ກິນເຂົ້າບໍ່ກົງເວລາຈະສົ່ງກະທົບແນວໃດຕໍ່ສຸຂະພາບ ?

ສຳລັບທ່ານໃດທີ່ກິນເຂົ້າບໍ່ກົງເວລາເປັນປະຈຳ ອາດຈະຄິດວ່າພຽງແຕ່ການກິນເຂົ້າບໍ່ກົງເວລາເທົ່ານັ້ນມັນຈະເປັນຫຍັງ ຫລື ມັນຄົງບໍ່ເປັນຫຍັງດອກ ເຊິ່ງຄວາມຈິງແລ້ວມັນບໍ່ແມ່ນແນວນັ້ນ ການທີ່ທ່ານບໍ່ກິນເຂົ້າ ຫລື ກິນເຂົ້າແລ້ວ, ແຕ່ບໍ່ກົງເວລາ ມັນຈະ ເຮັດໃຫ້ກະເພາະອາຫານຂອງທ່ານເປັນພະຍາດໄດ້ ຫລື ບໍ່ກໍຈະມີອາການເຈັບທ້ອງ – ເຈັບກະເພາະ ເປັນຕົ້ນ.

ອາຫານ ຫລື ເຂົ້າ ເຊິ່ງທ່ານຄວນກິນໃຫ້ກົງເວລາ ເຊິ່ງຖ້າຖາມວ່າເປັນຫຍັງເຮົາຈຶ່ງຕ້ອງກິນໃຫ້ກົງເວລາ ? ຖ້າເຮົາກິນເຂົ້າ ໃຫ້ກົງເວລາ ພະຍາດກະເພາະຈະບໍ່ຖາມຫາແນ່ນອນ ເພາະລະບົບການຍ່ອຍອາຫານ ແລະ ລະບົບຂັບຖ່າຍເປັນປົກກະຕິ, ນອນຫລັບສະບາຍ, ທ້ອງບໍ່ຍື່ງ, ຮ່າງກາຍສາມາດເອົາສານອາຫານໄປໃຊ້ໃຫ້ເກີດປະໂຫຍດໄດ້ກົງຕາມເວລາການເຮັດວຽກໃນ ກົນໄກຂອງຮ່າງກາຍ ແລະ ມີໃບໜ້າທີ່ແຈ່ມໃສ, ສຸຂະພາບແຂງແຮງ.

ຖ້າເຮົາບໍ່ກິນເຂົ້າເຊົ້າໃຫ້ກົງເວລາ ເຮົາອາດຈະເປັນພະຍາດກະເພາະອາຫານໄດ້ ເຊິ່ງເກີດຈາກການອັກເສບ, ບວມ, ແດງຂອງເນື້ອເຍື່ອພາຍໃນກະເພາະອາຫານ, ພະຍາດກະເພາະອາຫານນັ້ນສາມາດພົບໄດ້ໃນທຸກອາຍຸ ຕັ້ງແຕ່ເດັກນ້ອຍຈົນເຖິງ ຜູ້ເຖົ້າ ແລະ ພະຍາດພົບໄດ້ໃກ້ຄຽງກັນທັງຍິງ ແລະ ຊາຍ ເພາະການບໍ່ກິນເຂົ້າ ຫລື ກິນບໍ່ກົງເວລາ ເດັກນ້ອຍຫລາຍຄົນກໍອາດຈະ ເຄີຍເປັນກັນແລ້ວ ຕ້ອງບອກວ່າພະຍາດກະເພາະອາຫານມີກົນໄກການເກີດພະຍາດທີ່ສັບຊ້ອນຫລາຍ ແລະ ເກີດໄດ້ຈາກຫລາຍ ສາເຫດ ແຕ່ລະສາເຫດຈະເຮັດໃຫ້ເກີດອາການທີ່ມີກົດ ແລະ ນ້ຳຍ່ອຍໃນກະເພາະອາຫານຫລາຍເກີນໄປ ຈົນໄປທຳລາຍເນື້ອເຍື່ອ ກະເພາະອາຫານ, ແຕ່ຫລາຍໆຄົນອາດຄິດວ່າພະຍາດນີ້ສາມາດປິ່ນປົວໄດ້ຢູ່ແລ້ວ ມັນກໍແມ່ນຄວາມຈິງທີ່ມັນສາມາດປິ່ນປົວໃຫ້ ເຊົາຂາດໄດ້, ແຕ່ກໍບໍ່ຄວນໃຫ້ກະເພາະອາຫານຂອງທ່ານເປັນບາດແຜ ເພາະມັນຈະເຮັດໃຫ້ທ່ານທໍລະມານໄປອີກດົນ, ກິນເຂົ້າກໍ ກິນລຳບາກ, ຕ້ອງກິນອາຫານແຫລວ ເຊັ່ນ : ເຂົ້າຕົ້ມ ເປັນຫລັກ.

