ຜູ້ຕິດເຊື້ອໂຄວິດ-19 ຢູ່ແຂວງສະຫວັນນະເຂດ ສ່ວນຫລາຍແມ່ນເພດຍິງກວມເອົາ 60%
ທ່ານ ຕຽງຄຳ ປ້ອງວົງສາ ຮອງຫົວໜ້າພະແນກສາທາລະນະສຸກແຂວງສະຫວັນນະເຂດ ໄດ້ເປີດເຜີຍຕໍ່ຜູ້ສື່ຂ່າວແຂວງສະຫວັນນະເຂດ ໃນວັນທີ 15 ກໍລະກົດ 2021 ວ່າ: ທົ່ວແຂວງ ໄດ້ມີແຮງງານທີ່ກັບມາຈາກຕ່າງປະເທດມີທັງໝົດ 1.374 ຄົນ. ໃນນີ້ມີແຮງງານທີ່ເປັນເພດຍິງຫຼາຍເຖິງ 653 ຄົນ ແລະ ມີເດັກນ້ອຍອີກປະມານ 70 ຄົນ, ເຊິ່ງມີຜູ້ຕິດເຊື້ອພະຍາດໂຄວິດ-19 ສະສົມທັງໝົດ 494 ກໍລະນີ, ກຳລັງປິ່ນປົວ 348 ກໍລະນີ ໃນຈໍານວນຜູ້ຕິດເຊື້ອ. ໃນນັ້ນ 494 ກໍລະນີ ມີເພດຍິງກວມເອົາ 60%, ເດັກນ້ອຍ ແລະ ແມ່ຍິງທີ່ຖືພາ ຈຳນວນໜຶ່ງ.
ສຳລັບກໍລະນີຜູ້ຕິດເຊື້ອພະຍາດໂຄວິດ-19 ທີ່ເປັນເພດຍິງ ແລະ ເດັກນ້ອຍ ທາງພະແນກສາທາລະນະສຸກແຂວງ ໄດ້ເອົາໃຈໃສ່ເປັນພິເສດ ໃນເລື່ອງການເບິ່ງແຍງດູແລທາງດ້ານສຸຂະພາບຂອງແມ່ ແລະ ເດັກ ໂດຍປະຕິບັດຕາມນະໂຍບາຍຮັກສາສຸຂະພາບແມ່ ແລະ ເດັກໃຫ້ມີຄວາມປອດໄພທາງດ້ານອາຫານການກິນ, ຊີວິດການເປັນຢູ່ພາຍໃນສູນຮັບປະກັນທີ່ສຸດໃຫ້ເດັກ ແລະ ແມ່ມີສຸຂະພາບທີ່ແຂງແຮງຕາມຫຼັກໂພຊະນາການ, ຫຼັກການຮັກສາສຸຂະພາບທົ່ວໄປໃນແມ່ ແລະ ເດັກ.
