໄພ.
(ຂໍຂອບໃຈ)