ສະນັ້ນແລ້ວ ທຸກທ່ານຕ້ອງກິນເຂົ້າໃຫ້ກົງເວລາຈະໄດ້ບໍ່ຕ້ອງມາເປັນພະຍາດກະເພາະອາຫານ ແລະ ສິ່ງສຳຄັນ ກິນອາຫານ ໃຫ້ຄົບທັງ 5 ໝວດ ແລະ ຢ່າອົດອາຫານເດັດຂາດ ໂດຍສະເພາະເຂົ້າເຊົ້າ ເຊິ່ງສຳຄັນທີ່ສຸດ ເພາະຈະເຮັດໃຫ້ລະດັບນ້ຳຕານໃນ ເລືອດຕ່ຳ ຈຶ່ງເກີດມີສະພາບສານອາຫານໄປລ້ຽງສະໝອງບໍ່ພຽງພໍ ເຮັດໃຫ້ເກີດສະໝອງເສື່ອມໄດ້ນຳອີກ. ເມື່ອກິນອາຫານໃຫ້ ກົງເວລາແລ້ວ ຄວນກິນອາຫານທີ່ມີປະໂຫຍດນຳ ຖ້າທ່ານກິນແຕ່ອາຫານທີ່ບໍ່ມີປະໂຫຍດ ເຊັ່ນ : ອາຫານຈຳພວກແປ້ງ – ນ້ຳຕານ ເຖິງວ່າມັນຈະສະດວກສະບາຍ ແລະ ໃຊ້ເວລາໜ້ອຍກໍຕາມ, ແຕ່ຖ້າຫາກທ່ານກິນອາຫານເຫລົ່ານີ້ເປັນປະຈຳຍ່ອມເກີດ ຜົນຮ້າຍຕໍ່ຮ່າງກາຍແນ່ນອນ ນອກຈາກຈະເຮັດໃຫ້ຕຸ້ຍແລ້ວ ຍັງເປັນໂຕການກໍ່ພະຍາດອີກຫລາຍຊະນິດ ເຊັ່ນ : ພະຍາດ ເບົາຫວານ, ພະຍາດຫົວໃຈ, ຕຸ້ຍລົງພຸງ ແລະ ພະຍາດຕັບ. ສະນັ້ນ, ຄວນເລືອກກິນອາຫານທີ່ມີປະໂຫຍດຕໍ່ຮ່າງກາຍ, ບໍ່ຄວນກິນ ອາຫານທີ່ບໍ່ມີປະໂຫຍດຕິດຕໍ່ກັນເປັນເວລາດົນ ອາດຈະກິນສະຫລັບກັບລາຍການອາຫານສຸຂະພາບອື່ນໆນຳ ຈະໄດ້ບໍ່ສ່ຽງກັບ ພະຍາດຕ່າງໆໃນອະນາຄົດ ແລະ ການກິນເຂົ້າບໍ່ກົງເວລາລະວັງຈະປ່ວຍເປັນກົດໄຫລຍ້ອນ ເຊິ່ງໃຜທີ່ບໍ່ກິນເຂົ້າ ມັກກິນຕອນແລງ ເທື່ອດຽວ ຈະມີອາການຍື່ງທ້ອງ, ແໜ້ນທ້ອງ ຫລື ຫລັງອາຫານຄາບທຳອິດ ມັກຈະມີອາການປຸ້ນທ້ອງປວດຮາກ ອາການ ເຫລົ່ານີ້ມັກເປັນສັນຍານບອກອາການຂອງພະຍາດກົດໄຫລຍ້ອນ.