ເຕືອນ! ວັນທີ 19-20 ກໍລະກົດນີ້ ພາກເໜືອ ແລະ ພາກໃຕ້ ກຽມຮັບມືນ້ຳຖ້ວມຊຸ
ກົມອຸຕຸນິຍົມ ແລະ ອຸທົກກະສາດ ລາຍງານວ່າ: ເນື່ອງຈາກວ່າຮ່ອງຄວາມກົດດັນອາກາດຕ່ຳຈະຜັດຜ່ານພາກເໜືອຂອງປະເທດລາວ ປ່ອງໃສ່ ພາຍຸໝູນເຂດຮ້ອນ ເຈີມປາກ່າ (Cempaka) ທີ່ກໍາລັງເຄື່ອນທີ່ຢູ່ເຂດທະເລຈີນໃຕ້ຕອນເທິງ. ຊຶ່ງຈະເຮັດໃຫ້ມີຝົນຕົກໜັກຢູ່ແຂວງພາກເໜືອ ແລະ ພາກໃຕ້ ໃນໄລຍະວັນທີ 19-20 ກໍລະກົດ 2021 ນີ້.
ດັ່ງນັ້ນ, ຈຶ່ງແຈ້ງເຕືອນເຖິງອໍານາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ແຂວງ ຜົ້ງສາລີ, ອຸດົມໄຊ, ບໍ່ແກ້ວ (ເມືອງ ຕົ້ນເຜິ້ງ ແລະ ເມືອງ ຫ້ວຍຊາຍ), ຫລວງນ້ຳທາ (ເມືອງ ລອງ ແລະ ເມືອງ ວຽງພູຄາ), ຫລວງພະບາງ, ໄຊຍະບູລີ, ຈໍາປາສັກ (ເມືອງ ປາກຊ່ອງ), ເຊກອງ (ເມືອງ ດາກຈຶງ) ແລະ ອັດຕະປື (ເມືອງ ພູວົງ) ຈົ່ງມີສະຕິລະມັດລະວັງຕໍ່ ສະພາບຝົນຕົກໜັກ ພ້ອມມີລົມພັດແຮງ ທີ່ຈະເຮັດໃຫ້ມີດິນເຈື່ອນ, ນ້ຳຖ້ວມກະທັນຫັນ ແລະ ນ້ຳຖ້ວມຊຸ ເກີດຂຶ້ນໃນໄລຍະ 1-2 ວັນຕໍ່ໜ້ານີ້ ແລະ ຂໍໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.
